IQTISODIY FAOLIYaT YuRITISh VA MULKDOR BOʻLISh QONUN HIMOYaSIDA

Mustaqillik yillarida mamlakatimizda barcha sohalarda olib borilgan islohotlar natijasida hamda xalqimizning mashaqqatli va fidoyi mehnatlari

hisobidan erishilayotgan yutuq va marralarni bugun butun dunyo tan olmoqda.

Istiqlolning dastlabki yillaridan mamlakatimiz iqtisodiyotini rivojlantirishga alohida eʼtibor berilgani bugungi toʻkin va farovon hayotimizning asosi boʻldi. Bunda Konstitutsiyamizda har bir shaxsning mulkdor boʻlishi, erkin kasb tanlashi, munosib mehnat sharoitlarida ishlashi, oʻzi istagan iqtisodiy faoliyat turi bilan shugʻullanish huquqi kafolatlangani bosh omil boʻldi.

Xususan, Bosh Qomusimizning 53-moddasida: "Bozor munosabatlarini rivojlantirishga qaratilgan Oʻzbekiston iqtisodiyotining negizini xilma-xil shakllardagi mulk tashkil etadi. Davlat isteʼmolchilarning huquqi ustunligini hisobga olib, iqtisodiy faoliyat, tadbirkorlik va mehnat qilish erkinligini, barcha mulk shakllarining teng huquqliligini va huquqiy jihatdan bab-baravar muhofaza etilishini kafolatlaydi.

Xususiy mulk boshqa mulk shakllari kabi daxlsiz va davlat himoyasidadir. Mulkdor faqat qonunda nazarda tutilgan hollarda va tartibdagina mulkidan mahrum etilishi mumkin”, – deyilgan.

Bu mustahkam huquqiy asos mamlakatimizda turli sohalarda tadbirkorlikning rivojlanishiga va fuqarolarning yuqori daromad olib, mulkini koʻpaytirishiga sharoit yaratmoqda. Axir Asosiy Qonunimizning 36-moddasiga muvofiq: "Har bir shaxs mulkdor boʻlishga haqli. Bankka qoʻyilgan omonatlar sir tutilishi, meros huquqi qonun bilan kafolatlanadi”.

Xulosa qilib aytganda, yurtimizda amalga oshirilayotgan iqtisodiy islohotlar, Konstitutsiyamiz va shuningdek, qabul qilinayotgan yangi Qonunlar mamlakatimiz fuqarolarining munosib yashash, mehnat qilish, tadbirkorlik faoliyati bilan shugʻullanish va mulkdor boʻlishdek demokratik huquqlarini taʼminlashga xizmat qilmoqda.

Muborak PRIMBETOVA, tuman FHDYo boʻlimi inspektori.

(Foto - http://www.uza.uz)