TURMUSh TARZIMIZ SOGʻLOM, NIYaTLARIMIZ POK BOʻLSIN...

Bundan ikki-uch oycha ilgari markaziy televidaniyada bir koʻrsatuv berildi. Unda badavlat oilaning yolgʻiz oʻgʻlini giyohvandlar ming bir aldov  bilan oʻzlariga sherik qilib olishadi. Hademay zararli ogʻuga mutʼe boʻlib qolgan oʻgʻli uyidan yashirincha pul olayotganini sezib qolgan ona qarshilik qilganida bir siltanib chiqib ketgan oʻgʻil ikki kun daraksiz ketadi. Qaytib kelganida esa... otasi eshikda, boshida doʻppi, belini bogʻlab qarindoshlari qurshovida turganini koʻradi. Ona... bechora ona oʻgʻlining qoʻlidagi pulga "buni sening toʻyingga deb yiqqanman, bolam”, deb yopishganida oʻgʻlining siltab tashlaganida boshidan ogʻir lat yeb bir kundan soʻng kasalxonada hayotdan koʻz yumgan edi. Nokas oʻgʻil yolgʻizim deb yeru-koʻkka ishonmay, avaylab voyaga yetkazgan onasining oʻsha zahri qotilni deb oʻlimiga sababchi boʻldi. Bundan ham dahshatlisi onasi mehri ogʻushida tashvishsiz ulgʻaygan oʻgʻil ganggib qolib, uch kundan soʻng onasi qabri yonidagi daraxtga oʻzini osib qoʻydi. Ehtimol, bunda badiiy toʻqima ham bordir? Biroq, aziz zamondoshim, siz-u biz giyohvandlik tufayli sodir boʻlayotgan bundan-da ogʻir va ayanchli voqealarini eshitib, koʻrib yuribmiz.

Dunyo mamlakatlari tibbiyoti deyarli barcha xastaliklarga, hatto chorasiz, deya taʼriflanib kelgan saraton kasalligiga ham (agar boshlangʻich davrida boʻlsa) chora topishayotgan bugungi tezkor zamonamizda afsuski tobora kengayib va yasharib borayotgan giyohvandlik oldida ilojsiz qolmoqda. Chunki bu yoʻlni har kim ixtiyoriy tanlaydi, undan qutulish ham ogʻir va har kimning oʻziga bogʻliq.

26-iyun sanasi butun dunyoda giyohvandlikka qarshi kurash kuni deb belgilangan va shu maqsadda koʻplab tadbirlar amalga oshiriladi. Umuman bu zararli illatga qarshi kurash  yil mobaynida ham susaytirilmaydi. Mamlakatimizda, shu jumladan tumanimizda ham kishini tubanlikka eltuvchi yoʻl – giyohvandlikning oldini olish, yoshlarni bu ogʻu girdobiga tushib qolishdan ogoh etuvchi koʻplab tadbirlar, davra suhbatlari amalga oshirilmoqda. Koʻpgina yoshlar anjumanlari, sport musobaqalari "Biz giyohvandlikka qarshimiz” shiori ostida oʻtkazilmoqda.

"Salomatlik markazi” tomonidan shu yilning oʻtgan davri mobaynida giyohvandlikning zararli oqibati haqida, bu mashʼum girdob domiga tushib qolishdan ogoh etish maqsadida tuman xotin-qizlar qoʻmitasi, "Kamolot” YoIH tuman Kengashi va "Mahalla” xayriya jamoat fondi tuman boʻlinmasi bilan hamkorlikda tumanimizda 168 ta turli tadbirlar oʻtkazildi. Shuning 88 tasi mahallalarda, 38 tasi litsey va kollejlarda, 42 tasi umumtaʼlim maktablarida oʻtkazildi.

Giyohvand modda qabul qilish insonni insonligidan marhum qiladi. U oilasida ham, jamiyatimizda ham oʻz fuqarolik burchini ado etish u yoqda tursin, hatto his qila olmaydi ham. Ham aqlan,  ham jismonan zaiflashadi. Shuning uchun  giyohvandlik tarqalishining oldini olish maqsadida BMT huzurida giyohvandlik va jinoyatchilikka qarshi kurashish xalqaro hayʼati tashkil etilgan va yagona harakat dasturi ishlab chiqilib, shu asosda kurash olib borilmoqda.

Ha, chegara, hudud tanlamaydigan bu vaboning tarqalish xavfi butun dunyoni tashvishga solayotir. Unga qarshi kurash choralari esa oʻz qoʻlimizda ekanligini aslo unutmasligimiz lozim. Bilimli maʼnaviyatli, irodali va sogʻlom boʻlib, ulgʻaygan farzandlarimiz birovning qutqusiga uchmaydi, nopok yoʻllarga kirmaydi. Ularga bu hayotda kimki ne muddaosiga erishgan boʻlsa, buning tub asosi – sogʻlom turmush tarzi, pok niyatlar ekanligini har daqiqada uqtirib turishimiz lozim.

Oygul RAJABOVA.  

(Foto - http://insonvaqonun.uz)