TUMAN MUDOFAA BOʻLIMI TOMONIDAN ChAQIRILUVChILARNI TANLASh VA SARALASh IShLARI OLIB BORILMOQDA

Oʻzbekiston Respublikasi Vazirlar Mahkamasining 2025-yil 7-iyuldagi “Chaqiriluvchilarni tanlab olish tartibi toʻgʻrisidagi Nizomni tasdiqlash haqida”gi 413-sonli qarori, shuningdek, “Oʻzbekiston—2030” strategiyasini “Atrof-muhitni asrash va “yashil iqtisodiyot” yili”da amalga oshirishga oid davlat dasturi ijrosini taʼminlash maqsadida tizimli ishlar olib borilmoqda.

Oʻzbekiston fuqarolarini muddatli harbiy xizmatga tanlab olish ishlarini aniq va puxta reja asosida, shaffoflik bilan amalga oshirish, chaqiriluvchilarni mahallalarda oʻrganish va tanlab olishda mudofaa boʻlimlarining fuqarolar yigʻinlari bilan yaqin hamkorligi oʻzining ijobiy samarasini bermoqda.

Hukumat tomonidan tasdiqlangan Nizom talablariga koʻra, chaqiriluvchilar tanlovda bir yilda bir marta ishtirok etishlari mumkin. Mazkur tanlov har yili 10-avgustdan boshlanib, keyingi yilning 10-fevral sanasigacha davom etadi. Chaqiriluvchilarning qanday yoʻnalishlar boʻyicha tayyorgarlik sinovlaridan oʻtishi zarurligi toʻgʻrisida mamlakatimizning barcha hududlaridagi mahallalarga maʼlumotlar taqdim etilgan boʻlib, ayni paytda chaqiriluvchilarni muddatli harbiy xizmatga tanlab olish boʻyicha sinovlar davom etmoqda.

Amudaryo tuman Mudofaa ishlari tomonidan ham bu boradagi tanlov ishlari joriy yilning 11-avgust sanasidan boshlab belgilangan reja asosida amalga oshirilmoqda.

Tuman mahallalarida istiqomat qiluvchi 18-27 yosh oraligʻidagi fuqarolarning jismoniy tayyorgarligini oʻrganish, ularning bilim va kasbiy malakalarini baholash, jismonan baquvvat, aqlan yetuk va sogʻlom yigitlarni muddatli harbiy xizmatni oʻtashga tanlab olish maqsadida joriy yilning 10-sentyabr kuni Amudaryo tuman Mudofaa boʻlimida harbiy qismlardan ajratilgan butlash komissiyasi aʼzolari tomonidan chaqiriluvchilar bilan suhbat oʻtkazilib, jismoniy tayyorgarlik holatlariga baho berildi.

Butlash komissiyasi aʼzolari tomonidan ochiqlik va shaffoflik asosida tashkillashtirilgan mazkur suhbatda chaqiriluvchilarning bilim va kasbiy malakalari, xususan, qiziqish va intilishlari, zamonaviy axborot-kommunikatsiya texnologiyalari bilan ishlash koʻnikmalari, huquqiy savodxonligi, mantiqiy fikrlash qobiliyati sinovdan oʻtkazildi. Shu bilan birga chaqiriluvchilarning xulq-atvori, huquqbuzarliklar sodir etgan yoki etmagani, sudlanganlik holati, salomatligi va boshqa muhim jihatlar ham aniqlashtirildi.

Tadbir davomida chaqiriluvchilarning muddatli harbiy xizmatni oʻtashga umumiy tayyorgarlik darajasi turnikda tortilish, 100 metr va 3000 metr masofaga yugurish mezonlari orqali ham baholanib borilmoqda.

Amudaryo tuman Mudofaa ishlari boʻlimi tomonidan chaqiriluvchilarni muddatli harbiy xizmatga tanlab olish boʻyicha saralash va sinov ishlari davom etmoqda. Albatta, amalga oshirilayotgan bu kabi chora-tadbirlar mamlakatimiz mudofaa qudratini yanada oshirish, chaqiriluvchilar orasidan muddatli harbiy xizmatni oʻtashga munosiblarni tanlab olish imkonini beradi.

Zero, ona Vatanni mard va jasur, aqlan va jismonan yetuk, vatanparvar yoshlar qoʻriqlaydi.

Robiya YOʻLDOShEVA.