Unumli mehnat natijasi

Paxtakor dehqonlarimizning qaynoq mehri va ishchan, mohir qoʻllari bilan ekib oʻstirilayotgan paxtalarimiz har yilgidek bu yil ham oʻzining cheksiz sahovatini bizdan darigʻ tutmadi. Paxtazorlarimizda birin-ketin "oq oltin” xirmonlari koʻkka boʻy choʻzdi. Natijada tumanimiz paxtakorlari 16050 gektar paxta maydonidan 33050 tonnalik yuksak "oq oltin” xirmonini bunyod etib, yillik shartnomaviy rejasini ortigʻi bilan ado etib, dastlabki dovondan oshdi. Endilikda butun kuch-gʻayratimiz va shijoatimizni 43 ming tonnalik yuksak marrani egallashga safarbar etmoqdamiz.

Bugungi yuksak "oq oltin” xirmonimizni bunyod etishda tumanimizdagi mavjud 261 ta paxtachilik fermer xoʻjaliklarining munosib hissalari bor, albatta. Shu jumladan, bizning "Yoʻldoshev Anvar” fermer xoʻjaligi paxtakorlarining ham ulushlari borligidan faxrlanamiz. Fermer xoʻjaligimizda erta bahorda 82 gektar paxta maydoniga baraka urugʻlari qadalib gektarlardan toʻliq nihol olindi va agrotexnik qoidalariga muvofiq parvarish qilindi, meʼyorida oziqlantirildi va sugʻorildi. Natijada biz kutganimizdek moʻl paxta hosili yetishtirildi. Paxtazorlardagi hosil choʻgʻini chamalab koʻrib bu yil ham 40 tsentnerlik marra egallanishiga amin boʻldik.

Paxta yigʻim-terim ishlari qizib ketdi. Har kuni paxtazorlarimizda 160-165 nafar terimchilar va hasharchilar unumli mehnat qilishib, oʻn kun ichida yillik marradan oshdik va davlat xazinasiga 200 tonnadan ziyod "oq oltin” durdonalarini yetkazib berdik. Munavvar Siydabullayeva, Gulbahor Siytchanova, Momojon Otajanova, Shukrullo Yoʻldoshev, Anvar Xonov va Soatboy Matqurbonov kabi ijarachilarimizning har biri mavsum boshidan buyon 8-10 tonnadan paxta hosilini terib topshirdilar.

Shuningdek, Ajiniyoz nomidagi NDPI pedagogika fakultetining 44 nafar talabalari ham zoʻr gʻayrat koʻrsatib, 60 tonnadan ziyod "oq oltin” durdonalarini terib topshirdilar. Umuman, bugungi kunda paxtazorlarimiz qizgʻin mehnat maydoniga aylangan.

Terimchilarning unumli mehnat qilishlari uchun barcha qulay shart-sharoitlarni yaratib berganmiz. Mehnat haqlari oʻz vaqtida hisob-kitob qilinmoqda. Ilgʻor terimchilar moddiy va maʼnaviy ragʻbatlantirilmoqda.

Paxtazorlarimizda hosil hali moʻl. 330 tonnalik yuksak marrani egallab, paxta hosildorligini gektar boshiga 40 tsentnerdan oshirishga erishamiz.

Anvar YOʻLDOShEV,

"Yoʻldoshev Anvar” fermer xoʻjaligi raisi, Oʻzbekistonda xizmat koʻrsatgan paxtakor.