Jayxun ilhomlari

KITOBGA YuZ BOSIB

Bu dunyoda javohir koʻp, teray desang,

Umrni bandi aylar xoʻb havas bersang.

Biroq bir gapga mehring toʻk, aziz farzand,

Kitobdan katta boylik yoʻq, qadim aytgan!

Kitob – gavhar, soʻzi boʻlgay saboq har chogʻ,

Shami oʻchmas ziyo bedogʻ, zehn-la boq.

Anga befarq yashar boʻlsang demaslar sogʻ,

Ani doʻst tanlasang kunlar oʻtur oppoq!

Bilim koni – quyosh uldir, quruq qoʻymas,

Elim ilmiga bosh shuldir, senam boʻylash.

Berib ishqing qushin qoʻndir, sevib soʻylash,

Betiga yuz bosib tiz choʻk, chuqur oʻylash!

Jumaboy HIDOYaTOV.

Aqlim hayron

Soch oʻstirmay qoʻydi qarang, qalamqoshlar,

Aqlim hayron: bu qandayin zamon boʻldi?

Bir gap aytay, ming afsuski, zamondoshlar,

Yer supurgan sochlar bizga armon boʻldi.

Ertaklarda qolmish endi uzun sochlar,

Momolardan qolgan meros oyoqosti.

Soch yelkadan oʻtdi tamom, kesib tashlar,

Gul qizlarning yelkalarin shayton bosdi.

Tarixlardan soʻz ochsamki, tilim kuyar,

Qoʻzgʻagum yoʻq Momohavo gʻazabini.

Koʻrmoqlikka or etib, oʻz koʻzin oʻyar,

Qargʻamasin deyman nasl-nasabini.

Qora zulfi  har bir qizga koʻrk emasmi,

Yo shunchalik bezdimikan kokillardan.

Koʻrgan kishi momolaring kim demasmi,

Kechdimikan or atalmish sohillardan?

Men bir shoir koʻnglimdagi borim aytdim,

Sochim bilan ne ishing bor, demang qizlar.

Bu safar-ku shu joyida tugar baytim,

Yana yozgum, yana sochni kessangizlar.

Komronbek Kamol,

M.Yusuf nomidagi jamoat fondi tomonidan oʻtkazilgan «Yosh ijodkorlar» festivalining Oʻzbekiston

Respublikasi boʻyicha gʻolibi.

Oʻzbekiston

Men seni sevaman, ey Oʻzbekiston,

Har bir goʻshang boʻlsin bogʻ-u guliston.

Bayrogʻing koʻtargan fidoyilaring,

Madhingni aylaydi dunyoga doston!

Harbiylar tayyordir boʻlmoq-chun fido

Bobolar tilida shukrona, duo.

Ajdodlarim qoldirgan tarixdan sado,

Ulugʻvor maskanim – Oʻzbekistonim!

Bulbullar sayraydi bogʻlaring aro,

Gullaring yashnaydi chamanzor aro.

Farzanding omondir tinchliging ila,

Olam ichra yagona Oʻzbekistonim.

Jannatim, jahonim, mening Vatanim,

Alloh nazar solgan Oʻzbekistonim.

Soʻnggi nafasgacha boʻlmasman ayro,

Senga jonim fido, senga jon fido.

Manzura Eshimova.

Asl farzand el deb turajak

Oʻgʻlonlari qalqon bu yurtning

Kelajagi porloq boʻlajak.

Atlas doʻppi kiygan qizlarga

Butun dunyo havas qilajak.

Ajdodlari ulugʻ elimda

Avlodlari davom boʻlajak.

Erkinlikdan kamar belinda,

Xalqim dunyo tursa, turajak.

Qarilari ochgan qoʻllardan,

Duolardan nur yogʻilajak.

Obod turmush, porloq yoʻllari -

Chorlab turar yorqin kelajak.

Senda jilov, senda bor imkon,

Asl farzand el, deb turajak.

Vatan ozod, musaffo osmon -

Qaldirgʻochlar javlon urajak!

Oxunjon ABDULLAEV,

QDU oʻzbek filologiyasi fa-kulteti 3-bosqich talabasi.

Diydor zavqi

Mana, yana uchrashib,

Diydorimizga toʻydik.

Koʻrgach, bir-birimizni,

Dardni unutib qoʻydik.

Yana hazil-huzullar,

Boshlanadi, kulamiz.

Ammo bu daqiqalar,

Qaytmasligin bilamiz.

Istaymiz, yana-yana,

Diydor koʻrishmoqlikni.

Maktab davridagi,

Yolgʻon urushmoqlikni.

Garchi bebosh, shaddodmiz,

Unutmaymiz sinfdosh!

Unutib boʻlarkanmi,

Axir qalam-qoshlarni!

Maftuna RAHIMOVA, 16-sonli maktab oʻquvchisi.

DASTURXON

Uyga kelganda mehmon,

Oyim yozar dasturxon.

Dasturxonning ustida,

Doim turar shirmoy non.

Dasturxonda neʼmatlar,

Chiroy berar, koʻrk berar.

Bularni yaratguncha,

Qancha inson ter toʻkar.

Dasturxon toʻkin-sochin,

El-yurt yashar farovon.

Serfayz dasturxonlarim,

Koʻrib hayratda jahon.

Shahlo QUROLOVA, 62-sonli maktab oʻquvchisi.

Abror polvon boʻladi

Qoʻshnimiz chaqalogʻi –

Barchaning erkatoyi.

Soʻzlasang tushunganday,

Kulaverar quyoshday.

Ismidir uning Abror,

Maʼnosidir pokdomon.

Ota-onang baxtiga,

Boʻlgin doimo omon!

Erkalatar bobosi,

Davomchi avlodim, deb.

Quvonadi buvisi,

Qoʻlidan qoʻymaydi hech.

Begʻuborsan shoʻx-shodon,

Sen bilan dillar obod.

Nurafshondir xonadon,

Oilani quchgan baxt.

Kelajakda sen botir,

Pahlavon oʻgʻlon boʻlgin.

Har ishda yurtga suyanch,

Va mard-u maydon boʻlgin!

Yulduz MADADOVA, 44-sonli maktab oʻquvchisi.

BAXT

Men baxtni qaydan izlayin,

Osmondanmi yoki yerdanmi?

Tutqich bermas qayon kezmayin,

Niyatimni baxt sezganmi?

Baxtni koʻrgan bormi, insonlar,

Tasvirlangiz, uning suratin?

Men bir bora toʻqnashgan onlar,

Bilib olar edim siyratin.

Men soʻradim bir kuni oydan,

Baxt nimadir oʻzi dunyoda?

Baxt shudir, sening uchun kim,

Borligingga aytsa shukrona.

Sevara Sidabullayeva.

Sogʻinch

Onajonim mehribonim,

Siz mening yagonamsiz.

Sizni juda sevaman,

Mehrda durdonamsiz.

Sizni mudom sogʻinib,

Har kun oyga qarayman.

Oy yuzida koʻray deb,

Nomingiz takrorlayman.

Xolida TOJIMURODOVA, 40-sonli maktab oʻquvchisi.