Uydan yoki ishxonadan chiqmasdan qanday soliq xizmatlaridan foydalanish mumkin?

my2.gov.uz manzilida ishga tushirilgan yangi talqindagi Yagona interaktiv davlat xizmatlari portalida Davlat soliq qoʻmitasi bilan hamkorlikda tatbiq qilingan interaktiv xizmatlar zarur hujjat va maʼlumotlarni tez va oson usulda olish, soliq xizmatlaridan masofadan turib samarali foydalanish imkonini beradi. Oʻzbekiston Axborot texnologiyalari va kommunikatsiyalarini rivojlantirish vazirligi ana shunday xizmat turlari haqida maʼlumot taqdim etdi. 

Qoʻshilgan qiymat soligʻi toʻlovchilari haqida maʼlumot olish

Mazkur xizmat soliq toʻlovchiga oʻzi shartnoma tuzayotgan, mahsulotlarini realizatsiya qiluvchi korxona toʻgʻrisida QQS toʻlovchisi yoki toʻlovchisi emasligi toʻgʻrisida maʼlumot beruvchi hisob varaq-fakturalarda QQS ning asossiz koʻrsatilishi bilan bogʻliq holatlarini oldini olish uchun taqdim etiladi.

Xizmatdan foydalanish uchun tashkilotning faoliyat boshlagan yili hamda STIR raqami kerak boʻladi.

Yuridik shaxslar uchun soliq imtiyozlari

Yuridik shaxslarning faoliyati yuzasidan amalda mavjud imtiyozlar, uni tartibga soluvchi meʼyoriy hujjatlar va ularning muddatlari toʻgʻrisida maʼlumot olish mumkin. Maʼlumotlar doimiy yangilanib boriladi.

Yuridik shaxslar uchun soliq va boshqa majburiy toʻlovlar toʻgʻrisida maʼlumot

Soliq toʻlovchi yuridik shaxslarga soliq va boshqa majburiy toʻlovlar boʻyicha mavjud shaxsiy kartochkalarini toʻgʻridan-toʻgʻri Davlat soliq qoʻmitasining axborot resurslaridan koʻrish imkoniyati yaratilgan.

Soliq toʻlovchining xohishiga koʻra, unga yil boshidan hisoblangan, toʻlangan summalar, soliq qarzi, ortiqcha toʻlov, penyalar hamda byudjet va byudjetdan tashqari maqsadli jamgʻarmalar bilan hisob-kitoblar toʻgʻrisidagi boshqa maʼlumotlar taqdim etiladi. Mavjud shaxsiy kartochkalardan koʻchirmalarni tanlangan yil boʻyicha shakllantirish mumkin.

Natijada soliq toʻlovchi tomonidan soliq majburiyatlarini oʻz vaqtida va toʻliq bajarish ustidan nazorat olib borish imkoniyatlaridan foydalanish mumkin.