Jayxun ilhomlari
IFTIXOR
Mustaqillik bayrami – dilda tugʻyondir bugun,
Sarhisob aniq, yorqin. Reja ayondir bugun,
Inshoolloh, xalqimga yoʻllar ravondir bugun,
Yigitlar yovqur, qizlar mohitobondir bugun,
Kamolingga mahliyo jumla jahondir bugun!
Har tolibi ilmga ochildi jahonga yoʻl,
Tadbirkor-u ijodkor, oqil har insonga yoʻl,
Yaxshi niyat, tashrifi xoʻb aziz mehmonga yoʻl,
Tojik, qirgʻiz, qozogʻim, hind-u turk, afgʻonga yoʻl,
Himoyat kafolatli, xurram zamondir bugun.
Shiordir: “Birodarlik!” Koʻrarmiz baxtni baham,
Millat-u irq-u dinda tafovut topgan barham.
Yigit-qiz eʼtiborda, oqsoqollar mukarram,
Yetmoqda Ulugʻ niyat – Haji muborakka ham,
Sobit eʼtiqod ila toza iymondir bugun.
Tugalar toʻrachilik, poraxoʻr yer taʼzirin,
Qonun olar hayotiy adolatli taʼbirin,
Davlat idoralari xalqqa xizmat taʼsirin,
Qachon, kim koʻrgan shunday “Qurʼon”, “Hadis” tavsirin,
Bunda oshkor-u pinhon, qudrat ayondir bugun.
Muhim: el manfaati, ulugʻ va aziz – Inson!
Istilohlar tolʼeing, istiqbolingdan nishon,
Hayqirmoqqa baralla yetdi fursat va imkon:
“Aziz va yagonamsan, jonajon Oʻzbekiston!”
Shujo, jasur, mardona rahbar Sultondir bugun.
Tursunboy ABDULLAYeV.
Bayraming muborak
Zamonam tinch. Yurtim farovon,
Xalqim rozi, boʻlgaydir omon,
Boʻlmagandir bundayin zamon,
Mangu yashna, hur Oʻzbekiston!
Mudom porloq boʻlgay quyoshing,
Qutlugʻ boʻlsin yigitlik yoshing.
Omon boʻlsin dono Yurtboshim,
Mangu yashna, hur Oʻzbekiston!
Mustaqillik bor boʻlsin mudom,
Alloh oʻzi yor boʻlsin mudom.
Yaxshi kunlar boʻlsin bardavom,
Mangu yashna, hur Oʻzbekiston!
Yoshlar borar kelajak sari,
Bir-biridan suluv, dilbari.
Barno yigit, qizlarning bari,
Qutlar bugun, hur Oʻzbekiston.
Dunyoga tanildi qoraqalpoq ham,
Amudaryom mening qaysi yurtdan kam.
Mehnat-u ijodda barchasi hamdam,
Bayraming muborak, hur Oʻzbekiston.
Dalamiz koʻrkidir oppoq paxtalar,
«Oq oltin»i bois oʻzbek maqtalar.
Farhod shukronasi koʻpdir naqadar,
Bayraming muborak, hur Oʻzbekiston!
Farhod AVEZOV.
VATAN
Shuhrating-u shoningdan,
Aylanayin boringdan.
Dil shodlikka toʻladi,
Mehr toʻla bogʻingdan.
Dalalarda yugurib,
Sheʼr oʻqiyman gohi men.
Shunda, meni koʻrsangiz,
U eng baxtli qiz-ku deng.
Vatanimni kuylasam,
Onam oʻpar yuzimdan.
Aytadiki: “jon bolam,
Chalgʻimagin soʻzingdan!”
Dildora RAJABOVA,
“Bogʻ” mahallasi.
JONIM FIDO
Yagonadir Vatanim mening,
Bunday Vatan olamda yoʻqdir.
Men shu yurtda tugʻilib-oʻsdim,
Kindik qonim toʻkildi mening.
Men shu yurtda tugʻilganim-chun,
Koʻzga surgum gardlarini ham.
Kerak boʻlsa, Vatanim uchun,
Jonimni ham fido qilaman.
Roza MURODOVA,
67-sonli maktab oʻquvchisi.
Yurtim
Oʻzbekiston atalmish,
Yurtim bor goʻzal.
Uning har goʻshasi,
Jonimdan afzal.
Togʻ-u toshlarida,
Gullar yashnaydi.
Hatto choʻp qadasang,
Gullab-yashnaydi.
Bahor kelsa bogʻlarida,
Olmalar pishar.
Oʻrik, olcha, olxoʻrilar
Yetilib tushar.
Bayrogʻida aks etgan,
Oʻn ikki yulduz.
Osmoni musaffo
Kecha va kunduz.
Bobolarim bizlarga,
Qoldirgan meros.
Shu yurtni avaylash,
Mard avlodga xos.
Yorqinoy Kenjaboyeva.
Jonajon elim
Ham ozod va obod boʻlib yashnayapsan, jon Vatan,
Tinch hayotning ogʻushida gullagan boʻston, Vatan,
Baxt-u iqbol maskanisan, bulbulga oshyon, Vatan,
Har farzanding oʻziga bek, oʻziga sulton, Vatan,
Ham aziz va yagonamsan, oʻzing jonajon, Vatan.
Jannat misol bagʻring aro bir-birin hurmatlashib,
Yashar shod-u xurram mudom turli millat birlashib,
Yangrar oʻzbekning toʻyida “Dambermes”lar yarashib,
Qoraqalpoq toʻyida “Lazgi”ga oʻynar yayrashib,
Bunda oʻz qadrini topgan har bitta inson, Vatan.
Oʻz kamoling orzusida ilm izlasang qay zamon,
Oʻzbekiston farzandiga ochar quchoq toʻrt tomon,
Qaytsang hunarli boʻlib, zamin kutar neʼmatga kon,
Shu sababdan yurtimizni deydilar dorulomon,
Har yigit, har qizing uchun yaratding imkon, Vatan.
Ahil elda xayrli ishga doim zafarlar yordir,
Dahr aro qay yurtga borsak, hurmat-izzat tayyordir,
Chunki dunyo ahli uzra eʼtiborimiz bordir,
Shu sababki oʻzbek eli yaxshilarga hamkordir,
Kechgan har bir on, soniya keltirmoqda shon, Vatan.
Yoshlar izzatda doimo, keksalar ham baxtiyor,
Har bir inson hayotiga qaratilgan eʼtibor,
Kimning agar dardi boʻlsa, boʻlmagay bu dunyo tor,
Chunki unga malham birla shirin soʻz shifokor bor,
Har kimga bu elimizda mehr-shafqat ehson, Vatan.
Neki soʻz kelsa xayolga gul hayot taʼsirida,
Bu koʻngil toʻlmas baridan, qancha ayt tasvirida,
Ne uchunki Yurtboshimiz har chora-tadbirida,
Yuksalishni rejalaydi xalqimiz taqdirida,
Bu bizning yurt, goʻzal oʻlka, bu–Oʻzbekiston, Vatan.
Ahmad NAFASOV,
«Jayxun ilhomlari» NNT raisi.
Tuprogʻing muqaddas
Asrlar oshgandir dovrugʻing yurtim,
Zamonlar koʻrgansan tundan ham qora.
Iymoning saqlading, pokiza, butun,
Avlodlar hamisha qilar xotira.
Gulshansan jahonda tengi yoʻq yurtim,
Onamday muqaddas asragum seni.
Nomingdir eng toza va oliy maqom,
Alla-la boshlangan har bitta kuni.
Muqaddas tuprogʻing koʻzimga suray,
Sajdada hattoki choʻlda yantogʻing.
Aslida men sening gʻuloming boʻlay,
Navoiyni koʻrgan ona tuprogʻim.
Jahongir Mirzoning avlodlarimiz,
Olqish olgaydirmiz yurtim, madhingga.
Navoiy bobomning zuryodlarimiz,
Aslo koʻz tegmasin goʻzal husningga.
Zafar quchayotir har bitta yoshing,
Bayrogʻing ufqqa, xalqim, yetajak.
Erking oʻz qoʻlingda, omondir boshing,
Kutmoqda xalqimni buyuk kelajak.
Iymonni saqlagan yuqtirmasdan gard,
Sotmagan bir qarich tuprogʻin yovga.
Taxti Sulaymondir boshida bor baxt,
Odamlari pokligi oʻxshagan qorga.
Noming ulugʻ erur daholardan ham,
Islom bobom jannatda buyuk qoʻrgʻonim.
Mumtoz yurtni qancha taʼriflasa kam,
Aziz va yagona Oʻzbekistonim!
Mardona JUMAMURODOVA,
12-sonli maktabning 9-sinf oʻquvchisi.
Boʻston boʻlajak
Qoʻlni qoʻlga berib, ahil yashasak,
Butun olam goʻyo boʻston boʻlajak.
Millatlar tinch-totuv, birdam yashasak
Albatta, kutadi nurli kelajak!
Hamjihatlik, mehr-oqibat boʻlsa,
Vatan deb atalmish oilamiz tinch.
Qayerdaki tinchlik hukmron ekan,
Odamlarga yordir baxt, omad, sevinch.
Ayyoming muborak, ey aziz yurtim,
Bolalar bagʻringda shodon oʻynasin!
Oqniyat, toʻgʻrisoʻz, mehnatkash xalqim
Moʻl xirmon yaratib, xurram toʻylasin.
Ziyoda BEKMURODOVA,
20-sonli maktabning
ingliz tili fani oʻqituvchisi.
XALQIM
Taʼrifing aytmoqqa
ojizdir tilim,
Qancha aytsam shuncha
yayraydi dilim.
Goʻzalim, betakrorim,
jonajon elim,
Muqaddas Vatanim –
oʻzbegim manim!
Jahon aro hamisha
yangragay noming,
Hech qachon oʻchmasin
shuhrat-u shoning.
Hamisha azizdir
bugʻdoy-u noning,
Muqaddas Vatanim –
oʻzbegim manim!
Oʻzbegim elsevar
xalqimdir mening,
Dillarda madhiyang
yangraydi mangu.
Or-nomusim, tayanchim,
suyanchim mening,
Insonlaring hamisha
duoda ezgu.
Donolarning donolari
yetishgan,
Jahon senga
tasannolar aytishgan.
Sportda birinchi,
yuksakdir ilm,
Muqaddas Vatanim –
oʻzbegim manim!
Onalaring sokin
aytadi alla,
Boyliging mujassam
paxta, gʻallada.
Bosh egib hamisha
aylaymiz taʼzim,
Muqaddas Vatanim –
oʻzbegim manim!
Chin farzandlik burchim
doim saqlayman,
Bildirgan ishonching
doim oqlayman.
Ravnaqingga doim
qoʻshaman hissa,
Oʻzbek xalqim yashnayver,
mangu hamisha.
Aziza OʻROZBOYeVA,
32-sonli maktab oʻquvchisi.
SENDAN YIROQ KETOLMASMAN...
Ey, mening diyorim, jonajon oʻlkam,
Ertaklar aytmasang, hech uxlolmasman.
Misli bir jannatsan, doimo koʻrkam,
Qancha tasvirlasam hamki tolmasman.
Ne qilay, sendan olis ketolmasam,
Ketsam gar, sogʻinaman bir lahzada.
Bolaligim oʻtgan koʻchalaringni,
Eslasam, tuygʻular kelar larzaga.
Menga tunlarda ertak aytgan Vatan,
Ertaklaring eslashdan tolmasman.
Oylar, uzun yillar ham oʻtmas sensiz,
Bir on ham sendan yiroq ketolmasman!
Ey, mening Vatanim, jonajon oʻlkam,
Dunyoda tengsizsan, hammadan koʻrkam!
Raʼno ISMOILOVA.
BULBULGA GUL HAMDAM
Yangi oy chiqsami kulimsirab koʻkdan,
Quvonchni quchganim koʻksimni oʻpgan.
Kuylari jahd etib chiqqay chamanga,
Qushlarday qoʻnarlar zebo Vatanga.
Ayni qish boʻlsa ham boʻsagʻam boʻston,
Boʻlgandek oyogʻim ostida osmon.
Sanoqli davrimda sogʻliq berib Haq,
Hurlikni his etib yasharman xushvaqt!
Haqqimdan ziyoda, insofdan emas ,
Soʻrasam idrokim aslo yoʻl bermas!
Yangi oy kashf etgan Haqqa sevgim bor,
Qadamsiz damgacha qilgum ixtiyor.
Sevgisiz yashagan bormi bu bogʻda,
Jayhunim koʻrk tuqqan koʻhna qirgʻoqda.
Men ham bir oʻgʻilman shul yoqdan chiqqan
Bulbulga gul hamdam qishloqdan chiqqan...
Jumaboy HIDOYaTOV.
ALPOMIShLAR OʻLKASI
Alpomishlar oʻlkasi bu – koʻhna Turon,
Matonatga timsoldir har bitta oʻgʻlon.
Buyuk davlat bunyod etgan sohibqiron –
Amir Temur, Navoiydan meros makon!
Taxtdan tushsa, otda yurgan mardi-maydon,
Al-Buxoriy, Bobur Mirzo – sobit iymon.
Vatan, degan sharaf tojin kiyib oʻtgan
Jaloliddin Manguberdi kabi oʻgʻlon!
Ilm-u irfon nurin sochib jahon ichra,
Dong taratdi magʻrib, mashriq Shom-u Chinda.
Al-Beruniy, Al-Xorazmiy, Ibn Sino,
Forobiyning irfonlari dil ichinda!
Alpomishlar oʻlkasi bu – koʻhna Turon,
Istiqlolning qanotidir botir oʻgʻlon.
Yarim jahon bunyod etgan Sohibqiron –
Temuriylar oʻlkasidir Oʻzbekiston!
Sherzod Rahimboyev,
Kuyuk koʻpir ovuli.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
