Xalq deputatlari Amudaryo tuman Kengashining 5 sessiyasi toʻgʻrisida axborot

Joriy yilning 29-yanvar kuni Amudaryo tumani hokimligining majlislar zalida Xalq deputatlari Amudaryo tuman Kengashining 5-sessiyasi boʻlib oʻtdi. Sessiya majlisida deputatlar, tuman hokimi oʻrinbosarlari, mahalla fuqarolar yigʻinlari raislari va OAV vakillari ishtirok etdi.

Sessiyani Xalq deputatlari tuman Kengashi Raisi, tuman hokimi Sobir Xoʻjametov ochdi hamda olib bordi.

Sessiya kotibligiga 5-Oybek saylov okrugidan deputat Dilfuza Oʻrazboyeva saylandi.

Sessiya kun tartibidagi dastlabki masala Amudaryo tumanini kompleks ijtimoiy-iqtisodiy rivojlantirish boʻyicha sektorlar hududlarida amalga oshirilgan ishlar va 2025-yilda amalga oshiriladigan ishlar “Yoʻl xaritalari”ni tasdiqlash toʻgʻrisida boʻlib, ushbu masala yuzasidan sektorlar rahbarlari hisobot berdilar.

1-sektor kotibi Otabek Ollayorovning hisobotida 2019-yil 8-yanvardagi “Hududlarni kompleks ijtimoiy-iqtisodiy rivojlantirish boʻyicha sektorlar faoliyatini yanada takomillashtirishga doir qoʻshimcha chora-tadbirlar toʻgʻrisida”gi Prezident qaroriga asosan 1-sektor hududida 2025-yilda amalga oshirilishi rejalashtirilgan ishlar boʻyicha maʼlumot berildi.

Ushbu masala yuzasidan tuman prokurori – 2-sektor rahbari
Bahrom Masharipovning hisobotida sektor rahbariyati tomonidan aholining turli qatlamlari bilan toʻgʻridan-toʻgʻri muloqotni kengaytirish, mavjud dolzarb muammolarni aniqlash, ularni bevosita joyida bartaraf etish yuzasidan aniq choralar koʻrish maqsadida qator ishlar amalga oshirilayotgani taʼkidlandi. Bunda asosiy eʼtibor sektor hududini ijtimoiy-iqtisodiy rivojlantirish, aholi muammolarini aniqlash va bartaraf etish, “Temir daftar”, “Yoshlar daftari” va “Ayollar daftar”ga kiritilgan ijtimoiy muhofazaga muhtoj oilalar, yoshlar va xotin-qizlarning muammolarini hal etish, ijtimoiy soha obʼektlari va muhandislik-kommunikatsiya tarmoqlarini yaxshilash, aholi bandligini taʼminlash, tadbirkorlikni rivojlantirish, investitsiya loyihalarini amalga oshirish, jinoyatchilikning oldini olish va huquqbuzarliklar profilaktikasi masalalariga qaratilganligi qayd etildi.

3-sektor rahbari – Amudaryo tumani Ichki ishlar boʻlimi boshligʻi Muxammetali Xojamuratovning hisobotida Prezident qarori asosida sektorlar faoliyati uchun masʼul boʻlgan tuzilmalarda sektorlar boʻyicha faoliyatni takomillashtirishga qaratilgan bir qator chora-tadbirlar belgilab berilganligi, jumladan, sektorlar faoliyatiga “tuman (shahar) – viloyat – respublika” tamoyili joriy etilganligi, unga koʻra, hokimliklar, prokuratura, ichki ishlar va soliq idoralarida sektorlar boʻyicha vertikal boshqaruv tizimi yoʻlga qoʻyilganligi qayd etildi.

Kun tartibidagi masala yuzasidan 4-sektor rahbari – Amudaryo tumani soliq inspektsiyasi boshligʻi Jahongir Rahimovning hisobotida aholining shikoyat va murojaatlari, takliflarini oʻrganish, aholini qiynayotgan muammolarni joyida hal etish maqsadida korxona-tashkilotlar bilan hamkorlikda 2024-yil davomida 75ta sayyor qabul oʻtkazilgani, ushbu sayyor qabullarda jami 341ta murojaatlar kelib tushgani, ushbu murojaatlarning 292tasi, yoki 85,6 foizi ijobiy hal qilingani, 49 nafar murojaatchilarga esa tushuntirishlar berilgani qayd qilindi.

Sessiya majlisida Amudaryo tumani Adliya boʻlimi boshligʻi Mansur Sadikov Prezidentimiz tomonidan 2022-yil 17-martda qabul qilingan “Fuqarolarning huquq va erkinliklarini taʼminlash hamda huquqiy xizmat koʻrsatishda adliya organlari va muassasalari faoliyati samaradorligini yanada oshirish chora-tadbirlari toʻgʻrisida”gi Farmoni hamda 2022-yil 18-martdagi “Yuridik xizmat koʻrsatish markazlari faoliyatini yanada kengaytirish boʻyicha qoʻshimcha chora-tadbirlar toʻgʻrisida”gi 173-sonli qarori ijrosini taʼminlash borasida tumanda amalga oshirilayotgan ishlar hamda kelgusidagi rejalar xususida soʻz yuritdi.

Sessiyada Yoshlar ishlari agentligi Amudaryo tumani boʻlimi boshligʻi Bekzod Oʻrinboyev yoshlarni har tomonlama qoʻllab-quvvatlash borasida amalga oshirilgan ishlar hamda kelgusidagi rejalar yuzasidan hisobot berdi. Hisobotda “Yoshlar balansi” asosida 2024-yil yanvar-fevral oylarida mahallalarda 14-30 yosh oraligʻida 53 ming 940 nafar yoshlar xatlovdan oʻtkazilib, ijtimoiy ahvoli, qobiliyati hamda qiziqishlariga qarab 7 toifaga ajratilgani, 23 ming 216 nafar yoshlarning roʻyxati shakllantirilib, 6 nafari huquq-tartibot organlariga biriktirilgani va shu asosda tegishli ishlar tashkil etilgani taʼkidlandi.

Sessiya kun tartibiga kiritilgan barcha masalalar atroflicha muhokama qilindi, hisobotlar va fikr-mulohazalar, takliflar tinglanib, tegishli qarorlar qabul qilindi.

Shuning bilan xalq deputatlari Amudaryo tuman Kengashining beshinchi sessiyasi oʻz ishini yakunladi.

Charos Arslonova, tuman hokimligining Axborot xizmati rahbari.