Imkoniyatlardan hursandmiz

  Men oʻn besh yildan buyon yakka tadbirkor sifatida hunarmandchilik bilan shugʻullanib kelaman. Mening bunday faoliyat bilan shugʻullanishim albatta oilamiz aʼzolarining farovon hayot kechirishlariga xizmat qilmoqda.

Oʻzim esa hunarmand sifatida el-yurtimga xizmat qilayotganimdan baxtiyorman.

Hozirgi paytda mamlakatimizda tadbirkorlik harakati qoʻllab-quvvatlanmoqda.

Ilgarilari tadbirkorlar va tadbirkorlik subʼektlari faoliyati koʻpchilik tekshiruv organlari tomonidan xohlagan paytlarida tekshirilardi. Hozir esa bunday tekshirishlarga, tadbirkorlar faoliyatiga xalaqit berishga chek qoʻyildi.

Hurmatli Yurtboshimiz Islom Karimov tomonidan 2015-yilning 15-mayida qabul qilingan "Xususiy mulk, kichik biznes va xususiy tadbirkorlikni ishonchli himoya qilishni taʼminlash, ularni jadal rivojlantirish yoʻllaridagi toʻsiqlarni bartaraf etish chora-tadbirlari toʻgʻrisida”gi Farmonida tabdirkorlik subʼektlarida tekshirishlar oʻtkazishning tartibi va davriyligi aniq belgilab berildi.

Muhtaram Prezidentimiz Farmoniga asosan joriy yilning 1-iyulidan boshlab nazorat qiluvchi organlar tomonidan mikrofirma, kichik korxona va fermer xoʻjaliklari faoliyatidagi barcha rejali tekshirishlar koʻpi bilan 4-yilda bir marta, boshqa tadbirkorlik subʼektlarida esa koʻpi bilan 3-yilda 1-marta amalaga oshiriladigan boʻldi.

Tadbirkorlik subʼektlarda oʻtkaziladigan moliya xoʻjalik faoliyati bilan bogʻliq boʻlmagan, yaʼni buxgalteriya va boshqa hujjatlarni oʻrganishni talab etmaydigan rejali tekshirishlar muddati 10 kalendar kunidan oshmasligi belgilandi.

Ushbu Farmonda tadbirkorlik subʼektlarining moliya-xoʻjalik faoliyatini rejali tekshirishlarda faqatgina oxirgi rejali tekshiruvdan keyingi davr qamrab olinishi ham aniq belgilab qoʻyildi.

Prezidentimiz va hukumatimiz tomonidan koʻrsatilayotgan bunday gʻamxoʻrliklar albatta bizni Vatan, el-yurt ravnaqi yoʻlida har qachongidan ham koʻproq, fidokorona mehnat qilishga davʼat etmoqda.

Sobir POLVONOV, hunarmand.

Maqola Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan loyiha doirasida tayyorlandi.