2017-2021-yillarda qishloq joylarda yangilangan namunaviy loyihalar boʻyicha arzon uy-joylar qurish dasturi toʻgʻrisida

Keyingi yillarda qishloq joylarda aholi uchun namunaviy loyihalar asosida yakka tartibdagi uy-joylar qurish boʻyicha keng koʻlamli ishlar amalga oshirilganligi qayd etilsin. Faqat 2009-2016-yillar davrida qishloq joylarda 1308 turar joy massivida umumiy maydoni 9 573 ming kvadrat metr boʻlgan 69 557 ta shinam uy-joy qurildi. Qishloqlardagi 83,5 mingdan ortiq oilaning yashash sharoiti yaxshilandi.

Koʻrilgan chora-tadbirlar oilalarni zamonaviy, sifatli, shinam uy-joy bilan taʼminlashga, qishloqda yangi muhandislik-kommunikatsiya, ijtimoiy va bozor infratuzilmasini shakllantirishga koʻmaklashdi, qishloqning qiyofasini yangi darajaga koʻtarish va shu asosda qishloq aholisining hayot darajasini yaxshilash va dunyoqarashini oʻzgartirish imkonini berdi.

Shu bilan birga, ushbu sohani oʻrganish aholining real ehtiyojlari va xarid qobiliyatini, shuningdek milliy mentalitetni va qishloq joylarda yashash sharoitlarining xususiyatlarini toʻliq hisobga olib qurilish samaradorligini oshirishga yoʻnaltirilgan printsipial jihatdan yangi yondashuvlarni ishlab chiqish zarurligini koʻrsatdi.

Qishloq joylarda aholining keng qatlamlarini zamonaviy va shinam uy-joy bilan taʼminlash darajasini tubdan oshirish maqsadida:

1. Quyidagilar qishloq joylarda uy-joy qurilishini yanada rivojlantirishning asosiy yoʻnalishlari etib belgilansin:

yashash uchun ijtimoiy-maishiy shart-sharoitlarni yaxshilash, qishloq aholisining zamonaviy, sifatli, shinam, arzon uy-joyga boʻlgan ehtiyojlarini qondirish;

qishloq joylarda uy-joylar qurish uchun ajratilgan turar joy massivlarida muhandislik-kommunikatsiya infratuzilmasini va transport tarmoqlarini birgalikda rivojlantirish;

konstruktiv va arxitektura-rejalashtirish yechimlarini optimallashtirish hisobiga loyiha-qidiruv va qurilish-montaj ishlari, shuningdek barpo etilayotgan uylar tannarxini pasaytirish;

energiyani tejaydigan materiallar va asbob-uskunalarning yangi turlaridan foydalanishni kengaytirish;

joylarda qurilish industriyasini rivojlantirish, pudrat tashkilotlarining quvvatlarini koʻpaytirish, ularning moddiy-texnika bazasini mustahkamlash;

uy-joy qurilishi uchun ajratiladigan yer resurslaridan oqilona foydalanishni taʼminlash;

qishloq joylarda yakka tartibda uy-joy qurilishi uchun imtiyozli kreditlar berishning fuqarolar uchun yanada qulay shartlarini joriy etish.

2. Qishloq joylarda mavjud namunaviy loyihalarga qoʻshimcha ravishda arzon uylarning quyidagi yangi namunalarini (keyingi oʻrinlarda uylar deb ataladi) joriy etish maqsadga muvofiq deb hisoblansin:

xoʻjalik imoratlari va obod hovlilari boʻlgan ikki, uch qavatli koʻp kvartirali (2, 3 xonali) uylar;

aholi zich joylashgan tumanlarda hovlidagi imoratlar bilan birgalikda maydoni 0,02 gektar boʻlgan yer uchastkalarida joylashtiriladigan bir qavatli 2 va 3 xonali uylar;

hovlidagi imoratlar bilan birgalikda maydoni 0,04 gektar boʻlgan yer uchastkalarida joylashtiriladigan ikki qavatli 4 xonali birlashtirilgan uylar.

3. Belgilansinki, uy-joylarning yangi namunalarini qurish uchun "Qishloq qurilish bank" ATB, Tashqi iqtisodiy faoliyat milliy banki, "Ipoteka bank" ATIB, "Xalq banki" ATB, "Asaka bank" ATB va "Oʻzsanoatqurilishbank" ATB (keyingi oʻrinlarda ishtirok etuvchi tijorat banklari deb ataladi) uy quruvchilarga 3-yillik imtiyozli davr va birinchi 5-yil mobaynida yillik 7 foiz miqdoridagi foiz stavkasi bilan va keyingi davrda Oʻzbekiston Respublikasi Markaziy bankining qayta moliyalashtirish stavkasi miqdorida 15-yil muddatga ipoteka kreditlari beradilar, bunda uy quruvchilarning dastlabki badali quyidagi miqdorlarni tashkil etadi:

15 foiz – ikki, uch qavatli koʻp kvartirali (2 va 3 xonali) uylar va 2, 3 xonali bir qavatli uylar uchun;

25 foiz – ikki qavatli 4 xonali birlashtirilgan uylar uchun.

4. Oʻzbekiston Respublikasi Iqtisodiyot vazirligi, Moliya vazirligi, Davlat arxitektura va qurilish qoʻmitasi tomonidan Qoraqalpogʻiston Respublikasi Vazirlar Kengashi, viloyatlar hokimliklari, "Qishloq qurilish invest" IK MChJ, ishtirok etuvchi tijorat banklari va boshqa manfaatdor idoralar bilan birgalikda ishlab chiqilgan 2017-yilda qishloq joylarda namunaviy loyihalar boʻyicha arzon uy-joylar qurish dasturi (keyingi oʻrinlarda Dastur deb ataladi) maʼqullansin. Dastur quyidagilarni oʻz ichiga oladi:

2017-yilda namunaviy loyihalarning aniq turlari boʻyicha qishloq joylarda umumiy moliyalashtirish hajmlari 2 121,5 milliard soʻm boʻlgan 15,0 mingta arzon, zamonaviy, shinam uy-joylar, shu jumladan birinchi turi boʻyicha – 4 608 ta, ikkinchi turi boʻyicha – 3 739 ta, uchinchi turi boʻyicha – 3 672 ta, qurishning yigʻma va asosiy parametrlari 1-5-ilovalarga muvofiq;

2017-yilda turar joy massivlari uchun muhandislik-transport kommunikatsiyalari va infratuzilma obʼektlari qurish boʻyicha yigʻma koʻrsatkichlar 6-ilovaga muvofiq.

5. Qoraqalpogʻiston Respublikasi Vazirlar Kengashi Raisiga, viloyatlar hokimlariga, Oʻzbekiston Respublikasi Iqtisodiyot vazirligi, Moliya vazirligi, Davlat arxitektura va qurilish qoʻmitasi, Moliya vazirligi huzuridagi Respublika yoʻl jamgʻarmasi, "Qishloq qurilish invest" IK MChJ, "Qishloq qurilish loyiha" MChJ, "Oʻzbekenergo" AJ, "Oʻztransgaz" AK, ishtirok etuvchi tijorat banklari, boshqa manfaatdor vazirliklar va idoralar rahbarlariga:

maʼqullangan Dastur parametrlariga muvofiq uylar, muhandislik-transport kommunikatsiyalari, ijtimoiy va bozor infratuzilmasi obʼektlari qurish;

qurilish-montaj ishlari tannarxini pasaytirishga, mahalliy qurilish industriyasini barqaror va mutanosib rivojlantirishga, pudrat tashkilotlarining salohiyatini mustahkamlashga yoʻnaltirilgan chora-tadbirlarni izchil amalga oshirish yuzasidan shaxsiy masʼuliyat yuklansin.

6. Oʻzbekiston Respublikasi Moliya vazirligi:

ishtirok etuvchi tijorat banklarining buyurtmanomalari boʻyicha ishtirok etuvchi tijorat banklarining marjasi yiliga 4 foiz miqdorida boʻlishini hisobga olgan holda yiliga 3 foizli stavka boʻyicha 5-yillik imtiyozli davrni oʻz ichiga oluvchi 15-yil muddatga milliy valyutada kredit liniyalari ochsin, bunda kredit liniyasi mablagʻlarini Dastur doirasida uylar qurishga maqsadli yoʻnaltirsin;

Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Markaziy bank va ishtirok etuvchi tijorat banklari bilan birgalikda Dasturni amalga oshirishga xalqaro moliya institutlari va xorijiy hukumatlarning moliyalashtiruvchi tashkilotlarining imtiyozli uzoq muddatli kreditlarini jalb etish masalasini ishlab chiqsin.

7. Oʻzbekiston Respublikasi Iqtisodiyot vazirligi:

Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Davlat arxitektura va qurilish qoʻmitasi, ishtirok etuvchi tijorat banklari va Vazirlar Mahkamasi huzuridagi Ijtimoiy tadqiqotlar instituti bilan birgalikda qishloq aholisining uy-joylarning har bir namunasiga boʻlgan talabini oʻrganish natijalaridan kelib chiqib, 2017-yil 1-aprelgacha boʻlgan muddatda Vazirlar Mahkamasiga keyingi yillarda Qishloq joylarda namunaviy loyihalar boʻyicha arzon uy-joylar qurish dasturini amalga oshirish parametrlari yuzasidan takliflar kiritsin;

Oʻzbekiston Respublikasi Moliya vazirligi, Markaziy bank va Tashqi iqtisodiy aloqalar, investitsiyalar va savdo vazirligi bilan birgalikda 2018-2021-yillarda Qishloq joylarda namunaviy loyihalar boʻyicha arzon uy-joylar qurish dasturini moliyalashtirish miqdorlari va manbalarini belgilasin, shu jumladan xalqaro moliya institutlari va xorijiy hukumatlarning moliyalashtiruvchi tashkilotlarining kredit mablagʻlarini jalb etishni nazarda tutsin.

8. Qoraqalpogʻiston Respublikasi Vazirlar Kengashi va viloyatlar hokimliklari kelgusi yilga Qishloq joylarda namunaviy loyihalar boʻyicha arzon uy-joylar qurish dasturi doirasida har yili belgilangan tartibda:

1-maygacha – Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi hamda Davlat arxitektura va qurilish qoʻmitasi bilan kelishgan holda, keyinchalik uylar, muhandislik-transport kommunikatsiyalari va ijtimoiy va bozor infratuzilmasi obʼektlari qurish uchun "Qishloq qurilish invest" IK MChJga beriladigan, qishloq xoʻjaligi maqsadidagi yerlar toifasiga va oʻrmon fondiga kirmaydigan, tashqi muhandislik kommunikatsiyalariga ulanadigan massivlar roʻyxati tasdiqlash uchun Vazirlar Mahkamasiga kiritilishini;

1-sentyabrgacha – ishtirok etuvchi tijorat banklari bilan birgalikda talabgorlar aniqlanishini va uylar qurish uchun ularning dastlabki badallari shakllantirilishini;

1-oktyabrgacha – "Qishloq qurilish invest" IK MChJ va Oʻzbekiston Respublikasi Davlat arxitektura va qurilish qoʻmitasi bilan birgalikda foydalanishga tayyor holda topshirish shartlarida uylar qurish uchun Qurilish-pudrat tashkilotlari reyestriga kiritilgan pudrat tashkilotlarini aniqlash boʻyicha tanlov savdolari oʻtkazilishini;

1-noyabrgacha – "Oʻzbekenergo" AJ, "Oʻztransgaz" AK, Respublika yoʻl jamgʻarmasi va "Qishloq qurilish invest" IK MChJ bilan birgalikda yangidan quriladigan qishloq turar joy massivlarida muhandislik-transport kommunikatsiyalari va infratuzilma obʼektlari qurish uchun Qurilish-pudrat tashkilotlari reyestriga kiritilgan pudrat tashkilotlarini aniqlash boʻyicha tanlov savdolari oʻtkazilishini taʼminlasinlar.

9. "Qishloq qurilish invest" IK MChJ Qishloq joylarda namunaviy loyihalar boʻyicha arzon uy-joylar qurish dasturi doirasida turar joy massivlarida suv taʼminoti obʼektlari va avtomobil yoʻllari qurish boʻyicha buyurtmachi etib belgilansin.

10. Belgilansinki, turar joy massivlarida suv, elektr, gaz taʼminoti obʼektlari va avtomobil yoʻllari qurish tegishli ravishda respublika byudjeti, "Oʻzbekenergo" AJ, "Oʻztransgaz" AK va Respublika yoʻl jamgʻarmasi mablagʻlari hisobiga amalga oshiriladi.

11. "Qishloq qurilish bank" ATB Oʻzbekiston Respublikasi Iqtisodiyot vazirligi, Moliya vazirligi, Adliya vazirligi, ishtirok etuvchi tijorat banklari va "Qishloq qurilish invest" IK MChJ bilan birgalikda fuqarolarning oʻzini oʻzi boshqarish organlarining tavsiyalari asosida, ariza beruvchi – uy quruvchining Dasturdagi ishtiroki tartibi toʻgʻrisidagi nizom loyihasini bir oy muddatda tasdiqlash uchun Oʻzbekiston Respublikasi Vazirlar Mahkamasiga kiritsin.

12. 2017-2021-yillarda qishloq joylarda namunaviy loyihalar boʻyicha arzon uy-joylar qurish dasturi doirasida 2022-yil 1-yanvargacha:

pudrat tashkilotlari – "Qishloq qurilish invest" IK MChJ bilan tuzilgan shartnomalar boʻyicha foydalanishga tayyor holda topshirish shartlarida massivlarda uylar, suv taʼminoti obʼektlari va avtomobil yoʻllari qurish boʻyicha ishlar hajmlari uchun – soliqlarning barcha turlarini va davlat maqsadli jamgʻarmalariga majburiy ajratmalar toʻlashdan;

subpudrat tashkilotlari – massivlarda uylar, suv taʼminoti obʼektlari va avtomobil yoʻllari qurishga "Qishloq qurilish invest" IK MChJ bilan shartnomalar tuzgan bosh pudrat tashkilotlari bilan tuzilgan kontraktlar boʻyicha ular tomonidan bajariladigan ishlar hajmlari uchun – yagona soliq toʻlovi toʻlashdan;

qurilish materiallari va asbob-uskunalar ishlab chiqaruvchi tashkilotlar, shuningdek ularni tashiydigan tashkilotlar – foydalanishga tayyor holda topshirish shartlarida uylar qurish uchun "Qishloq qurilish invest" IK MChJga va "Qishloq qurilish invest" IK MChJ bilan shartnomalar tuzgan bosh pudrat tashkilotlariga qurilish materiallari va asbob-uskunalarni realizatsiya qilish va ularni tashish (jumladan import materiallarni) hajmlari uchun qoʻshilgan qiymat soligʻi, yagona soliq toʻlovi va davlat maqsadli jamgʻarmalariga majburiy ajratmalar toʻlashdan;

"Qishloq qurilish invest" IK MChJ – soliqlarning barcha turlarini va davlat maqsadli jamgʻarmalariga majburiy ajratmalar toʻlashdan;

"Qishloq qurilish loyiha" MChJ – "Qishloq qurilish invest" IK MChJ bilan tuzilgan shartnomalar boʻyicha uylar, muhandislik-transport kommunikatsiyalari va infratuzilma obʼektlari qurish boʻyicha bajarilgan loyiha-qidiruv ishlari hajmlari uchun – qoʻshilgan qiymat soligʻi toʻlashdan;

"Oʻzsanoateksport" AJ – 7-ilovaga muvofiq respublikada ishlab chiqarilmaydigan, chetdan olib kelinadigan yogʻoch-taxta materiallari, tomga yopiladigan metall listlar uchun bojxona toʻlovlaridan (bojxonada rasmiylashtirish yigʻimlari bundan mustasno), shuningdek Vazirlar Mahkamasi tomonidan tasdiqlanadigan roʻyxat boʻyicha boshqa qurilish materiallari uchun, ular "Qishloq qurilish invest" IK MChJga sotilganda – qoʻshilgan qiymat soligʻi toʻlashdan;

"Toshkent qishloq qurilish servis" MChJ va transport korxonalari – metall listlarni qayta ishlash va ularni "Qishloq qurilish invest" IK MChJga yetkazib berish boʻyicha ishlar hajmlari uchun – qoʻshilgan qiymat soligʻi, yagona soliq toʻlovi va davlat maqsadli jamgʻarmalariga majburiy ajratmalar toʻlashdan ozod etilsin.

Oʻzbekiston Respublikasi Davlat soliq qoʻmitasi ushbu qarorda nazarda tutilgan soliq va bojxona imtiyozlaridan toʻgʻri foydalanilishi ustidan qatʼiy nazorat oʻrnatsin.

13. Quyidagilarga istisno tariqasida:

2017-yil 1-martgacha boʻlgan muddatda – 2, 3 va 4-ilovalarda koʻrsatilgan uylarning qurilish-montaj ishlarini loyiha-smeta hujjatlarini ishlab chiqish bilan bir vaqtda amalga oshirishga;

2017-yil 1-yanvargacha foydalanishga topshirish yuzasidan zarur choralar koʻrilgan holda 0,02 gektar maydondagi yer uchastkalariga joylashtiriladigan 26 ta ikki, uch qavatli koʻp kvartirali (2 va 3 xonali) uylarni va 130 ta bir qavatli 2, 3 xonali uylarni joriy yilda qurishni boshlashga;

8-ilovaga muvofiq roʻyxat boʻyicha uylar qurish uchun bosh pudrat tashkilotlariga markazlashtirilgan tartibda yetkazib beriladigan asosiy qurilish materiallari va asbob-uskunalarning "Qishloq qurilish invest" IK MChJ tomonidan tender savdolari oʻtkazilmasdan eng maqbul takliflar tanlovi orqali sotib olinishiga ruxsat berilsin.

14. Oʻzbekiston Respublikasi Iqtisodiyot vazirligi, "Oʻzqurilishmateriallari" AK va "Oʻzmetkombinat" AJ buyurtmachi va loyihalash tashkilotining asoslangan hisob-kitoblari boʻyicha ushbu qaror bilan tasdiqlangan Dastur doirasida uylar, muhandislik-transport kommunikatsiyalari va ijtimoiy infratuzilma obʼektlari uchun tartibga solinadigan narxlar boʻyicha tsement va metall prokati ajratilishini taʼminlasinlar.

15. Oʻzbekiston Respublikasi Davlat arxitektura va qurilish qoʻmitasi "Qishloq qurilish invest" IK MChJ, "Qishloq qurilish loyiha" MChJ, Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda Dasturni amalga oshirish doirasida qurilish-montaj ishlari bajarilishi sifati va loyiha yechimlari, shuningdek shaharsozlik normalari va qoidalariga rioya etilishi ustidan davlat arxitektura-qurilish, texnik va mualliflik nazoratlari yuritilishini taʼminlasin.

16. Oʻzbekiston milliy teleradiokompaniyasi, Oʻzbekiston Milliy axborot agentligi, Oʻzbekiston matbuot va axborot agentligi Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Davlat arxitektura va qurilish qoʻmitasi, "Qishloq qurilish invest" IK MChJ va ishtirok etuvchi tijorat banklari bilan birgalikda Qishloq joylarda namunaviy loyihalar boʻyicha arzon uy-joylar qurish dasturining maqsadlari va vazifalari ommaviy axborot vositalarida keng yoritilishini tashkil etsinlar.

17. "Qishloq qurilish bank" ATB, "Qishloq qurilish invest" IK MChJ Oʻzbekiston Respublikasi Moliya vazirligi, Iqtisodiyot vazirligi va Adliya vazirligi bilan birgalikda bir oy muddatda Vazirlar Mahkamasiga qonun hujjatlariga ushbu qarordan kelib chiquvchi oʻzgartirish va qoʻshimchalar kiritish toʻgʻrisida taklif kiritsin.

18. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Bosh vazirining oʻrinbosari B.I.Zakirov zimmasiga yuklansin.


Oʻzbekiston Respublikasi Prezidenti
vazifasini bajaruvchi                                                                 Sh.Mirziyoyev

Toshkent shahri,
2016-yil 21-oktyabr





Keyingi yillarda respublikada qishloq aholi punktlarining meʼmoriy qiyofasini yaxshilash, namunaviy loyihalar boʻyicha yakka tartibda uy-joylar qurish hisobiga qishloq aholisining hayoti darajasi va sifatini oshirish, qishloqda muhandislik va transport kommunikatsiyalarini, ijtimoiy infratuzilma obʼektlarini jadal rivojlantirish boʻyicha koʻlamli ishlar amalga oshirildi. Faqat 2009-2016-yillarda qishloq joylarda 1308 turar joy massivida umumiy maydoni 9 million 573 ming kvadrat metr boʻlgan 69 557 ta shinam uy-joy qurildi. Qishloqlardagi 83,5 mingdan ortiq oilaning yashash sharoiti yaxshilandi.

Shu bilan birga, oʻrganish yakunlari aholining real ehtiyojlarini va xarid qobiliyatini, shuningdek milliy mentalitetni va qishloq joylarda yashash sharoitlarini toʻliq hisobga oluvchi qurilishning yuqori samaradorligini taʼminlaydigan printsipial jihatdan yangi yondashuvlarni ishlab chiqish zarurligini koʻrsatdi.

Qishloq aholisining zamonaviy va arzon uylarga boʻlgan oʻsib borayotgan ehtiyoji imtiyozli kredit berishning yuqori darajadagi shartlarini joriy etishni, energiyani tejaydigan materiallar va asbob-uskunalarning yangi turlaridan foydalanishni yanada kengaytirishni, shuningdek barpo etilayotgan uylarning tannarxini pasaytirishni talab qilmoqda.

Ushbu muhim vazifalar hisobga olingan holda qabul qilingan qaror qishloq aholisining keng qatlamlari uchun zamonaviy va shinam uylardan foydalanish darajasini tubdan oshirishga, yer resurslaridan oqilona foydalanishni taʼminlashga va qishloq joylarda yakka tartibda uy-joy qurilishini yanada rivojlantirishga yoʻnaltirilgan.

Qaror toʻplangan tajribani oʻrganishni hisobga olib qishloq joylarda yakka tartibda uy-joy qurilishiga yangicha yondashuvni mustahkamlaydi. Qarorda besh yillik davrga moʻljallangan qishloq joylarda arzon uylar qurishning koʻlamli Dasturini amalga oshirish nazarda tutilgan. Dasturga asos qilib olingan yangilangan namunaviy loyihalar qishloq aholisining yuqorida koʻrsatib oʻtilgan talablari va ehtiyojlarini toʻliq hisobga oladi, chunki ularning fikrlari va istak-xohishlari hisobga olinib ishlab chiqilgan.

Dasturda qishloq joylarda narx parametrlari va shinamliligiga koʻra yakka tartibdagi uy-joylar namunalarining uchta eng arzon turlarini qoʻshimcha ravishda barpo etish nazarda tutiladi.

Jumladan, birinchi turi boʻyicha uch yoki toʻrt yoʻlakli, xoʻjalik imoratlari va obod hovlilari boʻlgan ikki va uch qavatli koʻp kvartirali uylar barpo etishni nazarda tutadi. Misol uchun bunday uylarda umumiy maydoni 42,4 kvadrat metr va taxminiy qiymati 72,5 million soʻm, xoʻjalik imoratlari hisobga olingan holda 85,0 million soʻm boʻlgan ikki xonali kvartiralar qurish rejalashtirilmoqda.

Oʻz navbatida, uch xonali kvartiralarning maydoni 52,4 kvadrat metr va taxminiy qiymati 88,5 million soʻm, xoʻjalik imoratlari hisobga olingan holda 100,7 million soʻm boʻladi.

Bundan tashqari, koʻrsatib oʻtilgan koʻp kvartirali uylarni qurishda kvartiralar egalarining ehtiyojlarini qondirish maqsadida hovlida joylashtiriladigan imoratlar – bolalar maydonchalari, dam olish uchun ayvonlar, dush va boshqalar barpo etish nazarda tutiladi.

Ikkinchi turiga muvofiq aholi zich joylashgan tumanlarda 2 sotix maydondagi yer uchastkasida barpo etiladigan bir qavatli ikki va uch xonali arzon uylar qurish moʻljallanmoqda. Bunday ikki xonali uylarning umumiy maydoni 53,0 kvadrat metr va taxminiy qiymati 93,8 million soʻm, xoʻjalik imoratlari hisobga olingan holda 101,5 million soʻm boʻladi.

Uch xonali uylarning umumiy maydoni 63,5 kvadrat metr va taxminiy qiymati 111,0 million soʻm, xoʻjalik imoratlari hisobga olingan holda 118,7 million soʻm boʻladi. Uylarning hovlisida xoʻjalik imoratlari qurish nazarda tutiladi.

Uchinchi turi 4 sotix maydondagi yer uchastkasida barpo etiladigan umumiy maydoni 115,0 kvadrat metr boʻlgan yagona blokka birlashtirilgan ikki qavatli toʻrt xonali uylar qurishni nazarda tutadi. Bunda koʻrsatib oʻtilgan uylarning taxminiy qiymati 162,0 million soʻmni, xoʻjalik imoratlari hisobga olingan holda 181,8 million soʻmni tashkil etadi. Uylarning hovlisida xoʻjalik imoratlari qurish nazarda tutiladi.

Agar 2009-yilda qabul qilingan Qishloq joylarda namunaviy loyihalar boʻyicha yakka tartibda uy-joylar qurish dasturi doirasida uy quruvchining dastlabki badali 25 foizni tashkil etgan boʻlsa, yangi Dastur boʻyicha ushbu badal birinchi va ikkinchi turdagi uylarni quruvchilar uchun atigi 15 foizni tashkil etadi. Bu arzon uylar Dasturiga qishloq aholisining keng qatlamlarini jalb etishga koʻmaklashadi.

Bundan tashqari, ipoteka krediti uch yillik imtiyozli davr va birinchi 5 yil mobaynida yillik 7 foiz miqdoridagi foiz stavkasi bilan 15-yil muddatga beriladi. Keyingi yillarda kreditning foiz stavkasi Markaziy bankning hozirgi vaqtda yillik 9 foizni tashkil etadigan qayta moliyalashtirish stavkasidan ortiq boʻlmaydi.

Dasturni moliyalashtirishga faqat 2017-yilda 2 trillion 121,5 milliard soʻm yoʻnaltiriladi, shu jumladan uy quruvchilarning mablagʻlari bilan birgalikda davlat byudjetidan 350,0 milliard soʻm ajratiladi, shuningdek tijorat banklarining 2 trillion soʻmdan ortiq miqdoridagi kredit resurslarini jalb etish nazarda tutiladi.

Umuman olganda, Dasturda 2017-yilda 15 mingta yangi uy va kvartira, shu jumladan 4608 ta birinchi turdagi, 3739 ta ikkinchi turdagi, 3672 ta uchinchi turdagi uylarni hamda 0,06 gektar maydonga 3, 4 va 5 xonali 2981 ta bir qavatli uy qurish nazarda tutiladi.

Shu bilan birga yangi qurilayotgan uy-joy massivlarida faqat davlat resurslari hisobiga 415,3 kilometr suv taʼminoti tarmoqlari, 291,5 kilometr elektr taʼminoti tarmoqlari, 316,9 kilometr gaz taʼminoti tarmoqlari va 260,3 kilometr avtomobil yoʻllari, shu jumladan massivlar ichida kirish yoʻllari va yoʻllar, shuningdek 134 ta ijtimoiy infratuzilma obʼektini barpo etish moʻljallanmoqda.

Qurilish-montaj ishlari sifatiga qoʻyiladigan talablarning oshirilishi Dasturning yana bir muhim xususiyati hisoblanadi. Bunda asosiy qurilish materiallari va buyumlarga qurilish-pudrat tashkilotlarining xarajatlarini optimallashtirish hisobiga barpo etiladigan namunaviy uy-joylar qiymati pasayishi taʼminlanadi.

Bundan tashqari, uylarning arzonligiga Dastur ishtirokchilari uchun soliq, bojxona imtiyozlari va boshqa imtiyozlar berilishi tufayli ham erishiladi. Masalan, pudrat tashkilotlari arzon uylar qurish doirasida bajariladigan ishlar hajmi uchun soliqlarning barcha turlarini va davlat maqsadli jamgʻarmalariga majburiy ajratmalarni toʻlashdan ozod etiladi.

Ushbu Dasturning samarali amalga oshirilishi davlat tuzilmalarining alohida nazorati ostida boʻladi, unda nazarda tutilgan koʻrsatkichlar bajarilishining tizimli monitoringi olib boriladi.

Yangilangan loyihalar boʻyicha barpo etiladigan uylar oʻzining narx parametrlari, sifat tavsiflari va shinamliligi boʻyicha Markaziy Osiyoda oʻxshashi yoʻqligini eʼtirof etish zarur.

Qarorning amalga oshirilishi qishloqni obodonlashtirishning va qishloq aholisi hayot darajasini tubdan oshirishning asosiy omillaridan biri sifatida qishloq joylarda yakka tartibda uy-joy qurish koʻlamlarini yanada kengaytirish boʻyicha uzviylik va izchillik yoʻlini taʼminlashga koʻmaklashadi.
(Manba: OʻzA.
Foto: uz24.uz)