ТУМАН МУДОФАА БЎЛИМИ ТОМОНИДАН ЧАҚИРИЛУВЧИЛАРНИ ТАНЛАШ ВА САРАЛАШ ИШЛАРИ ОЛИБ БОРИЛМОҚДА

Ўзбекистон Республикаси Вазирлар Маҳкамасининг 2025 йил 7 июлдаги “Чақирилувчиларни танлаб олиш тартиби тўғрисидаги Низомни тасдиқлаш ҳақида”ги 413-сонли қарори, шунингдек, “Ўзбекистон—2030” стратегиясини “Атроф-муҳитни асраш ва “яшил иқтисодиёт” йили”да амалга оширишга оид давлат дастури ижросини таъминлаш мақсадида тизимли ишлар олиб борилмоқда.

Ўзбекистон фуқароларини муддатли ҳарбий хизматга танлаб олиш ишларини аниқ ва пухта режа асосида, шаффофлик билан амалга ошириш, чақирилувчиларни маҳаллаларда ўрганиш ва танлаб олишда мудофаа бўлимларининг фуқаролар йиғинлари билан яқин ҳамкорлиги ўзининг ижобий самарасини бермоқда.

Ҳукумат томонидан тасдиқланган Низом талабларига кўра, чақирилувчилар танловда бир йилда бир марта иштирок этишлари мумкин. Мазкур танлов ҳар йили 10 августдан бошланиб, кейинги йилнинг 10 февраль санасигача давом этади. Чақирилувчиларнинг қандай йўналишлар бўйича тайёргарлик синовларидан ўтиши зарурлиги тўғрисида мамлакатимизнинг барча ҳудудларидаги маҳаллаларга маълумотлар тақдим этилган бўлиб, айни пайтда чақирилувчиларни муддатли ҳарбий хизматга танлаб олиш бўйича синовлар давом этмоқда.

Амударё туман Мудофаа ишлари томонидан ҳам бу борадаги танлов ишлари жорий йилнинг 11 август санасидан бошлаб белгиланган режа асосида амалга оширилмоқда.

Туман маҳаллаларида истиқомат қилувчи 18-27 ёш оралиғидаги фуқароларнинг жисмоний тайёргарлигини ўрганиш, уларнинг билим ва касбий малакаларини баҳолаш, жисмонан бақувват, ақлан етук ва соғлом йигитларни муддатли ҳарбий хизматни ўташга танлаб олиш мақсадида жорий йилнинг 10 сентябрь куни Амударё туман Мудофаа бўлимида ҳарбий қисмлардан ажратилган бутлаш комиссияси аъзолари томонидан чақирилувчилар билан суҳбат ўтказилиб, жисмоний тайёргарлик ҳолатларига баҳо берилди.

Бутлаш комиссияси аъзолари томонидан очиқлик ва шаффофлик асосида ташкиллаштирилган мазкур суҳбатда чақирилувчиларнинг билим ва касбий малакалари, хусусан, қизиқиш ва интилишлари, замонавий ахборот-коммуникация технологиялари билан ишлаш кўникмалари, ҳуқуқий саводхонлиги, мантиқий фикрлаш қобилияти синовдан ўтказилди. Шу билан бирга чақирилувчиларнинг хулқ-атвори, ҳуқуқбузарликлар содир этган ёки этмагани, судланганлик ҳолати, саломатлиги ва бошқа муҳим жиҳатлар ҳам аниқлаштирилди.

Тадбир давомида чақирилувчиларнинг муддатли ҳарбий хизматни ўташга умумий тайёргарлик даражаси турникда тортилиш, 100 метр ва 3000 метр масофага югуриш мезонлари орқали ҳам баҳоланиб борилмоқда.

Амударё туман Мудофаа ишлари бўлими томонидан чақирилувчиларни муддатли ҳарбий хизматга танлаб олиш бўйича саралаш ва синов ишлари давом этмоқда. Албатта, амалга оширилаётган бу каби чора-тадбирлар мамлакатимиз мудофаа қудратини янада ошириш, чақирилувчилар орасидан муддатли ҳарбий хизматни ўташга муносибларни танлаб олиш имконини беради.

Зеро, она Ватанни мард ва жасур, ақлан ва жисмонан етук, ватанпарвар ёшлар қўриқлайди.

Робия ЙЎЛДОШЕВА.