Amudaryo tumani Mudofaa ishlari boʻlimi Milliy Armiyamizni munosib kadrlar bilan taʼminlashga hissa qoʻshmoqda

Mamlakatimizda qutlugʻ sana — Oʻzbekiston Respublikasi Qurolli Kuchlari tashkil etilganligining 34-yilligi hamda 14-yanvar – Vatan himoyachilari kuni yurtimiz boʻylab keng nishonlanmoqda.

Ayni jarayonlarda Mudofaa ishlari tuman va shahar boʻlimlarining oʻrni va masʼuliyati alohida ahamiyat kasb etmoqda. Chunki ushbu boʻlimlar harbiy xizmatni tashkil etish, chaqiruv ishlarini amalga oshirish, yoshlarni harbiy-vatanparvarlik ruhida tarbiyalash hamda Qurolli Kuchlarni sifatli kadrlar bilan taʼminlashda muhim boʻgʻin hisoblanadi.

Amudaryo tumani Mudofaa ishlari boʻlimi tomonidan ham mazkur vazifalarni izchil amalga oshirish borasida salmoqli ishlar olib borilmoqda. Xususan, “Umumiy harbiy majburiyat va harbiy xizmat toʻgʻrisida”gi Qonun hamda tegishli normativ-huquqiy hujjatlar asosida chaqiruvchilarni harbiy roʻyxatga olish, muddatli harbiy xizmatga yuborish, safarbarlik chaqiruvi rezervini shakllantirish va harbiy hisob yuritish tizimi samarali yoʻlga qoʻyilgan.

2025-yil yakunlari tahlili shuni koʻrsatmoqdaki, tuman Mudofaa ishlari boʻlimi tomonidan belgilangan vazifalar izchil va samarali bajarilmoqda. Jumladan, qonunning 18-moddasiga asosan 1 808 nafar yoshlar harbiy roʻyxatga olindi. Qoʻshinlarni butlash, muddatli harbiy xizmat hamda safarbarlik chaqiruvi rezervi xizmatiga yuborish boʻyicha berilgan yillik reja muddatidan avval bajarilib, 115 foiz ijro etildi.

Ayni kunda Amudaryo tumanidan 122 nafar yoshlar respublikamizning turli harbiy qismlarida Vatan oldidagi muqaddas burchini sharaf bilan ado etmoqda. 2026-yilgi chaqiruv mavsumi uchun esa 353 nafar yigitni muddatli harbiy xizmatga, 650 nafarini safarbarlik chaqiruvi rezervi xizmatiga yuborish boʻyicha tashkiliy va tayyorgarlik ishlari boshlab yuborilgan.

Mudofaa ishlari boʻlimlarining muhim vazifalaridan biri — yoshlarni harbiy xizmatga tayyorlash va ularda vatanparvarlik tuygʻularini shakllantirishdir. Shu maqsadda Amudaryo tumanida “mahallabay” va “xonadonbay” tizim asosida keng koʻlamli targʻibot ishlari amalga oshirildi. 18–27 yoshgacha boʻlgan 9 400 nafar chaqiriluvchi yoshlar va ularning ota-onalari bilan suhbatlar oʻtkazilib, harbiy xizmatning mazmun-mohiyati, imtiyozlar va istiqbollar atroflicha tushuntirildi.

Bu ishlar oʻz samarasini bermoqda. Xususan, 2025-yilda tumanimizdan 7 nafar yosh “Temurbeklar maktabi”ga, 5 nafar yosh esa oliy harbiy taʼlim muassasalariga oʻqishga qabul qilindi. Bu esa yoshlar oʻrtasida harbiy kasbga boʻlgan qiziqish izchil oshib borayotganini koʻrsatadi.

Shuningdek, Mudofaa ishlari boʻlimi tomonidan taʼlim muassasalari bilan hamkorlikda amaliy tadbirlar ham rejalashtirilgan. Jumladan, tumandagi barcha maktablarning 11-sinflarida tahsil olayotgan 1 808 nafar oʻquvchi uchun Nukus dala oʻquv maydonida jangovar qurollardan amaliy oʻq otish mashgʻulotlarini oʻtkazish belgilangan.

Ayni kunlarda mamlakatimizda davom etayotgan “Vatanparvarlik oyligi” doirasida Amudaryo tumanida ham “Milliy armiya – Ona yurt qalqoni, tinchligimiz posboni” shiori ostida koʻplab maʼnaviy-maʼrifiy tadbirlar tashkil etilmoqda. Maktablar, mahallalar va mehnat jamoalarida harbiy xizmatchilar, faxriylar ishtirokida uchrashuvlar, harbiy qismlarda “Ochiq eshiklar kuni”, koʻrgazmali mashgʻulotlar oʻtkazilmoqda.

Xulosa qilib aytganda, Milliy Armiyamiz bugungi kunda nafaqat mamlakatimiz suvereniteti kafolati, balki yoshlarni mardlik, intizom va fidoyilik ruhida tarbiyalovchi ulkan maktabga aylangan. Amudaryo tumani Mudofaa ishlari boʻlimi tomonidan olib borilayotgan amaliy ishlar esa ana shu qudratli tizimni munosib kadrlar bilan taʼminlashga xizmat qilmoqda.

Fursatdan foydalanib, barcha yurtdoshlarimizni, Vatan osoyishtaligi yoʻlida xizmat qilayotgan jasur harbiylarimizni 14-yanvar – Vatan himoyachilari kuni bilan samimiy tabriklaymiz!