UNI HAMMA TANIYDI

Bir marta sidqidildan kulish – yetti tuxum yegan bilan barobar, deyishadi. Bu qanchalik haqiqatga yaqin - bilmadim-u, ammo tuxum  organizmimizning sarflangan quvvatini tiklashda asqotishi va toʻyimli ozuqa boʻlganligi bois dasturxonimizda munosib oʻrin tutadi.

Yaratganning ulugʻ inoyati – hayot doim bir tekis kechmaydi. Baʼzan notekisliklarga duch kelganimizda, baʼzan atrofimizdagi odamlarning nooʻrin munosabatlaridan koʻnglimiz ogʻriganda, bu gʻala-gʻovur dunyoning tashvishlaridan toliqqanimizda yo ishdan horib-charchagan paytlarimizda koʻnglimizni koʻtaradigan begʻaraz birgina daldaga ehtiyoj sezamiz. Shunday damlarda oramizdagi shoʻx-shodon odamlarning oddiygina hazili ham koʻnglimizdagi bor-yoʻq gʻuborlarni aritib yuboradiki, buning bahosini na pul, na tuxum qadri bilan oʻlchab boʻladi.

Bugungi kunda nufuzli davralarda, umumxalq sayllarida boshlovchilik qilib, ichakuzdi hangomalar aytib nafaqat tumanimiz, balki, respublikamizga tanilayotgan sanʼatkor, 2002-yildan beri tuman Madaniyat va sport ishlari boʻlimida faoliyat yuritayotgan Muzaffar Ibragimov haqida oʻylaganimda yuqoridagi fikrlar koʻnglimdan kechdi.

U 1977-yilda Mangʻit shahrida tugʻildi. Maktabni tugatgach, 2002-yilda Nukus shahridagi Qalli Ayimbetov nomidagi Nukus madaniyat kollejiga oʻqishga kirib, 2005-yilda tugatdi va tuman Madaniyat va sport ishlari boʻlimida mehnat faoliyatini boshladi.

Aslida Muzaffarning sanʼat sohasidagi faoliyati ancha oldin, oʻquvchilik davridan boshlandi. Oʻtkazilgan ommaviy tadbirlarda boshlovchilik qilib, ichakuzdi hangomalar aytib, muxlislar qalbidan munosib oʻrin egalladi. Tabiatan shoʻx, hozirjavob va sodda yigitning oddiygina salomlashib, soʻrashishi ham kishi koʻnglida kulguga moyillik tugʻdiradi.

Uning oʻz iqtidorini rivojlantirishga intilishlari, oʻqib-oʻrganishlari izsiz ketmayapti. Har  yili Qoraqalpogʻiston va Oʻzbekiston miqyosida oʻtkazib kelinayotgan qiziqchilar koʻrik-tanlovlarida gʻolib va sovrindorlar safidan joy olib kelmoqda. Joriy yilda Muzaffar Ibragimov "Amudaryo televideniyesi”da "Kulgu bulogʻi” nomli hajviy koʻrsatuvi orqali qisqa fursatda muxlislar eʼtiborini qozondi.

- Kulguga, kulganga ne yetsin, - deydi jilmayib Muzaffar, - kuldirish esa undan-da savob. Axir kulgu vujudimizni tozalaydi, dilxiraliklarni yengadi, hatto yashartiradi ham. Men qoʻlimdan kelgancha odamlarimizga tabassum ulashishga intilaman. Mening aytadigan hangomalarimning koʻpchiligi hayotda kuzatgan, eshitganlarim tufayli tugʻilgan. Faqat ularni kulguli tarzda  aytishga intilaman.

Uning  sanʼat, qiziqchilik sohasidagi ilk ustozi madaniyat xodimi, rahmatlik Nurbek Hasanov edi. 2002-yilda ustoz-shogird ikkalasi Qoʻqon shahrida Oʻzbekiston Respublikasi miqyosida boʻlib oʻtgan askiyachi va qiziqchilarning beshinchi anʼanaviy koʻrik-tanlovida "Qassob sartarosh” nomli intermediyani ijro qilib, ikkinchi oʻrinni olishga sazovor boʻlishgan edi.

Oynai jahonda yo ommaviy sayl, tomoshalardami Muzaffar Ibragimov sahnaga chiqsa... hammamiz taniymiz, darrov negadir kulishga chogʻlanamiz. "Bir kuni...” yo "bir akamiz...” deya boshlanadigan begʻaraz va samimiy hangomaning oʻziyoq uning sanʼati tumanimiz xalqi dilidan munosib joy egallayotganligini koʻrsatadi. Biz unga bundan-da yuksak ijodiy barkamollik tilaymiz.

Oygul RAJABOVA.

Suratda: M.Ibragimov.

M.ShOMURODOV olgan surat.