JIPSLIKNING QUDRATI

JIPSLIKNING QUDRATI

(Faxriya)

 Chanoqlardan toshib turar ulugʻ nasiba,

Saxiy kuzning etagidan rizq terar Odam.

Oʻzbekiston tonggi otgan  qutlugʻ pallada,

Hayratlarga chulgʻanadi jumlai olam!

Obod, yorugʻ koʻngillarni quchmish farogʻat,

Oppoq dengiz chayqaladi samo ostida.

Xalqim uchun fidoyilik – ulugʻ ibodat,

Mehnat bilan ona Vatan mangu osuda.

Ana qarang, hashar qizir dala tomonda,

Bir yuz oʻttiz olti millat paxta teradi.

Zafar dami barcha xurram, hozir xirmonda,

Yurtda oppoq-oppoq tonglar otaveradi.

Maral eje, Tanya xola, Jeksen koʻkelar,

Elim, yurtim, degan mard-u maydon aslida.

Ozar qizi Leylaxonim, Nazlim jengelar,

Bir-biridan qolishmaydi terim bahsida.

Mahallalar guzaridan dalaga tutash,

Yoʻllardadir jipslikning buyuk qudrati.

Paxta ishqi bilan yongan dillarga uyqash

Xirmonlarda Oqibatning ulugʻ hikmati.

Koʻrdingizmi, Oʻzbekiston dalalarini,

Quyosh nurin toʻyib ichgan purziyo tuproq.

Dunyo tanir lafzi halol bolalarini,

Xalqim uchun irsiyatdir soʻzida turmoq!

Soʻzki, Vatan nomi bilan buyuklangan shon –

Bugun sharaf tojin kiygan dehqonning azmi.

Amu eldan dunyo tomon yoʻl olgan karvon

Va shijoat, matonatning chinakam bazmi!

Hirmonlari baland-baland, tonglari oppoq,

Ey ona yurt! Oʻzbekiston – jonajon Amu!

Bovurim, deb bagʻrin ochgan har qoraqalpoq,

Zafar quchgan damlaringda yoningda mangu!

Koʻrdim, Xitoy, Kuyukkoʻpir, Jumurtov yoqda,

Paxta ishqi bilan yonib yashayotir el.

Qilichboyda, Amir Temur, Qangli, Qipchoqda,

Dalalarga koʻchib chiqqan barcha bogʻlab bel.

Ahli dunyo havasdadir Amudaryoga

Rizqqa toʻlib borayotir bu koʻhna makon!

Baxt-u iqbol boʻlmagaydir bundan ziyoda,

Paxtasiday tonglari oq nurafshon Vatan!

Robiya YOʻLDOShEVA