HAR BIR MUROJAAT EʼTIBORDA

Tuman Davlat soliq inspektsiyasiga oʻrnatilgan 515-4902 raqamli ishonch telefoniga joriy yil boshidan fuqarolardan har xil masalalar boʻyicha murojaatlar kelib tushgan boʻlib, ular nazorat-kassa mashinalarini ishlatmaslik, chek yoki unga tenglashtirilgan hujjatlar berilmaganligi, bank plastik kartalariga savdo qilmaslik yoki plastik kartalarga savdo qilganda naqd puldagiga nisbatan 10-15 foiz miqdorda oshirib pul olish va boshqada masalalar boʻyicha kelib tushgan murojaatlardir.

Ushbu murojaatlar tuman DSI tomonidan qonunda belgilangan muddatlarda oʻrganib chiqilib, 10 ta tadbirkorlik subʼektlarida nazorat qiluvchi organlar faoliyatini muvofiqlashtiruvchi hududiy komissiyasi ruhsati olingan holda qisqa muddatli tekshirishlar oʻtkazildi.

Oʻtkazilgan tekshirishlar natijasida 10 holatda 1833,5 ming soʻmga kassa nazorat mashinasi cheki yoki unga tenglashtirilgan hujjatlar berilmasligi sababli, 4 ta holatda bank plastik kartasiga savdo qilish qoidalari buzilishi holatlari aniqlangan, bundan tashqari, tekshirish davomida 26992,0 ming soʻmlik kirim hujjatlari boʻlmagan oziq-ovqat va  nooziq-ovqat tovarlarining borligi aniqlanib, ashyoviy dalil sifatida olingan.

Ushbu tadbirkorlik subʼektlarida oʻtkazilgan tekshirishlarda aniqlangan xato-kamchiliklar yuzasidan Oʻzbekiston Respublikasi Soliq Kodeksining 119-moddasi 1-qismi bilan eng kam ish haqining 30 barobari miqdorida, 114-moddasiga asosan kirim qilinmagan tovarlar summasi miqdorida moliyaviy jarimalar qoʻllash tavsiya qilingan.

Tuman DSIning «ishonch telefoni»ga qilingan murojaatlar tezkorlik bilan qonun doirasida koʻrib chiqilishi va murojaat qiluvchilarga oʻz vaqtida  tegishli tartibda  javob berilishi natijasida fuqarolarning "Ishonch telefoni”ga boʻlgan ishonchi tobora ortib bormoqda.

Ilhom NASURULLAYeV,

tuman Davlat soliq inspektsiyasining navbatchi qismi boʻlim boshligʻi.

(Foto - http://www.turkistonpress.uz)