AYoLLAR HAMIShA FAOL

Mustaqillik yillarida amalga oshirilayotgan islohotlar zamirida avvalo inson manfaati, oilalar tinchligi, xotin-qizlarning ijtimoiy-maʼnaviy, siyosiy va tibbiy madaniyatini oshirish, mahallada ijtimoiy-maʼnaviy muhit barqarorligini saqlash, oʻsib kelayotgan yosh avlodni ayniqsa, xotin-qizlarni sportga keng jalb qilishdek ezgu maqsadlar mujassam. Tuman xotin-qizlar qoʻmitasi tashabbusi bilan 2013-yil 2-mart kuni Xalqaro xotin-qizlar kuniga bagʻishlab oʻtkazilgan "Ayol oila koʻrki” deb nomlangan tadbir koʻpchilikka manzur boʻldi. Tuman madaniyat uyida boʻlib oʻtgan bu tanlovga kelganlar madaniy hordiq chiqarish bilan bir qatorda oʻzlariga kerakli bilim va koʻnikmalarini oshirdilar. Ayniqsa, qatnashuvchilar tomonidan sahnada ijro etilgan alla yangraganda zal suv sepganday jim-jit boʻlib qoldi. Sahna koʻrinishlari ham tomoshabinlarga juda manzur boʻldi. 2013-yil 4-mart kuni Nukus Davlat pedagogika instituti qoshidagi 3-sonli Amudaryo akademik litseyida boʻlib oʻtgan "Sogʻ tanda - sogʻ aql” deb nomlangan anʼanaviy xotin-qizlar sport musobaqasi ham juda qiziqarli oʻtdi. Bu tanlovda tuman tibbiyot birlashmasi, maktab oʻqituvchilari hamda tuman mahallalarining diniy maʼrifat va maʼnaviy ahloqiy tarbiya masalalari boʻyicha maslahatchilaridan tuzilgan jamoalar ishtirok etdilar.

Bahor bayramlarini har birimiz koʻtarinki kayfiyatlar bilan oʻtkazdik. Navroʻz bayrami arafasida menga Oʻzbekiston "Mahalla” xayriya jamoat fondi Respublika boʻlimi boshqaruvi raisi M.Ahmedov yaxshi ishlarimni eʼtirof etib "Faxriy yorliq”topshirdi. Bundan koʻnglim togʻday koʻtarildi. Yanada dadillik va shijoat bilan ishga kirishdim.

Ayni kunlarda mahallamiz hududini yanada obodonlashtirish, hasharlar uyushtirish, bu ishlarda butun mahallamiz ahlining faol ishtirokini taʼminlashga intilayapmiz. Chunki, mahallamiz – oʻz uyimiz, xonadonimiz, ulugʻ mamlakatimizning qutlugʻ ostonasi. Ostonamizdan boshlanadigan Vatan tuprogʻini gullatish esa barchamizning burchimizdir.

Momojon RAHIMOVA,