Jayxun ilhomlari

Men yetmasam...

Bugun xush kayfiyat bilan uygʻondim,

Boshqacha koʻz bilan boqdim olamga.

Ajoyib orzular bilan chulgʻandim,

Men yetmasam, nasib etar bolamga.

 

Shukur, oldingidan koʻp oʻzgarish bor,

Yurtboshi islohot qilmoqda qator.

Har nuqsonga boʻlganini eʼtibor,

Men koʻrmasam, nasib etar bolamga.

 

Arzimas ishga ham shuni deb chora,

Amaldorlar sira olmasa pora,

Toʻkin kun kechirsa beva-bechora,

Men koʻrmasam, nasib etar bolamga.

 

Gazning xavfi dilga solmay koʻlanka,

Benzinlarga toʻla tursa kolonka,

Mayli pulga, yo plastik, talonga,

Men koʻrmasam, nasib etar bolamga.

 

Haq sinovi toʻgʻri kelib hissangga,

Dard balosi kirsa birdan jussangga,

Davolashsa, qaramasdan kissangga,

Men koʻrmasam, nasib etar bolamga.

 

Onalik baxtidan ochilib gul-gul,

Kelinlar roddomda tugʻsalar bepul,

Kuyovlar iqboli kulgan kunni, shul –

Men koʻrmasam, nasib etar bolamga.

 

Shofyorlar yetishsa bir kunga yorqin,

Qancha mashinani sindirgan oldin,

Yoʻqolsa abadiy yoʻldagi "gʻalting”,

Men koʻrmasam, nasib etar bolamga.

 

Koʻrsatma boʻlmasa tosh qotgan rahbar,

Tashabbus koʻrsatib ishlasa agar.

Boʻstonga aylanar qishlogʻ-u shahar,

Men koʻrmasam, nasib etar bolamga.

 

Oldi-sotdi ishi boʻlsa qay joyda,

Amal qilsa Rasul aytgan qoida.

Ham savob ishlasa, ham olsa foyda,

Men koʻrmasam, nasib etar bolamga.

 

Avtobus kam, shukur - koʻpdir taksilar,

Lekin insofsizi minganni shilar.

Bir kuni tartibga tushganin shular,

Men koʻrmasam, nasib etar bolamga.

 

Ovqatlanish payti kelgani mahal,

Svet degan qurgʻur oʻchadi har gal,

Bunga ham topilgan paytni bir amal,

Men koʻrmasam, nasib etar bolamga.

 

Aholiga arzon yoqilgʻi uchun,

Kelsa koʻmirning oʻrniga kukun.

Oxiri sifatli koʻmir kelgan kun,

Men koʻrmasam, nasib etar bolamga.

 

Orzu-umid olgʻa undovchi narsa,

Bariga Yaratgan imkoniyat bersa,

Kamchiliksiz kunga bir kun yetkarsa,

Men koʻrmasam, nasib etar bolamga.

Ahmad Nafasov.

 

Kuz saxovati

 

Kecha bahor edi, keyin yoz fasli,

Ketma-ket navbatda keldi saxiy kuz.

Koʻnglimda entikish, hayajon nazmi,

Bogʻlar boyligini etadi koʻz-koʻz.

 

Dalalar bagʻrida «oq oltin» sayli,

Kuzning himmatidan koʻngillar toshgan.

Zamindan gʻalvirin koʻtargan payti,

Mavsum xirmonlari togʻlardan oshgan.

 

Yurtim, qutlugʻ boʻlsin hosil xirmoning,

Fayz-u tarovatdan obod har makon.

Zuhra ashʼor bitdi, yoʻq hech armoni,

Istiqbol yoʻlida hur Oʻzbekiston!

Zuhra Ahmedova.

 

Vaqt

Armonlarning girdobida toldiradi,

Xazonlarning toʻzonida qoldiradi.

Koʻz yoshlarning daryosida choʻktirib,

Goh kuydirib, gohida kuldiradi.

 

Menman degan bahodirlar tang qolar,

Toʻlib-toshgan daryolar qurib qolar.

Dilidagin aytolmayin necha bor,

Vaqtga asir tillar ham jimib qolar.

 

Yoʻqdan aslo hech narsa bor boʻlmaydi,

Yaralmaydi yangilik, giyoh unmaydi.

Oqil inson oʻz umrining soʻnggida,

Oʻz ishiga vaqtni guvoh qilmaydi.

 

Oʻtgan vaqtni ortga qaytarib boʻlmas,

Vaqt oʻz muhrin bosgan tarixda oʻchmas.

I.Firsik, Beruniy mahallasi.

 

Qaytmasman...

Charchadim sevgida, men ha deb sinib,

Endi qiziqmayman bu manzaraga.

Koʻksimga sigʻmasa yurak depsinib,

Parvo qilmam, dilim yiqsa zilzila...

 

Endi ishonchning ham sindi qiymati,

Ketishga yoʻl koʻp-ku, lek oyoq singan.

Faqat... Unutgani koʻzim qiymaydi,

Chunki sevgi qalbga ertaroq singgan.

 

Balki ahmoqdirman, seni yoqtirgan,

Telbadek men sendan koʻp ketib, qaytdim.

Bevafo koʻzingda yaltirab turgan,

Makkora hislarni koʻrganim aytdim.

 

Aytganda, yoqmadi senga toʻgʻri gap,

Buni anglatmoqqa urindim qancha.

Ishonch-u sabrim ham bormoqda, tugab,

Sen kutgan hayotga hali bor ancha.

 

Mayli, sen yuraver, oʻz xayolingda,

Oʻzingga haqdirsan, qushday erkinsan...

"Bir kun paydo boʻlar, deya yoʻlimda”,

Kutganingda esa... ortga qaytmasman!

Sardor Otajonov, QDU talabasi.

 

Ketma, bolalik

Sen ketsang, koʻzlarim ortimda qolar,

Shoʻx-shodon damlarim mungʻayib tolar.

Sevimli oʻyinlar begona boʻlar,

Meni tashlab ketma, aziz bolalik.

 

Begʻubor, qaygʻusiz kunlarim bilan,

Koʻchani changitgan doʻstlarim bilan.

Quvlashmachoq oʻynab qolgim keladi,

Sening quchogʻingda, aziz bolalik...

Mohira YOʻLDOShEVA,

70-sonli maktab oʻquvchisi.

Yurtim

Yurtim goʻzalligi goʻyo,

Taraldi jahon aro.

Bahordan olib ziyo,

Yashillandi bu dunyo.

 

Xalqimiz juda ahil,

Har bir kunidan mamnun.

Yuzlarida tabassum,

Har goʻsha goʻzal, obod.

 

Hech qachon koʻz tegmasin,

Yurtimning jamoliga.

Dunyolar havas qilsin,

Yosh avlod kamoliga.

Dilnoza Bozorboyeva,

40-sonli maktab

oʻquvchisi.

Xatolar

Har kuni osmon toʻla,

Yulduzlarga boqaman.

Oymomoga dil toʻla,

Sirlarimni aytaman!

 

Yulduzlar kulib turar,

Qadamimga nur sochib.

Oymomo men-la yurar,

Goʻyo quchogʻin ochib.

 

Baʼzan yigʻlar yuragim,

Ortimda koʻp xatolar.

Kelmaydi hech soʻzlagim,

Bosib kelsa xatolar.

Raʼno IsmOilova,

Amudaryo xizmat koʻrsatish va servis kasb-hunar kolleji oʻquvchisi.

Kitob

Sevib oʻqiyman har on,

Unda bilim bisyordir.

Oʻrgatar avval odob,

Koʻnglim oftobi – kitob.

 

Ertaklari xilma-xil,

Ongim oʻsar yilma-yil.

Undan olaman bilim

Va beradi zoʻr taʼlim.

Irodaxon

Bekimbetova,    

           30-sonli maktab

               oʻquvchisi.

Vatan

Vatan – mening faxrimdir,

Poydevorim, taxtimdir.

Musaffo osmonimdir,

Onamdir, Oʻzbekiston!

 

Maysa boʻlay poyingda,

Gullayin  har joyingda.

Oqib oʻtay soyingda,

Jonajon Oʻzbekiston!

Sardorbek KENJABOYeV,

20-sonli maktab oʻquvchisi.

VATAN,

YaShOLMAM SENSIZ

Vatan — onajonimsan,

Aziz, ulugʻ, betakror.

Seni yodga olgan chogʻ,

Mavjlanar koʻnglim takror.

 

Vatan, yasholmam sensiz,

Sensan dunyoda tengsiz!

Vatan — mehr oʻchogʻim,

Erkim, hayotim oʻzing.

 

Oltinga teng beshigim,

Aytgan bayotim oʻzing.

Vatan, yasholmam sensiz,

Sensan dunyoda tengsiz!

 

Vatan — oilam, maktab,

Qiblagohim sendursan.

Qorachiqday asrayman,

Jannatlarga tengdursan.

 

Vatan, yasholmam sensiz,

Sensan dunyoda tengsiz!

Sharaflab sheʼrlar bitay,

Mehrim payvasta etay,

 

Bir farzand boʻlib men ham

Vatan, noming tanitay.

Vatan, yasholmam sensiz,

Sensan dunyoda tengsiz!

Husnidabonu IKROMOVA,

Nukus shahridagi Mudofaa Vazirligiga qarashli 16-sonli maktab oʻquvchisi.

 

Baxt

Men hayotim davomida,

Necha rahbarlarni koʻrdim.

Sovetlarning tuzumida,

Baxtga yetmay qancha yurdim.

 

Oʻzbegimning baxti kuldi,

Hayotidan rozi boʻldi.

Fuqarolar dardin soʻrab,

Shijoatkor boshchi keldi.

 

Yurtboshimiz boʻlgay omon,

Tuzmoqda u yangi zamon.

Yuraklarni quchdi ishonch,

Hayotimiz dorilomon.

Erkin IsmOilov,

«Xizr eli» mahallasi.

Vatan

Dunyoda yagonam oʻzingsan Vatan,

Onamday xush zabon soʻzimsan Vatan.

Muqaddas, moʻʼtabar, ota makonim –

Dunyoda yagona Oʻzbekistonim.

 

Erkin va obod chamanim oʻzing,

Jonimday suyganim, jahonim mening.

Tilim burro qilgan togʻday imkonim –

Jahoniy toj-taxtim – Oʻzbekistonim!

Mahliyo BOLTABOYeVA,

9-sonli maktab oʻquvchisi.