Jayxun ilhomlari

Yaxshi doʻstlar suhbati...

Yaxshi doʻstlar suhbati joningga rohat keltirur,

Tashrifi qutlugʻ qadam, uyga farogʻat keltirur.

Yaxshi doʻsting bormi, bil – bu Alloh inʼomidir,

Loyiq doʻst boʻlsang agar, poyingga jannat keltirur.

Doʻst boʻlish oson, uni saqlash qiyinroq, deydilar,

Yaxshi doʻstdan ayrilish, beshak nadomat keltirur.

Yangi narsa yaxshi, lekin doʻst eskisi yaxshidir,

U bilan diling ravshan, ishingda omad keltirur.

Biror ayb sezib, darhol minma sen gʻazab otiga,

Yaxshi kunni boshingga sabr ila toqat keltirur.

Sodiq doʻstlar bilan masrur Ahmad doim diliga,

Shukronalik fikrini har kun, har soat keltirur.

A.Nafasov.

JONIMNING PARChASI

(«Taraqqiyot koʻzgusi»ga)

Jonimning parchasi hisobinda – sen,

Qonimning anchasi qoningga qardosh.

Umrimning unumli yumushinda – sen,

Har safar yoʻl cheksam, yulduzsan, darddosh.

Yo oyday ziyosan, aziz Matbuot.

Oftobga qiyossan, otashin hayot!

Avjlaringga eshlik oshufta etdi,

Qoʻlimdan tutganda sendagi gʻayrat!

Qalamim koʻrk ochib, kamolga yetdi,

Yozmoqqa undadi yashovchan Soʻzing!

Yasharman, yozgani yoʻl bergan Najot –

Sadoqat senga, deb aziz Matbuot!

Zamonam zavqi bor, bor boʻl davomli,

Bogʻlarning bagʻrida bayon qil baxtni.

Men yoʻldosh yurayin, sendan ilhomli,

Buzmasdan qalamkash nom olgan ahdni!

Nom bergan, non bergan laziz Matbuot,

Jonimning parchasi – aziz Matbuot!

Jumaboy HIDOYaTOV.

Yo, RAMAZON!

«Yo, Ramazon!» koʻp aytganmiz eshiklarda,

Talashishib qizlar bilan bolalikda.

Ahil edik Saodat-u Muhabbatlar,

Tun yulduzi charaqlagan bir qishloqda.

Qoʻshnilarga, xolalarga, ammalarga,

Qalbdan joʻshib kuylaganmiz «Yo, Ramazon!».

Oy-yulduzlar gʻujgʻon oʻynab samolarda,

Tilaklardan toʻkilardi gul-u rayhon!

Chang koʻchalar aro qolgan mening izim –

Qizlar bilan chopayotgan bolaligim.

Sochlar uzun, oʻrim-oʻrim belimizda,

Chirmashadi qirqta kokil boʻyimizga.

Ezgulikning izlaridan chopib oʻtdik,

Jarang sochib kulgularda, qoʻshiqlarda.

Pok tuygʻular ogʻushiga singib ketdik,

«Yo, Ramazon!» aytib oʻtgan eshiklarda.

Zuhra Ahmedova.

Tinchlik vodiysi

Chechaklar gul boʻlib unmoqda bu kun,

Orzular ushalgan, chehralar gulgun.

Yurtim tinchligidan begʻam bu koʻnglim,

Tinchlik vodiysida yashaymiz, doʻstim!

Dehqonning qoʻlida doimo ketmon,

Nonvoyning tandiri toʻla shirmoy non.

Yoshlarin yoʻllari erur nurafshon,

Bu yurtda azizdir, azizdir inson!

Boshida porlaydi baxtning quyoshi,

Kuchlilik, adolat, yurt yelkadoshi.

Tinchlik hadya etgan odil Yurtboshi,

Barkamol avloddir, xalqning izdoshi!

Muqaddas Matkarimova, 37-sonli maktab oʻquvchisi.

«Kalla urish» – salommi?

(Tengdoshlarga va kattalarga)

«Assalom-u alaykum!» degan soʻzda sehr bor,

Oʻzbekning salomida dunyolarcha mehr bor.

Ming afsuski, bugunning salomi oʻzgarmoqda,

Kalla urib koʻrishish rosa «moda» boʻlmoqda.

Quchoq ochib koʻrishmoq endi urfdan qoldimi,

Ming yillik qadriyatlar oyoqosti boʻldimi?

Oʻylab koʻring, odamga kalla urish xosmidi,

Biz – oʻzbeklar avlodiga qoʻchqor ishi mosmidi?

Nechun bizlar bu ishni odat qilib olganmiz?

Bizlar axir qoʻy emas, bizlar axir odammiz...

«Assalom-u alaykum!», degan soʻzda sehr bor,

Oʻzbekning salomida dunyolarcha mehr  bor...

Begzod ALLAQULOV.

BAXTIM – OTA-ONAM

Koʻkda oy, quyoshimsiz,

Mening chin sirdoshimsiz.

Bosh egib taʼzim aylay,

Yuzdan oshsin yoshingiz.

Menga hayot berdingiz,

"Aqlli boʻl”, dedingiz.

Mehnat bilan, mehr bilan,

Rizqimizni terdingiz.

Hech narsaga alishgusiz,

Boyligim ota-onam.

Umr tilayman doim,

Siz-chun yaralgan olam.

Siz-la goʻzal har bir onim,

Qarab toʻymas koʻzlarim.

Men uchun bu dunyoda,

Sizlar aziz har doim.

Dinora KARIMBOYeVA, Amudaryo akademik litseyi oʻquvchisi.

Oʻzbegim polvonlari

Ona Vatan tayanchi,

Ham faxri va quvonchi.

Kuch-qudrati, suyanchi –

Oʻzbegim polvonlari!

Pahlavon Mahmud bobom,

Bergaydir kuch va ilhom.

Sizdadir yengilmas qon,

Oʻzbegim polvonlari!

Siz maydon tushgan zamon,

Havas-la boqar jahon.

Faxr etar Oʻzbekiston,

Yengilmas polvonlarim!

Maftuna MURODOVA.

Onamning duosi

Onamning duosi meni asraydi,

Duolarida bor mehr quyoshi.

Kimning onasi bor, u qarimaydi,

Qalbin bezab turar mehr ziyosi.

Onamning borligi mening baxtimdir,

Hayotim mazmunli, yoʻllarim ravon.

Umrim bezagi u, buyuk taxtimdir,

Kunlarim fayzli, goʻzal keng jahon.

Har tong duo qilar, unib-oʻsgin, deb,

Boshimni silaydi haroratli qoʻl.

Shu mehr umrimga berib turar zeb,

Men uchun osondir mashaqqatli yoʻl.

Maftuna YOʻLDOShEVA.

Non

Mehnat qilib buvijonim,

Uyar bugʻdoy xirmonni.

Buvijonim va onam,

Yoparlar shirmoy nonni.

Buvim der: «qizalogʻim,

Nonni hech isrof qilma.

Ushogʻi ham azizdir,

Shuni hech ham unutma».

Dasturxonning bezagi,

Doim boʻlib turar non.

Mehmon kelgan chogʻda ham,

Non tutiladi har on!

Shahlo QUROLOVA.

     Yurtim

Yurtim, sening bogʻing oʻzgacha,

Nurli har chamaning oʻzgacha.

Gullaringga qarab toʻymayman,

Osmoning ham keng erur shuncha!

Suvlaring sof, tiniq samolar,

Koʻngillarga malham havolar.

Ona tilimdagi navolar,

Kuch bagʻishlar dilga, oʻzgacha!

Guzal KARIMOVA, 41-sonli maktab oʻquvchisi.

Quyosh

Tong sahardan chiqsam,

Nurlaringni sochasan.

Bahor kelganda kulib,

Quchogʻingni ochasan.

Tunda qayga ketasan,

Tongda qaydan qaytasan?

Hech yoʻling oʻzgarmaydi,

Sharqdan Gʻarbga botasan.

Jamshid Qoʻshchanov,

5-sonli maktab oʻquvchisi.

Kitob

Kitob - bebaho boylik,

Kitobni qadrlaylik.

Bilsangiz, u baxtimiz,

Boyligimiz, taxtimiz.

Varaqlasak - ilmi koʻp,

Ezgu, yorugʻ yoʻli koʻp.

Tashvishlarga qalashsak,

Yoʻl koʻrsatar adashsak.

Gulxumor Hayitboyeva.