Ertaga – tibbiyot xodimlari kuni: XALQ SOFLOM BOʻLSA, EL-YuRT OBOD BOʻLADI

Mamlakatimizda mustaqillik yillarida aholining salomatligini mustahkamlash, mehnatga qobiliyatlilik darajasini oshirish, tibbiy xizmat koʻrsatish madaniyatini yanada yuksaltirish borasida keng koʻlamli ishlar amalga oshirildi. Olib borilayotgan izchil islohotlar natijasida eng olis qishloq joylarda ham namunali tibbiyot maskanlari qad koʻtarib, zamonaviy tibbiyot anjomlari bilan taʼminlandi.

Oʻzbekiston Respublikasi Prezidentining 2017-yil 29 martdagi "Oʻzbekiston Respublikasida birlamchi tibbiy-sanitariya yordami muassasalari faoliyatini tashkil etishni yanada takomillashtirish chora-tadbirlari toʻgʻrisida”gi Qarori esa joylardagi qishloq vrachlik punktlari faoliyatini zamon talablari darajasiga koʻtarish yoʻlidagi ezgu qadam boʻldi. Prezident Qaroriga muvofiq QVPlar faoliyati optimallashtirilib, qishloq oilaviy poliklinikalari tashkil etildi. Chunonchi, bizning tumanimizda faoliyat yuritayotgan qishloq vrachlik punktlari negizida 7 ta, yaʼni Qipchoq ovulida 1-sonli, Doʻrman ovulida 2-sonli, Oq oltin ovulida 3-sonli, Bobur nomli ovulda 4-sonli, Kuyuk koʻpir ovulida 5-sonli, Xitoy ovulida 6-sonli, Qilichboy ovulida 7-sonli qishloq oilaviy poliklinikalari tashkil etilib, Nazarxon ovulidagi Berdaq nomli va "Qangli” ovulidagi "Qangli”  QVPlar saqlab qolindi.

Shunisi eʼtiborga molikki, optimallashgan QVPlar bazasida shifokorlar uchun xizmat uylari tashkil etildi hamda aholiga birlamchi tibbiy yordam koʻrsatish uchun tegishli xonalar ajratilib, zarur tibbiy asbob-anjomlar bilan jihozlandi.

Qishloq oilaviy poliklinikalarining qishloq vrachlik punktlariga nisbatan aholiga tibbiy xizmat koʻrsatish samaradorligini oshirish maqsadida qoʻshimcha ravishda terapevt, pediator akusher-ginekolog, jarroh, UTT jihozi mutaxassisi kabi shtat birliklari tashkil etilib, tor doiradagi mutaxassislarning faoliyati yoʻlga qoʻyildi. Mazkur oilaviy poliklinikalarga oʻzida yetishmaydigan mutaxassislar oʻrnini toʻldirish maqsadida tuman tibbiyot birlashmasi va koʻp tarmoqli poliklinikasi mutaxassis shifokorlari biriktirib qoʻyildi. Natijada avvallari jarroh yoki ginekolog-shifokor koʻrigidan oʻtish yoki UZI apparati tekshiruvdan oʻtish uchun qishloq aholisi tuman markaziga qatnaydigan boʻlsa, endilikda ular qishloq oilaviy poliklinikalari faoliyatidan samarali foydalanish imkoniga ega boʻldilar.

Bugungi kunda tuman koʻp tarmoqli markaziy poliklinikasi, 7 ta qishloq oilaviy poliklinikasi hamda 2 ta qishloq vrachlik punktlari har kuni ertalab soat 8 00dan kechqurungi soat 20 00 gacha xalqimiz salomatligini mustahkamlash yoʻlida faoliyat yuritmoqda.

Aholiga tibbiy xizmat koʻrsatishda "Tez tibbiy yordam” boʻlimining tutgan oʻrni muhim ahamiyat kasb etadi. Ayniqsa, aholi sogʻligiga jiddiy ziyon yetkazuvchi va hayotiga xavf tugʻdiruvchi, yaʼni toʻsatdan kelib chiqadigan kasalliklar hamda surunkali kasalliklar, baxtsiz hodisalar, har xil shikastlanishlar, ovqatdan zaharlanish, homiladorlik, tugʻruq holati sodir boʻlgan vaqtda tez va sifatli, vaqtida tibbiy xizmat koʻrsatish maqsadida "Tez tibbiy yordam” boʻlimida kecha-kunduz barcha yoshdagi bemorlarga tibbiy xizmat koʻrsatish uchun zarur shart-sharoitlar yaratilgan.

Barcha qulayliklarga ega "Tez tibbiy yordam” boʻlimi yangi zamonaviy binoda joylashgan boʻlib, 2017-yilda kosmetik taʼmirdan chiqarildi. Boʻlim tasarrufidagi 7 ta aholiga birlamchi tez tibbiy yordam koʻrsatish shoxobchalari – Berdaq, Qipchoq, "Toʻlqin”, "Oq oltin”, "Oʻzbekiston”, Xitoy hamda Qilichboy shoxobchalari hamda Mangʻit shahridagi 3 ta tez tibbiy yordam koʻrsatish postlari, 1 ta reanimobil brigadasi aholiga namunali tez tibbiy xizmat koʻrsatib kelmoqda.

Aholiga birlamchi tez tibbiy yordam koʻrsatish sifatini yanada yaxshilash maqsadida tuman Tibbiyot birlashmasi tomonidan yangi tibbiy asbob-uskuna, anjomlar va EKG apparatlari olib kelinishi rejalashtirilgan.

Oʻzbekiston Respublikasi Prezidentining 2017-yil 16 martdagi "Shoshilinch tibbiy yordamni yanada takomillashtirish chora-tadbirlari toʻgʻrisida”gi Farmoniga muvofiq, tuman Tibbiyot birlashmasi tomonidan tumanimiz aholisiga tez tibbiy yordam koʻrsatish tizimini yanada yuqori pogʻonaga koʻtarish boʻyicha chora-tadbirlar rejasi ishlab chiqildi. Unga koʻra, tuman Tibbiyot birlashmasi huzuridagi shoshilinch tibbiy yordam boʻlimida oʻrinlar soni 40 taga yetkazildi.

Tumanimizning chekka qishloqlarida faoliyat yuritayotgan qishloq vrachlik punktlari aholi sogʻligini mustahkamlash, turli xil yuqumli kasalliklar kelib chiqishining oldini olishda muhim oʻrin tutadi. Bu borada oʻz faoliyatlarini davom ettirayotgan Nazarxon ovulidagi Berdaq QVP bilan "Qangli” ovulidagi "Qangli” QVPlarning mutaxassis-shifokorlari tomonidan amalga oshirilayotgan ishlar eʼtiborga loyiq. "Qangli” qishloq vrachlik punkti 8184 nafar aholiga xizmat koʻrsatishga moʻljallangan. "Nazarxon” ovulidagi Berdaq QVP esa 4349 nafar aholiga xizmat koʻrsatadi.

Optimallashtirilgan QVPlar bazasida tashkil etilgan qishloq oilaviy poliklinikalari bugungi kunda qishloq aholisi uchun qulay va ishonchli tibbiy xizmat koʻrsatish maskanlariga aylanib ulgurdi.

Tumanimizda faoliyat yuritayotgan 7 ta qishloq oilaviy poliklinikalariga qisqa vaqt, 5 oy davomida 217421 ta qatnov amalga oshirilib, 651 nafar bemorga tuman tibbiyot birlashmasi hamda boshqa tibbiy muassasalarda davolanishlari uchun yoʻllanmalar berildi va 502 nafar bemor shifoxonalarga yotqizildi.

Aholini fizioterapevtik davolash muolajalari orqali sogʻlomlashtirish, bolalarni turli kasalliklarga qarshi emlash ishlari oʻz vaqtida olib borilishida ham qishloq vrachlik punktlari va qishloq oilaviy poliklinikalarining ahamiyati tobora oshib bormoqda. Chet davlatlarda boʻlib qaytgan fuqarolarni zudlik bilan tibbiy koʻrikdan oʻtkazish, agar biron bir kasallik aniqlangan taqdirda ularni sogʻlomlashtirish, reabilitatsiya markazlariga yoʻllanma berish, yoshlarning erta turmush qurishining, yaqin qarindoshlar nikohining oldini olish, oilalarda sogʻlom farzandlar tugʻilishini taʼminlash maqsadida profilaktik tadbirlar olib borish hamda aholining tibbiy madaniyatini yuksaltirish bugungi tibbiyot tizimi mutaxassislari, ayniqsa, qishloq vrachlik punktlari hamda qishloq oilaviy poliklinikalari shifokorlarining muhim vazifasidir.

Chunki xalqimiz sogʻlom boʻlsa, oilalarimiz tinch, oilalarimiz tinch va osoyishta boʻlsa, el-yurt obod, avlodlar barkamol boʻladi.

Fursatdan foydalanib, uzoq yillar el-yurt salomatligi yoʻlida fidoyilik bilan mehnat qilgan barcha faxriylarni, oʻz bilim va tajribalari bilan yoshlarga oʻrnak boʻlib kelayotgan ustoz shifokorlarni va barcha hamkasblarimni 12-noyabr – tibbiyot xodimlari kuni bilan samimiy tabriklayman. Barchalarining  oilalariga totuvlik, sogʻlik va xotirjamlik tilayman.

Kasb bayramingiz qutlugʻ boʻlsin, qadrli salomatlik posbonlari!

Endirboy ABDULLAYeV, 

tuman Tibbiyot birlashmasi boshligʻi, Qoraqalpogʻiston Respublikasida xizmat koʻrsatgan tibbiyot xodimi.