Maqsadim – Vatanimiz mudofaa qudrati oshishiga xizmat qilish
Hayotda shunday boʻladiki, biror rejalagan niyatimiz amalga oshmasa, tushkunlikka tushamiz, hayotning qizigʻi yoʻqday tuyulib ketadi. Keyin, maʼlum bir vaqtlar oʻtib, oʻtgan yoʻlimizga nazar tashlasak, oʻsha muvaffaqiyatsizlikning hayotimizda muhim ahamiyatga ega boʻlganligini anglaymiz.
3-sonli Amudaryo akademik litseyini tugatib, Qoraqalpoq davlat universitetining iqtisodiyot fakultetiga ulkan umidlar bilan hujjat topshirgandim. Doim qoʻshimcha darslar olib, litseydagi dars mashgʻulotlarimni mustahkamlab borganim, oliygohga kirish uchun qattiq tayyorgarlik koʻrganimga, albatta, talaba boʻlarman, deb ishongandim. Afsuski salgina bilimim kamlik qildi. Men oilamizning katta farzandi edim. Singillarim, ota-onam oldida muvaffaqiyatsizligimdan uyalib yurgandan koʻra, Armiyaga ketaman, degan qarorga keldim. Oilamdagilar bu fikrimni qoʻllab-quvvatlashdi.
Shunday qilib saralashlardan, test sinovlaridan oʻtib, muddatli harbiy xizmatga joʻnadim. Bir yillik xizmat davrim meni butunlay qayta tarbiyaladi. Ota-onam, yaqinlarim, yurtim qadrini juda teran his qildim. Qolaversa, shu aziz Vatanimizning tinch-osoyishtaligini asrab turgan milliy Armiyamizga hurmatim ortdi. Qishlogʻimga harbiy xizmatchi boʻlish niyati bilan qaytdim.
Mana hozir Chirchiq oliy tank qoʻmondonlik-muhandislik bilim yurtining birinchi bosqichida taʼlim olayapman.
Nasib qilsa, oliygohni tugatib, havo-desant qoʻmondonligi boʻyicha ofitser boʻlib, mamlakatimiz mudofaa qudratining yana ham yuksalishiga oʻz hissamni qoʻshaman. Kundalik dars mashgʻulotlar jaryonida bu niyatim tobora mustahkamlanib borayapti. Chunki dunyoning turli hududlarida urush-nizolar, notinchliklar hukm surayotgan davrda mustahkam, qudratli va yuqori jangovarlik mahoratiga ega armiyagina yurtimizni bunday tahdidlardan asray oladi. Shuning uchun men oʻrta maxsus, kasb-hunar taʼlimini, maktablarni bitirish arafasida turgan ukalarimni bilim yurtimizga kelib oʻqib, malakali harbiy kadrlar boʻlib yetishishga, yoshlik kuch-gʻayratini, salohiyatini milliy armiyamizning mudofaa qudrati oshishi uchun sarflashga chaqiraman. Axir, Vatan himoyachisi boʻlish yigitlarning muqaddas burchi.
Polvonnazar ISMOILOV,
Chirchiq oliy tank qoʻmondonlik-muhandislik
bilim yurti kursanti.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
