Jayxun ilhomlari
IFORI TARONA
(Chokar gʻazaliga muxammas)
E, goʻzal jonim, mohi tobonim,
Shakkarafshonim, shirin zabonim,
Sursam davronim, keldi zamonim,
E, mehribonim, mohi jahonim,
Xurshidi sonim, oromi jonim.
Sohibi qudrat yaratmish xilqat,
Bir komil fitrat, bir pari surat.
Menda ne jurʼat, Senda ne siyrat –
Shamshodi qomat, xurshidi talʼat,
Koni latofat, sarvi ravonim.
Koʻrsam ahyonda, hislar tugʻyonda,
Koʻzim giryonda, loldir zabon-da,
Qolsam ziyonda, oʻtsam armonda,
Sendek jahonda mahvash qayonda
Yoʻqdir makonda budur gumonim.
Karam et kam-kam, aylama mulzam,
Qultum suvi ham men uchun zam-zam,
Etmasang malham haddimdur barham,
Sen bila hamdam boʻlmasam birdam,
Koʻyingda oʻlsam, boʻyningda qonim.
Izn oʻzingdin, yursam izingdin,
Changu toʻzingdin, xonman soʻzingdin,
Xilvat tuzingdin, shakkarezingdin,
Qosh-u koʻzingdin, shirin soʻzingdin,
Oydek yuzingdin aylansin jonim.
Har shomu sahar xayoling rahbar,
Iddaong magar – boshima afsar,
Chust aylab kamar Tursun safarbar
E, mohipaykar, xurshidi anvar,
Men senga Chokar, sarvi ravonim.
Tursunboy Abdullayev.
Dadamni eslab...
Doʻstlaringiz yurganida yurolmay,
Bu dunyoda baxtli davron surolmay.
Armon qilib, boʻyimizni koʻrolmay,
Oramizdan erta ketgan dadajon.
Ekin ekib hosilini terolmay,
Orzu qilgan toʻylarimiz berolmay.
Nevarangiz qiziqlarin koʻrolmay,
Oramizdan erta ketgan dadajon.
Ayta olmay qolgan ne bir soʻzingiz,
Koʻz oldimdan ketmas bosgan izingiz.
Yetim boʻlib oʻsdi oʻgʻil-qizingiz,
Qaytib kelmas boʻlib ketgan dadajon.
Koʻzlarim izlaydi, topolmas, tolar,
Sogʻinib yuragim dardlarga toʻlar.
Dasturxon yoniga kelsak, barimiz,
Oʻrningiz boʻsh koʻrib koʻzimiz tolar.
Men qoʻshiq kuyladim, qoʻlimda sozim,
Dadajon, qanchalab men sheʼrlar yozdim.
Axir Siz qoʻlimga qalam tutqazgan,
Dadajonim mening – aziz ustozim.
Aydos Ibodullayev.
OILAM
Dadajonim, dadajon,
Siz judayam mehribon.
Quvontirib yurasiz,
Boʻlaman doim shodon.
Oyijonim, oyijon,
Siz tanhosiz chiroyda.
Sizdagi xislatlar yoʻq,
Qarang, hattoki oyda.
Opajonim, opajon,
Boʻlay oqila singil.
Aytganingiz qilaman,
Yumush boʻlsa har qachon.
Akajonim, akajon,
Bittagina jonajon.
Ishin bilib qiladi,
Hammamizga mehribon.
Yana bitta opam bor,
Erkaligim koʻtarar.
Oilada men kenja,
“Kichkintoy” deb suyarlar.
Muxlisa RAJABOVA, 12-maktab oʻquvchisi.
Tadbirkorlik zamoni keldi
Mehnat qilib, bogʻlar yaratib,
Dovrugʻini elga taratib,
Dunyo ahlin oʻzga qaratib,
Ishlashning bir imkoni keldi,
Tadbirkorlik zamoni keldi.
Qoʻlga olib butun imkonni,
Boʻlmasin deb xor-u zorlikni,
Oʻrganing deb tadbirkorlikni,
Yurtboshimning farmoni keldi,
Tadbirkorlik zamoni keldi.
Sogʻlom turmush tarzini koʻzlab,
Insonlarning dardini soʻzlab,
Boy boʻlishlik sirlarin izlab,
Yashamoqning davroni keldi,
Tadbirkorlik zamoni keldi.
Bir narsani ikki qilay, deb
Topganingni yurgin halol yeb.
Moʻldan boʻlsin sandigʻingda zeb,
Davrning omon-omoni keldi,
Tadbirkorlik zamoni keldi.
Oʻylab bugun barcha yoshlarni,
Termulgan shu qalam-qoshlarni,
Bilaklari ezar toshlarni,
Yoshlarning zoʻr imkoni keldi,
Tadbirkorlik zamoni keldi.
Tursunboy Doʻschanov.
Ey oʻgʻlon
Tunda yurma kunduz yur,
Oʻgʻri boʻlma toʻgʻri boʻl.
Birovga choh qazima,
Adashmagin, halol boʻl.
Vatan tanho, yagona,
Taʼzim qilgin tuproqqa.
Bobolardan meros bu,
Asra koʻz-u qaroqda.
Toʻgʻri yoʻldan yur doim,
Maslahatim koʻp senga.
Yoshgina umring xazon,
Boʻlmasin aro yoʻlda.
Xazon boʻlma, yanchilma,
Maysadek ungin-oʻsgin.
Daraxt boʻlgin bogʻlarda,
Shirin mevalar bergin.
Nomaʼlum kimsalarga,
Ixtiyoring bermagin.
Aldamchi koʻchalarga,
Kirib xor-zor boʻlmagin.
Oʻqi, izlan, ol saboq,
Tengdoshlardan ol ibrat.
Tonglaring boʻlgay porloq,
Marra seniki, albat.
Zuhra Ahmedova.
KAPALAK
Kapalak, hoy kapalak,
Qanotlaring kamalak.
Tutolmasdan men seni,
Boʻldim-ku juda halak.
Endi tutdim, deganda,
Yana uchib ketasan.
Gullarimga qoʻnib sen,
Goʻzal chiroy berasan.
Fazilat Hayitboyeva,
31-maktab oʻquvchisi.
HAYoT
Hayot beshafqatdir, dardlarga toʻla,
Kimga qaygʻu, kimning omadi kular.
Baxt ham, baxtsizlik ham keladi qoʻsha,
Sinov, mashaqqatli biz yurgan yoʻllar.
Men-chi, ulkan yoʻlning boshida turgan
Bandaman: Oʻzingdan kutaman najot.
Atrofimda izgʻib, payt poylab yurgan
Balolardan omon, saqlagin hayot!
Shahrizoda Muhammadjonova,
30-sonli maktab oʻquvchisi.
TILAK
Koʻcha yuzin supurar yigit,
Tozalovchi u, adashmasam.
Mashinada loyni sachratib,
Bir boyvachcha oʻtar toʻsatdan.
Yigit shoʻrlik tutaqib ketar,
Qahri kelib qaynaydi qoni.
Hech kimsa yoʻq uni ovutar,
Soʻkar nogoh, bir kam dunyoni.
Yuragimni ezib borar gʻam,
Borib uni yupatgim kelar.
Supurgisin olib qoʻlidan,
Hayot qadrin anglatgim kelar.
Shu bolaning koʻnglidayin sof,
Mening ushbu aytar tilagim:
«Boyvachchaning oʻgʻliga insof,
Shu yigitga omad ber, Tangrim!”
Aziza MADRAHIMOVA.
ONAJONIM
Onajonim, aziz volidam,
Mehribonim suyanchigʻimsiz.
Koʻzlarimga nursiz har bir dam,
Munis onam, siz dilkashimsiz.
Bolaligim qoʻmsayman mudom,
Alla aytgan chogʻlaringizni.
Boʻylarimdan aylanib doim,
Erkalatgan onlaringizni.
Sochlarimni ohista tarab,
Mayda qilib oʻrib qoʻygansiz.
Betob boʻlsam boshimni silab,
Parvonalar boʻlib turgansiz.
Ilm oldim, kasbim ham bordir,
Oʻgʻil-qizim, yorim ham bordir.
Onajonim, siz bilan menga,
Baxt-u shodlik hamisha yordir.
G.Bozorboyeva,
73-maktab oʻqituvchisi.
DOʻSTIMGA
Mening bitta doʻstim bor,
U judayam mehribon.
Yuragida oʻt-olov,
Yengolmaydi bizni yov.
Uning ismi Shohinur,
Judayam mehribon qiz.
Birgalashib ikkimiz,
Boʻlamiz katta yulduz.
Bor boʻlsin doʻstlar har on,
Doʻstsiz qolmasin inson!
Shohinay ShOMURODOVA.
Oʻksitma, bu oʻksik qalbimni
Ortingdan ergashgan soyangdirman men,
Qochmoqqa hech imkon topolmassan sen.
Hadya et menga yor, bitta tabassum,
Gʻamlarim qalbimdan butkul yoʻqolsin.
Orzular ummoni ichra yashayman,
Jonimdan ortiq yor, sevsam netay men.
Kel endi yonimga bir zum boʻlsa ham,
Sensiz bu dunyoning doim biri kam.
Qalbimda muhabbat chaqmogʻi chaqar,
Yurakni bu sevgi azoblab yoqar.
Koʻzimdan daryodek yosh qaynab oqar,
Oʻksitma bu oʻksik qalbimni sen ham.
Oysanam Tilovmurodova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
