MEHNAT ZAFARINGIZ MUBORAK, AZIZ PAXTAKORLAR!

Dehqonning har bir kuni ish mashaqqati va mehnat zavqi bilan oʻtadi. Ammo, yilda ikki kun borki, uning quvonchi va hayajoni oʻzgacha. Biri – yerga urugʻ qadagan kuni boʻlsa, yana biri – mehnatining mevasi xirmonga toʻplangan palla. Bugun – 2017-yilning 4-oktyabr kuni tumanimiz fermerlari uchun ana shunday quvonchli kun. Paxtakorlarimiz 27 ish kunida davlatga paxta sotish boʻyicha shartnomaviy rejalarini ortigʻi bilan bajardilar. Omilkor fermerlarimizning ishbilarmonligi, koʻp yillik boy tajribaga ega dehqonlarimizning peshona teri, mehnatsevar pudratchilar va qiyin-qistovli kunlarda ularga yordamga kelgan fidoyi hasharchilarning hamjihatlikdagi harakatlari natijasida 32715 tonnalik yuksak "oq oltin” xirmoni boʻy tikladi. Yetishtirilgan paxta hosili yuqori navlarga sotildi.

Albatta, hech bir zafar oʻz-oʻzidan yoki tasodifiy kelmaydi. Paxtachilikdagi bu mehnat gʻalabasi davlatimiz tomonidan yer egalari uchun yaratib berilayotgan sharoitlarning mevasidir. Bundan ancha yillar oldin Birinchi Prezidentimiz tashabbusi bilan mamlakatimizda fermerlik faoliyatining yoʻlga qoʻyilishi ana shu sharoitlarning eng asosiysi boʻldi. Muhtaram Prezidentimiz Sh.Mirziyoyev boshchiligida bank-moliya sohasi, tabiiy va moddiy resurslar, texnika taʼminoti borasida oʻziga xos tizim yaratilgani fermerlarimizni yanada samarali ishlashga undamoqda.

Joriy yil erta bahordan 15850 gektarmaydonga S-47-27, "Buxoro-102”"Sulton”, "Buxoro-8 kabi navlardagi chigit qadagan dehqonlarimiz qulay ob-havo sharoiti hamda ekish ishlarining oʻz vaqtida, sifatli oʻtkazilishi natijasida dalalardan toʻliq nihol olishga erishdilar. Yer bilan tillashadigan dehqonlarimiz gʻoʻza nihollarini yaganalash, begona oʻtlardan tozalash, qator oralariga ishlov berish, sugʻorish va sespenziya, oziqlantirish, chilpish, defoliyatsiya kabi agrotexnik tadbirlarni ham aʼlo darajada amalga oshirdilar. Natijada dalalarimizda koʻzni quvontirgulik moʻl hosil toʻplandi.

Bu yilgi paxta yigʻim-terimi mavsumiga puxta tayyorgarlik koʻrildi. Mehnat unumdorligi va ish sifati birinchi navbatda ishchilar uchun yaratilgan qulay ish sharoiti va ularning salomatligi, moddiy va maʼnaviy manfaatdorligiga bogʻliq. Shu sababli ham joriy yilgi terim mavsumida terimchilarning ijtimoiy muhofazasi, ularga munosib mehnat sharoiti yaratish masalalari katta eʼtibor qaratildi.

Hasharchilar uchun dala boshida issiq ovqat tashkil qilinib, tuman madaniyat boʻlimi sanʼatkorlari ularning dam olish paytida madaniy hordiq chiqarishlari uchun xizmatda boʻldi. Terilgan paxtalar kuniga 2 mahal oʻlchab olinib, terimchilarga mavsum boshidan beri jami 14,8 mlrd soʻmdan ortiq naqd pullar bank xodimlari tomonidan dala boshida tarqatildi. Shu kungacha topshirilgan paxta hisobidan fermerlarimizning 60,2 milliard soʻmdan ortiq daromad koʻrishi ularning oʻz mehnatidan moddiy manfaatdorligini oshirdi.

Tuman boʻyicha 306 ta terim otryadlariga birlashgan fermer xoʻjaligi ishchilari va pudratchilar, ularga yordam berish maqsadida hasharga chiqqan xoʻjalik hisobidagi korxona, muassasa va tashkilotlarning ishchi-xizmatchilari, ovul va mahallalarning uyushmagan aholisi, "Fidoyi yoshlar otryadi” aʼzolaridan iborat jami 28 715 nafar terimchilarning ogʻzibirchilikda qilgan mehnati samarasi sifatida bugungi yuksak xirmon yaratildi.

Terilgan paxtani tayyorlov punktlariga oʻz vaqtida yetkazib berishni taʼminlash maqsadida zarur texnika vositalari jalb etildi. Terimda yonilgʻi mahsulotlari taʼminotida uzilish boʻlmasligi uchun kerakli darajada zaxira yaratildi. Shuningdek, yonilgʻi-moylash mahsulotlarini bevosita dalaning oʻziga yetkazib berish uchun yonilgʻi tarqatish agregatlari ishga toʻliq shay qilib qoʻyildi. Baxtsiz xodisalar sodir boʻlishining oldini olish maqsadida yongʻin va texnika xavfsizligi boʻyicha zarur choralar koʻrildi.

Albatta, yetishtirilgan va yigʻib-terib olingan paxta xomashyosini qabul qilish va saqlash jarayonida tezkorlik va aniqlik muhim ahamiyatga ega. "Amudaryo paxta tozalash” aktsiyadorlik jamiyati va joylardagi tayyorlov maskanlarida paxtani qabul qilishdan tortib uni saqlash, qayta ishlash va sotishgacha boʻlgan barcha jarayonlarga zamonaviy axborot-kommunikatsiya texnologiyalari asosida elektron hisobot va nazorat tizimi joriy qilingani bu borada muhim ahamiyat kasb etdi. Paxtaning elektron tarozilarda tortilgani uni oʻlchash vaqtining kamayishiga, aniqligining oshishiga va bu borada ochiqlik taʼminlanishiga xizmat qildi. Paxta tozalash korxonasi huzurida monitoring markazlari faoliyatini yoʻlga qoʻyilgani esa fermer xoʻjaliklari, taʼminotchi, tayyorlovchi va xizmat koʻrsatuvchi korxonalar, soliq inspektsiyasi hamda paxta tozalash korxonasi oʻrtasidagi hisob-kitob va toʻlov tizimini soddalashtirish, paxta va gʻalla maydonlarida belgilangan agrotexnik tadbirlarning oʻz vaqtida, sifatli bajarilishini nazorat qilishga yordam bermoqda.

Hasharchilarni ragʻbatlantirish va ruhlantirish maqsadida mavsum davomida ilgʻor terimchilarga Qoraqalpogʻiston Respublikasi Joʻqorgʻi Kengesi, Vazirlar Kengashi, tuman hokimligi va qator davlat, jamoat tashkilotlarining qimmatbaho sovgʻalari topshirildi.

 "Oq oltin”ning har bir tolasi – boylik. U ertaga qayta ishlanib, eksport qilinsa yoki oʻzimizda undan tayyor mahsulot ishlab chiqarilsa, eng avvalo davlatimiz byudjetining yuksalishiga, qolaversa el-yurt farovonligiga hissa boʻlib qoʻshiladi. Buni yaxshi tushungan tumanimiz paxtakorlari faqat shartnomani bajarish bilan cheklanib qolmay, daladagi hosilni soʻnggi misqoligacha yigʻib-terib olishni niyat qilganlar.

Fursatdan foydalanib, halol mehnatni umrining mazmuni, vatan taraqqiyotiga hissa qoʻshishni hayotining bosh shiori deb bilgan amudaryolik barcha paxtakorlarni, dehqon va fermerlarni, hasharchi va yordamchilarni bugungi yuksak mehnat zafari bilan tabriklaymiz! Halol mehnatingizning rohatini koʻring, aziz paxtakorlar!

Sultonboy YOʻLDAShEV,

tuman hokimi.