BUYuK ShOH VA ShOIR, TARIXChI OLIM ZAHIRIDDIN MUHAMMAD BOBUR DAHOSIGA HURMAT-EHTIROM KOʻRSATILDI
Buyuk shoh va shoir, tarixchi olim, davlat arbobi Zahiriddin Muhammad Bobur adabiy merosini oʻrganish va uning asarlaridagi vatanparvarlik, insoniy munosabatlarni, oʻzaro mehr-oqibat tuygʻularini oʻsib kelayotgan yosh avlod qalbiga singdirish maqsadida taʼlim-tarbiya muassasalarida Boburxonlik kechalarini oʻtkazish anʼanaga aylangan. Bu kabi tadbirlar Zahiriddin Muhammad Bobur tavallud topgan 14-fevral sanasi arafasida yanada kengroq tus oladi. Bu tadbirlarda oʻquvchi-yoshlar Bobur gʻazallarini ifodali oʻqiydilar, maʼno-mazmuni, gʻazallarda ilgari surilgan gʻoyalar yuzasidan oʻzaro fikr almashish orqali Bobur ijodiga oid bilimlarini boyitadilar.
Prezident maktablari tizimidagi Amudaryo ixtisoslashtirilgan maktabi, 9-sonli bolalar musiqa va sanʼat maktabi hamda Amudaryo tuman Madaniyat boʻlimi hamkorligida tashkil etilgan “Shoh va shoir, tarixchi olim Zahiriddin Muhammad Bobur dahosiga ehtirom” mavzusidagi adabiy-musiqiy tadbirda ham maktab oʻquvchilari oʻzlarining Bobur asarlarining bilimdonlari va ixlosmandlari ekanliklarini namoyon etdilar.
Darvoqe, buyuk vatandoshimiz Zahiriddin Muhammad Bobur merosi nafaqat oʻz davrida, balki oradan besh asrdan ziyod vaqt oʻtsa ham, hamon turkiy xalqlargina emas, balki dunyodagi koʻplab xalqlar tomonidan alohida eʼtibor bilan oʻrganiladi. Chunki turkiy adabiyotni yuksaklikka olib chiqqan shoir 1494-1529-yillar davomida umumiy hajmi 400 dan ziyod turli janrlardagi asarlarni yaratdi. Xususan, buyuk bobokalonimizdan 119 gʻazal, 231 ruboiy, tuyuq, qitʼa, fard, masnaviy janrlaridagi betakror asarlar meros boʻlib qoldi. Uning oshiqona, taʼlimiy, tasavvufiy, tarixiy mavzulardagi asarlari hamon qoʻllardan qoʻymay oʻqiladi.
Tadbirni Amudaryo ixtisoslashtirilgan maktabi direktorining maʼnaviy-maʼrifiy ishlar boʻyicha oʻrinbosari Muyassar Rahmatullayeva ochdi va Bobur asarlarining yosh avlod taʼlim-tarbiyasida tutgan oʻrni haqida batafsil toʻxtalib oʻtdi.
Adabiy-musiqiy tadbir davomida maktab oʻquvchilari Bobur gʻazallarini mahorat bilan ifodali oʻqib berdilar. Oʻquvchilar “Hind devoni”, “Qobul devoni” hamda buyuk memuar asar “Boburnoma”ning yozilish tarixi, “Boburnoma”da bayon etilgan Osiyo, Yaqin Sharq mamlakatlarida Bobur davrida roʻy bergan voqea-hodisalar xususida maʼruzalar qildilar.
Ayniqsa, oʻquvchi-yoshlar tomonidan namoyish etilgan sahna koʻrinishi ishtirokchilarni bir muddat Zahiriddin Muhammad Bobur yashagan davr va shoirning orzu-armonlariga oshno qilib, har bir qalbda Vatanga muhabbat tuygʻularini yanada mustahkamladi.
Tadbir davomida tuman Madaniyat boʻlimi sanʼatkorlari va 9-sonli bolalar musiqa va sanʼat maktabi oʻquvchilari tomonidan mahorat bilan ijro etilgan Bobur gʻazallari bilan aytiladigan ashulalar ishtirokchilarga zavq-shavq bagʻishladi.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
