Qishloq xoʻjaligi maydonlaridagi qoʻshimcha imkoniyatlardan samarali foydalanishga bagʻishlangan seminar boʻlib oʻtdi

Amudaryo tumanining Choykoʻl ovulida Oʻzbekiston Respublikasi Prezidentining “Qishloq xoʻjaligi maydonlaridagi qoʻshimcha imkoniyatlardan foydalangan holda mahsulot yetishtirishni koʻpaytirishga doir qoʻshimcha chora-tadbirlar toʻgʻrisida”gi qarorining ijrosini taʼminlash maqsadida koʻrgazmali seminar boʻlib oʻtdi.

Seminar dala chetlari, kanallar, sugʻorish va kollektor-drenaj tarmoqlarining atroflaridagi maydonlarda, aholi tomorqasi, xonadonlar va koʻp qavatli uylar oldi hamda mahallaning ichki koʻchalarida qishloq xoʻjaligi mahsulotlari yetishtirilishini tashkil qilish masalalariga bagʻishlandi.

Tadbirda respublika ishchi guruhi rahbari Zafar Qosimov, ishchi guruh aʼzolari, Qoraqalpogʻiston Respublikasi Oʻsimliklar karantini va himoyasi agentligi birinchi oʻrinbosari Paraxat Orinbayev, Agroinspektsiya hamda Oʻsimliklar karantini va himoyasi agentligi inspektorlari, tuman hokimi oʻrinbosarlari, klasterlar, fermer xoʻjaliklari rahbarlari, tomorqa yer egalari va mahallalar raislari ishtirok etdi.

Seminarda Prezidentimizning yuqoridagi qarorining mazmun-mohiyati, uni amaliyotga tatbiq etish va boshqa masalalar yuzasidan fikr-mulohazalar almashildi.

Taʼkidlanganidek, mazkur hujjatda dala chetlaridan samarali foydalangan qishloq xoʻjaligi mahsulotlari yetishtiruvchilarni qoʻllab-quvvatlash boʻyicha qator imtiyozlar koʻzda tutilgan. Xususan, ichki fitosanitariya sertifikati bir yil davomida bepul berilishi, dala chetlariga ekilgan “in-vitro” usulida yaratilgan mevali payvandtagli koʻchatlarni sotib olish xarajatlarining 50 foizi miqdorida, biroq har biroq har bir mevali payvandtagli koʻchatga 25 ming soʻmdan oshmagan holda Agrosanoatni rivojlantirish va qoʻllab-quvvatlash davlat maqsadli jamgʻarmasidan belgilangan tartibda subsidiya ajratilishi belgilangan.

Shuningdek, qaror asosida qishloq xoʻjaligi mahsulotlari yetishtiruvchilari dala chetini oʻzlashtirish va mahsulot yetishtirish uchun zarur boʻlgan urugʻ, koʻchatlar, mineral oʻgʻitlar, kimyoviy preparatlar, moddiy-texnik resurslar bilan taʼminlanadi. Suv bilan taʼminlash uchun nasos va quvurlarni oʻrnatish xarajatlarining 50 foizdan koʻp boʻlmagan qismini qarz oluvchining bank kartalariga oʻtkazish yoʻli bilan 6 oygacha imtiyozli davr bilan 12 oy muddatga yillik Markaziy bankning asosiy stavkasidan 4 foizlik punkt yuqori stavkada kreditlar ajratiladi.

Seminar mobaynida 2025-yil hosili uchun ekilgan gʻalla maydonlarida agrotexnik tadbirlarni oʻz vaqtida va sifatli amalga oshirish, oʻsimlik zararkunanda va kasalliklariga qarshi kurashish, dala chetlaridan samarali foydalanish hamda eksportbop ekin turlarini ekish boʻyicha ham tavsiyalar berildi.

Charos Arslonova, tuman hokimligining Axborot xizmati rahbari.