Jayxun ilhomlari

EL OGʻASI

(Amu elining aziz farzandi Rajabboy Yoʻldoshev xotirasiga)

Siz keldingiz rahbar boʻlib joʻshqin Amu boʻyiga,

Sherik boʻlib har doimo xalqning orzu-oʻyiga.

Bosh-qosh boʻlib, el-u yurtning qancha bayram, toʻyiga

Oʻn sakkiz yil obod qilgan, Amudaryo yoqasin,

Hech qachon el unutmaydi, Sizday ulugʻ ogʻasin!

 

Qilichboy ham Doʻrman elda, Xolimbeg tomonlarda,

Izlaringiz qoldi ogʻa, har bogʻda, yovonlarda.

Nafasingiz kezib yurar yurtda otgan tonglarda,

Oʻn sakkiz yil obod qilgan, Amudaryo yoqasin,

Qilichboyliklar unutmaydi, Sizday ulugʻ ogʻasin!

 

Boshladingiz el-u yurtni adolatli yoʻllarga,

Topshirdingiz har sohani eng ishonchli qoʻllarga.

Aylantirib har goʻshani chamanzor-u gulzorga.

Oʻn sakkiz yil obod qilgan, Amudaryo yoqasin,

Doʻrman ovul unutmaydi, Sizday ulugʻ ogʻasin!

 

Kuyuk koʻpir, Xitoy yoqda, nomingiz bor har dilda,

Unutmagay Sizni hech kim Qangli, Qipchoq, «Choykoʻl»da.

Yaxshiliklar aro borsiz, Nazarxon Jumur elda,

Oʻn sakkiz yil obod qilgan, Amudaryo yoqasin,

Amu elim unutmaydi, Sizday ulugʻ ogʻasin!

 

Ot izini toy bosadi, tulporlar omon boʻlsin,

Izlaringiz bosguvchi mard, oʻgʻlonlar omon boʻlsin.

Yosh boʻlsa-da har ishga bosh Sultonlar omon boʻlsin,

Oʻn sakkiz yil obod qilgan, Amudaryo yoqasin,

Mangʻitliklar unutmaydi, Sizday ulugʻ ogʻasin!

 

Qalbimizda mangu borsiz, siz hamisha barhayot,

Elim, yurtim deb yashagan el ogʻasi – ulugʻ zot.

Qilgandingiz har qadamda yangi-yangi islohot,

Oʻn sakkiz yil obod qilgan, Amudaryo yoqasin,

Amudaryom unutmaydi, Sizday ulugʻ ogʻasin!

Shamurod XOʻJANOV.

"Doʻrman” ovuli.

 

Sogʻindim...

(Onajonim, rahmatlik Saparboyeva Xaticha xotirasiga bagʻishlayman)

Hassa ushlab yurgan ayolni koʻrsam,

Sogʻinib eslayman aziz Onamni.

Bosgan izlaridan yurgim keladi,

Onajon, deya suyib opamni.

 

Pand-u nasihatin kanda qilmagan,

Xato qilsam tergab, quloq choʻzmagan.

Oʻzingiz ekansiz suyangan togʻim,

Sajdagohim mening, jannatim, bogʻim.

 

Bir kuni tush koʻrdim, koʻp vaqt oʻtib,

Hoji ona boʻlib kelib uyimga.

«Elingga el boʻlgin, uyingga ustun», –

Deya zarlar sochdi qaddu boʻyimga.

 

Farzandlar ichida mendan soʻradi,

Qurʼon tilovati, fotiha, barin.

Xudodan oʻtinchim, Sizdek Onaga,

Jannatidan bersin joylarning toʻrin.

Shukurullo Yusupov, «Gulzor» mahalla.

 

Yaxshilik qil!

Oʻzgalarga aslo qilma yomonlik,

Axir «qaytar dunyo» – deydilar buni.

Shu dunyoda topay desang omonlik,

Odamlarga yaxshilik qil, har kuni.

 

Oʻzgalarga aslo qilma yomonlik,

Qilgan yomonliging, oʻzingga qaytar.

Ozor bersang agar kimning diliga,

Yaratgan ham senga laʼnatlar aytar.

 

Sendan kechib ketar hatto doʻstlaring,

Sevgan yoring sendan ketar yiroqlab.

Ich-ichingdan yigʻlar yuraging sening,

– «Nega bunday ish qildim?» – deya soʻroqlab.

 

Buni vijdon azobi, deb qoʻyibdi,

Vijdoning qiynalar, har kun, har tongda.

Qiynalib, azobda yonmaslik uchun,

Odamlarga yaxshilik qil har onda!

Iroda Yerdosheva,  38-sonli maktab oʻquvchisi.

 

Otajonim yodi

(Rahmatlik otam, oliy toifali shifokor Habibulla Sherimbetov xotirasiga)

Sizga jannat eshiklari ochilsin,

Poyingizga rayhon, gullar sochilsin.

Allohim dargohi kengdan ochilsin,

Tutgaysiz otajon, hurlarning qoʻlin!

 

Barchani birday hurmat qildingiz,

Ozor cheksangiz ham doim kuldingiz.

Bu dunyoning ishini qilib boʻldingiz,

Endi jannatlarda oromda boʻling!

 

Halollikni mudom shior qildingiz,

Dushmanni ham hatto mehmon qildingiz.

El-u yurtga beminnat xizmat qildingiz,

Endi jannatlarda rohatda boʻling!

 

Bolam, deb suydingiz jon-dilingizdan,

Shifo topdik otam, har soʻzingizdan.

Mehr suvin ichdik biz qoʻlingizdan,

Endi jannatlarda hurmatda boʻling!

 

Otajonim, rozi boʻling bizlardan,

Sizga tortgan barcha oʻgʻil-qizlardan.

Izlaringiz surmai-nur koʻzlarga,

Endi jannatlarning toʻrida boʻling!

 

Matluba qizingiz sogʻinchi bisyor,

Endi bizga boʻlsin doim Alloh yor.

Qolganlar umrini qil deb, baxtiyor,

Dorilbaqolarda hur, ozod boʻling!

Matluba ShERIMBETOVA,

Oʻzbekiston mahallasi.

 

Bobolarni yod Etib

Qalandarlik qonida bor,

Ezgu ishlar unga shior.

Yaxshi koʻz-la qarang, doʻst-yor,

Alisherning avlodiman –

Zulfiyaning izdoshiman.

 

Ijodi olamga doston,

Tan olmoqda butun jahon.

Yozaversam qolmas armon,

Men shoh Bobur avlodiman –

Uvaysiyning izdoshiman.

 

Sheʼrlaridan olib saboq,

Shaklin qilay radif, turoq.

Keng maʼnoli, yoʻqdir soʻroq,

Shoir Choʻlpon avlodiman –

Nodiraning izdoshiman.

Maftuna Qurbonboyeva,

«Choykoʻl» ovuli.

 

Shukur qilib yashaylik

Dildan shukur qilamiz,

Ozod, hur zamon uchun.

Quvonchlarga toʻlamiz,

Osuda osmon uchun.

 

Shunchalar baxtiyormiz,

Rizq-roʻzimiz butundir.

Halol mehnatga yormiz,

Dasturxonlar toʻkindir.

Farida MADAMINOVA,

35-sonli maktab oʻquvchisi.

 

Globallashuv

Globallashuv nima?

Bu – hayot tezlashuvi.

Bu – yaxshi va yomonlik,

Illatlar bellashuvi.

 

Yomonlik illatlari,

Biri bu – terrorizm.

Yonida hamroh turar,

Diniy ekstremizm.

 

Shuning uchun barchamiz,

Ogoh, hushyor boʻlamiz.

Bu illatlar ustidan,

Albat gʻolib boʻlamiz.

Nodirbek Yangiboyev,

35-sonli maktab oʻquvchisi.

 

Amudaryo qiziman

Gʻururlari togʻdek baland,

Imoni but sarvqomat.

Men istiqlol kuychisi,

Amudaryo qiziman.

 

Baxt ufurar yuzimda,

Qalam qosh-u koʻzimda.

Elimning el udumlarin,

Asrayman yuragimda.

 

Shoʻx jilgʻa-yu soylardek,

Pokiza tuygʻularim.

Yurtim, degan tugʻyonman –

Amudaryo qiziman.

Zuhra Ahmedova.

 

TENGDOShLARIMGA

Doʻstlar aytar: akang boʻlsa, boʻlmaydi,

Telefonda gaplashgani qoʻymaydi.

Mening jondan suygan bitta akam bor,

Qani, yana oʻn beshtasi boʻlsaydi...

 

Mana, kirdim oʻn sakkizga bir pasda,

Bir telefon ushlamadim qoʻlimga.

«Akajonim», – deya gapirdim asta, –

«Kitob olib bering, ushbu pulimga».

 

Telefonni nari qiling koʻzimdan,

Ijodkorman, chalgʻitadi soʻzimdan.

Internetni tushunmayman, desam gar,

Baʼzi doʻstlar kulishadi ustimdan.

 

Internetdan, mayli, topay kitobni,

Mayli, oʻqib keragimni olayin.

Uni oʻqib, oʻz kitobim varaqlab,

Bir olam zavq yuragimga solayin.

 

Doʻstlar aytar, tengingni top hozirdan,

Kitobni qoʻy, qolib ketding zamondan.

Akajoning aytganin qilaverma,

Sen boshqa-yu akang boshqa dunyodan.

 

Oʻsha vaqtda ustozlarim sabogʻin,

Birin-ketin yuragimga solaman.

Men oʻzbek qiziman, erka va shodon,

Akamning eng suyukli singlisiman.

 

Ibo-hayo boʻlsa agar har kimda,

Oʻsha asl Oʻzbekiston qizidir.

Oʻz akasin jondan suygan oyqizlar,

Mahallaning ham obroʻsi, yuzidir.

 

Kun keladi, ketaman yor-yor bilan,

Oʻzga uyning ostonasin oʻpaman.

Baxtim shu yer, taxtim shu yer boʻladi,

Oʻz onamni mehmon qilib kutaman.

 

Yurak sezar, hali koʻp sogʻinaman,

Ota uyning har bir qarich tuprogʻin.

Va tuprogʻin koʻzlarimga surtaman,

Kindik qonim tomgan asl qoʻrgʻonim.

 

Yoddan chiqmas, jajji-jajji qizlarga,

Oʻyin bilan darslar oʻtib berganim.

Yuragimga bir iliqlik baxsh etar,

Singlim sochin mayda qilib oʻrganim.

 

Va albatta sogʻinaman akamni,

U Zafarjon akam – yaqin insonim.

Oʻzga uyga kuzatuvchi ham oʻsha,

Oʻz uyimni yorituvchi chirogʻim.

 

Koʻnglingizga ogʻir olmang hech qizlar,

Aka-uka qadriga siz yetinglar!

Dildora RAJABOVA.

 

SAYR

«Mangu sayyoh» – qora bulutlar,

Tugʻib oldi homilasini.

Yomgʻirlarda koʻngil yuvaman,

Eshitaman shamol sasini.

 

Tabiatning nolalarini

Tinglayapman shu bugun faqat.

Bulutlarning qismati esa,

Sayr etmoq abad-ul abad.

Siroj OLIMOV.

 

DOʻSTIMGA

Yiqilsang-da, oʻrningdan tur,

Taslim boʻlma, oldinga yur.

Bunday yoʻllar hali ancha,

Yurmaganing bilmam, qancha?!

 

Bu yoʻllardan yurmoq uchun,

Sabr kerak, kerak bardosh.

Manzilingga yetmoq uchun,

Tezroq yurgin, boʻlaqol, shosh!

Salomat KARIMOVA.