ISTIQLOL QUYoShI MANGU PORLASIN!
Aziz yurtdoshlar!
Xalqimiz asrlar osha orziqib kutgan, hayotga boʻlgan munosabatimizni tubdan oʻzgartirib yuborgan mustaqilligimizning 24 yilligiga sanoqli kunlar qolayapti. Hech kimga qaram boʻlmasdan, oʻz milliy madaniyatimiz-maʼnaviyatimizga va ajdodlarimiz aqlu zakosi mahsuli boʻlmish jamiki bilimlarga tayangan holda oʻz milliy manfaatlarimizni, uzoq va davomli aniq maqsadlarni koʻzlab, iqtisodiyotimizning barqaror surʼatlarda oʻsishini taʼminlash, aholi turmush farovonligini oshirish borasida shu oʻtgan tarixan qisqa davrda ulugʻvor oʻzgarishlarga, yuksalishlarga erishildi. Mamlakatimizda, tumanimizda hayotning hamma jabhalarida ham tub islohotlar olib borildi. Yurtdoshlarimizning koʻnglida oʻz eli-yurti ravnaqi uchun fidoyilik shakllandi, oʻziga bek boʻldi, yurtimizning yana ham iqtisodiy baquvvat, tinch-osoyishtaligi barqaror boʻlmogʻi uchun har kim oʻzini daxldor his qilmoqda. Agar oʻtgan 24-yil vaqt qadrini amalga oshirilgan ezgu ishlar bilan oʻlchaydigan boʻlsak, mamlakatimiz iqtisodiyoti 5,5 barobardan koʻproq oʻsgani, aholi real daromadlari jon boshiga hisoblaganda qariyb 9 barobar oshgani, mustaqillik yillarida dunyoga kelgan yangi soha – kichik biznes va xususiy tadbirkorlikning tobora rivojlanib, bugungi kunda mamlakat yalpi ichki mahsulotining 56 foizidan ziyodini tashkil etayotgani, barcha sohalarda ham islohotlar olib borilib, pirovard natijada fuqarolarimizning turmush darajasi yuksalib borayotgani asrlarga tatigulikdir. Eng muhimi, olib borilayotgan barcha saʼy-harakatlar inson baxt-saodati uchun, uning ozod va farovon turmush kechirishi uchun xizmat qilmoqda, yurtimizda umrguzaronlik qilayotgan barcha millat, elatlar vakillarining oʻzaro hamjihatlikda ahil-inoq yashashiga asos boʻlmoqda.
Shuning uchun ham istiqlol bayrami hammamiz uchun eng ulugʻ, eng aziz bayramdir. Shu munosabat bilan oʻtkazilayotgan tumanimizning ovul va mahallarida, mehnat jamoalarida "Betakrorimsan, yagonasan, ona Vatanim - Oʻzbekistonim” degan ezgu gʻoyani oʻzida mujassam etgan madaniy-maʼrifiy, targʻibot-tashviqot tadbirlari orqali fuqarolarimiz mustaqilligimizning qadrini yanada teranroq anglamoqda, mustaqillikni mustahkamlashga hissa qoʻshishga, shu aziz Vatanimizni koʻz qorachigʻiday asrashga harakat qilmoqda.
Aziz yurtdoshlar!
Barchangizni qutlugʻ sana – eng ulugʻ, eng aziz bayramimiz – mustaqilligimizning 24 yilligi bilan qizgʻin tabriklaymiz. Oilangizga tinchlik-xotirjamlik yor boʻlsin. Shu aziz Vatanimiz osmoni uzra istiqlol quyoshi mangu porlab tursin!
"Taraqqiyot koʻzgusi”
gazetasi tahririyati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
