YeR – OLTIN XAZINA

Bizning ota-bobolarimiz ham dehqon boʻlishgan, umr boʻyi yer bilan tillashgan, yerni ishlab ziroatchilik qilgan, barcha yemish, oziq-ovqat mahsulotlari yerdan undirilgan, butun hayotlari yer bilan bogʻlanib ketgan. Omborlari don-dunga, qovun-tarvuzga, kadi-qovoqqa, qoʻralari molga toʻlgan. Shu bois, ular uch oy qovunim, uch oy sogʻinim, uch oy qovogʻim, uch oy chavogʻim, deya oʻz turmush tarzlarini ifodalashgan.

Otaga qarab oʻgʻil oʻsar, onaga qarab qiz oʻsar, deganlaridek men ham yer ishlash va ekin ekishni rahmatlik otam Gulmon uychidan oʻrgandim. U uqtirib aytardiki, "Yerni xor tutma, xor boʻlasan”, "Yerni toʻydirsang, u seni toʻydiradi”, "Butun elni yer boqadi”, "Yering tekis boʻlsa, hosili toʻkis boʻladi”, "Erta eksang, erta oʻrasan”. Albatta bu naql va iboralar bobo dehqonlarimizning bir necha ming yillik hayotiy tajribalaridan kelib chiqqan boʻlib, barcha dehqonlarimiz bunga amal qilishadi.

Garchand, asosiy kasbim yuk mashinasi haydovchisi boʻlsa-da dehqonchilikdan hech qachon qoʻl uzmadim. Otam vasiyatlariga amal qilib, tomorqa yerimizdan unumli foydalanib kelmoqdamiz. Mustaqillikka erishish arafasida muhtaram Prezidentimiz I.A.Karimov tomonidan chiqarilgan qaror boʻyicha qishloq aholisiga qoʻshimcha ekin maydonlari ajratildi. Keyin bu yerlar xalq orasida "Prezident yeri” deb atalib ketdi. Qishloq aholisi uchun qoʻshimcha ekin maydonlarining berilishi natijasida birinchi navbatda aholi turmushining, butun qishloq hayotining yaxshilanishiga mislsiz katta yordam boʻldi. Kuzgi bugʻdoy ekishni oʻrganib, xirmonlari gʻallaga toʻldi. Dehqonlar yer bilan yanada mustahkam bogʻlanib, tomorqa yerlariga sabzavot va poliz ekinlari ekib, oziq-ovqat masalalarini oʻzlari hal qilib, talab-ehtiyojlaridan ortib qoladiganlarini bozorga chiqarib, shahar aholisining oziq-ovqat taʼminotini yaxshilashga xizmat qilmoqdalar.

Mustaqillik yillarida gʻalla mustaqilligiga erishilganligi mamlakat hayotidagi tub burilish boʻldi. Mana, oʻtgan 2012-yilda Oʻzbekiston gʻalla xirmoni 7 mln. 170 ming tonna boʻlgan boʻlsa, joriy 2013-yilda 7 mln. 610 ming tonnalik "qirmizi don” xirmonlari uyuldi. Bu albatta, rizq-u roʻzimiz moʻlligidan darak berib, toʻkin-sochinlik timsoliga aylanmoqda.

Keyingi yillarda yangi bogʻ-rogʻlar barpo qilishga eʼtibor kuchaydi. Qishloqlarimizdagi har bir xonadon hovlisida oʻziga xos kichik oilaviy mevali bogʻni koʻrib, koʻzingiz quvonadi. Bizning hovlimizda ham mevali daraxtlar oʻstirilib, dasturxonimiz turli meva-chevalar bilan toʻlib turibdi.

Ha, hamqishloqlarimiz tomorqa yerlardan unumli foydalanishga erishmoqda. Tadbirkor dehqonlarimiz kichik issiqxonalarda erta sabzavot ekinlari koʻchatlari yetishtirishmoqda.

Mustabid tuzum davrida faqat paxta deb yashagan qishloq aholisi istiqlol yillarida oʻz yeriga bek boʻldi, tomorqasini ulkan daromad manbaiga aylantirdi va rohatini ham koʻrayapti.

Bekchon GULMONOV,

mehnat faxriysi, "Toʻlqin” ovulidagi tadbirkor dehqon.

(Foto - http://uza.uz)