OBODLIK – HAR KIMNING EZGU AMALI
Mahalla – Vatan ichra kichik Vatandir. Bu makon – mahallaning obodligi - ona Vatanning obodligi, tom maʼnoda mamlakat va millat farovonligidir. Yurtboshimiz I.A.Karimov obodlik tushunchasiga alohida urgʻu berib: "obodlik deganda, xalqimiz, millatimiz nafaqat koʻrkam va chiroyli, shu bilan birga, tinchlik va osoyishtalik, oʻzaro mehr-oqibat, ahillik, qut-baraka hukmron boʻlgan joylarni tasavvur qiladi”, - deganlarida aynan ana shu – barchamizning qalbimizga yaqin goʻsha – mahallani nazarda tutgan edilar. Vaholanki, yuzlab, minglab oilalar ostonasidan boshlanadigan mahallamiz zamini biz uchun har narsadan ulugʻ va muqaddas. Biz ana shu muqaddas zaminda tugʻilganmiz, uning barcha neʼmatlaridan bahramand boʻlib ulgʻayganimiz, emin-erkin yashab, shu aziz tuproqqa bir daraxtday ildiz qoʻyganmiz. Mahallamiz zaminining obodligi uchun fidoyilikni eng avvalo oilamizdan boshlashimizning boisi ham shundan.
Mahalla institutini rivojlantirish ijtimoiy hayotdagi muammolarni hal etishda fuqarolarning oʻzini-oʻzi boshqarish organlari faoliyatini yanada jonlantirish mustaqillik yillarida davlatimiz siyosatining muhim yoʻnalishlaridan biriga aylandi. Chunki mamlakatning har jihatdan taraqqiy etishi uchun mehnat maydonlarida fidoyilik koʻrsatuvchi xalq mahallada yashaydi, ijod qiladi, yangiliklar yaratadi. Kelajagimiz egalari boʻlgan barkamol avlodni voyaga yetkazishdek sharafli vazifani amalga oshiradi. Shu tufayli muhtaram Prezidentimiz taʼbiri bilan aytganda: "bugungi mahalla har jihatdan obod, koʻrkam va yuksak darajadagi infratuzilmaga ega boʻlishi” zarur.
"Obod turmush” yili Davlat Dasturi doirasida mahallalarimizni yanada koʻrkam va obod goʻshaga aylantirish maqsadida Qoraqalpogʻiston Respublikasi Vazirlar Kengashining 2013-yil 12-yanvarda maxsus bayonnomasi qabul qilindi. Ushbu bayonnomaga muvofiq "Qoraqalpogʻiston Respublikasidagi mahallalarga biriktirilgan vakillarning hududdagi mavjud muammolarni oʻrganish hamda aholi bilan uchrashuvlarini tashkil etish va oʻtkazish tartibi” ishlab chiqildi hamda Respublika miqyosidagi barcha mahallalarga zarur tavsiyalar berildi.
Ushbu tavsiyalarga muvofiq tumanimizdagi barcha OFY va MFYlarga biriktirilgan masʼul xodimlar fuqarolar yigʻinlari raislari va profilaktika nozirlari bilan birgalikda mavjud muammolarni oʻrganish va hal etishni allaqachon boshlab yubordilar. Xususan, mahallalar hududlariga kiruvchi uylarning, shu jumladan koʻp qavatli uylarning holatini oʻrganish maqsadida xonadonlarga tashrif buyurib, xonadon egalarining fikr va mulohazalari hamda turmush tarzi bilan yaqindan tanishib, ularning savollariga javob berish, hududda obodonlashtirish ishlarining ahvoli qay darajadaligini aniqlash asnosida yechimini kutayotgan muammolarni mutasaddi rahbarlar bilan hamkorlikda bartaraf etish chora-tadbirlarini amalga oshirishning xalqqa manzur va maqbul jihatlariga asosiy eʼtibor qaratilmoqda.
Shu yilning 19-fevral kuni "Choykoʻl" ovulida boʻlib oʻtgan uchrashuvda mutasaddi tashkilotlar rahbarlari, mahalla qoʻmitalari raislari, imomlar, fermer xoʻjaliklari raislari, shuningdek aholi vakillari ishtirokida yigʻin hududidagi mavjud muammolarni hal etish borasida ochiq muloqot oʻtkazildi.
Uchrashuvda hududda ijtimoiy-maʼnaviy muhit barqarorligini taʼminlash, sanitariya holatini, obodonlashtirish ishlarini jonlantirishda davlat organlari va jamoat tashkilotlari bilan hamkorliknikuchaytirish, muammolarni oʻrganish va bartaraf qilish boʻyicha zarur chora-tadbirlar belgilab olindi.
Bu kabi ezgu ishlarga kirishish va mahalla institutini yanada rivojlantirishga qaratilgan chora-tadbirlarni amalga oshirish uchun tumanimizdagi barcha OFY va MFY rahbarlariga Qoraqalpogʻiston Respublikasi Vazirlar Kengashining 2013-yil 12 yanvardagi maxsus bayonnomasiga muvofiq ishlab chiqilgan tavsiyalar berildi.
Xoʻsh, bu tavsiyalarning mazmun-mohiyati nimalardan iborat?
Unga koʻra, yuqorida taʼkidlaganimiz kabi mahallalarga biriktirilgan masʼul xodimlar hamda yigʻin oqsoqollari va raislar doimiy ravishda mahalla ahli bilan uchrashib turadilar va yechimini kutayotgan muammolarni hal etish chora-tadbirlarini koʻradilar. Bundan tashqari, mahalla hayotiga oid muammolarni toifalarga boʻlib, ularning yechimini taʼminlash maqsadida oylik, haftalik, choraklik va yillik rejalar ishlab chiqadilar. Mahalla kuchi(koʻproq hashar) bilan qilinadigan, tuman hokimligiga oid masalalarni hal etishni tashkillashtiradilar. Xususan, ishsizlikni bartaraf etish, kommunal, soliq va majburiy toʻlovlarni oʻz vaqtida toʻlash, aholi xavfsizligini taʼminlash, hududda pasport rejimiga rioya etish, sanitariya madaniyatini yuksaltirish, irrigatsiya tarmoqlari holatini yaxshilash, aholi turar joylarida fuqarolar tomonidan boʻsh yotgan yer maydonlarini oʻzboshimchalik bilan egallash, har xil noqonuniy qurilishlar qilish, ayniqsa, koʻp qavvatli uy-joylarning ichki arxitekturasiga oʻzgartishlar kiritishga chek qoʻyish, toʻy-tantanalar hamda dafn marosimlarini isrofgarchiliksiz oʻtkazish bilan bogʻliq masalalarni hal etish yuqorida biz tilga olgan tavsiyalarning asosini tashkil etadi.
Eʼtiborli tomoni shundaki, ushbu tavsiyalar asosida ish olib boruvchi fuqarolar yigʻini maʼmuriyati yigʻin hududida amalga oshirilayotgan kompleks tadbirlar ijrosini nazorat qilish Kitobini yuritadi hamda har bir qilingan ish yuzasidan maʼlumotlar ushbu Kitobga qayd etib boriladi.
Mahalla Kitobi – mahalla ahli turmush tarzini aks ettiruvchi oyna. U tom maʼnoda mahallaning kundaligi – ezgu ishlar, yangi rejalar, muammolarni hal etish yoʻlida taraqqiyot sari qoʻyiladigan qadamlar qaydnomasi. Eng muhimi, tugʻilgan yerga muhabbati baland mahalla ahlining orzu-umidlari bitiladi unga.
Tugʻilgan yering – ota makoning, - deydilar. Ota makoningning qiyofasi bu - sening maʼnaviy qiyofang. Demak, oilamiz ostonasidan boshlanadigan, kindik qonimiz toʻkilgan Vatan tuprogʻini gullab-yashnatish, mahallamizni har jihatdan koʻrkam va obod goʻshaga aylantirish, elu yurtning koʻrki, Ona Vatanning kelajagi boʻlgan yosh avlodni har jihatdan yetuk va barkamol insonlar qilib voyaga yetkazish – har birimizning, burchimizdir. Bu burchga sadoqat oilamizning totuvligida, hayotimizning toʻkisligida, urf-odatlarimizning, maʼnaviy qadriyatlarimizning goʻzalligida, qoʻni-qoʻshni, tugʻishgan-qardoshga mehr-oqibatimizda, hovli va uylarimizning fasadi koʻrkam, koʻcha va guzarlarimizning orastaligida, turmush tarzidan koʻngli toʻq xalqimizning obodon hayotida namoyon boʻladi.
Azizlar, biz sharqona, goʻzal urf-odatlarni oʻz feʼlida mujassam etgan, soʻzida sobit, fikrida mardona Oʻzbekmiz. Bizning xalq hech qachon oʻzganing siltovi, yuqorining buyrugʻi bilan oʻzgarishlar qilishga odatlanmagan. Oilasidan boshlangan goʻzal oʻzgarishni avvalo mahallasiga, keyinchalik mamlakat miqyosiga olib chiqqan, mustaqillikning ezgu gʻoyalariga hamohang turmush tarzini shakllantirgan xalqmiz. Demak, oʻz uyi, mahallasi, kindik qoni tomgan zamin – ona Vatan taraqqiyoti uchun masʼullik tuygʻusi bor ekan, oila – mahalla – Vatan obodligi uchun har lahzada bir ezgu qadam qoʻyiladi. Zotan, obodlik – har birimizning ezgu amalimiz!
Robiya YOʻLDOShEVA,
Allambergan JUMANIYoZOV,
"www.amunews.uz" veb-sayti muxbirlari.
(Foto- http://fikr.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
