Xalq deputatlari Amudaryo tuman Kengashi deputatlari bilimlarini oshirishga bagʻishlangan oʻquv-seminari oʻtkazildi

Yangi Oʻzbekistonda olib borilayotgan islohotlar bugun oʻzining ijobiy natijalarini bermoqda. Buni deyarli barcha sohalar misolida koʻrish mumkin. Bilamizki, xalq bilan muloqot qilish, xalqning ichiga kirib borgan holda insonlarni qiynab kelayotgan muammolarga yechim topish, aholini rozi qilish kechiktirib boʻlmas, muhim masaladir. Bunda davlat va xalq oʻrtasida ishonchli koʻprik boʻlib kelayotgan deputatlarning oʻrni alohida.

Xabaringiz bor, mamlakatimizda 2024-yil 27-oktyabr kuni Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi, xalq deputatlari viloyat, shahar va tuman kengashlariga deputatlar saylovi boʻlib oʻtdi. Saylovda har bir fuqaro oʻzining yorqin kelajagi yoʻlida, orzu-umidlari roʻyobi uchun ovoz berdi. Albatta, yangi saylangan xalq vakilida deputatlik faoliyati, uning huquq va majburiyatlari, vazifalar nimalardan iborat ekanligi boʻyicha bir qancha savollar tugʻilishi yoki takliflar boʻlishi mumkin. Bunda deputatlarning bilimini oshirishga qaratilgan oʻquv seminarlari muhim ahamiyat kasb etadi.

Qoraqalpogʻiston Respublikasi Joʻqorgʻi Kengesining 2025-yil 13-yanvar kungi xatiga asosan, Amudaryo tumani hokimligi binosining majlislar zalida xalq deputatlari tuman Kengashi deputatlari bilimlarini oshirishga bagʻishlangan oʻquv seminari boʻlib oʻtdi.

Seminarda Qoraqalpogʻiston Respublikasi Joʻqorgʻi Kengesi qoʻmitasi raisi, deputat Sharapat Otemisov, mamlakatimizda faoliyat yuritayotgan 5ta siyosiy partiyalarning Qoraqalpogʻiston Respublikasi Kengashlari masʼullari, shuningdek, xalq deputatlari Amudaryo tuman Kengashi deputatlari, tuman siyosiy partiyalari rahbarlari va ommaviy axborot vositalari vakillari ishtirok etdi.

Seminarni Xalq deputatlari Amudaryo tuman Kengashi kotibiyati mudiri Mansur Oʻrazboyev ochdi va olib bordi.

Oʻquv-seminari davomida deputatlarga odob-axloq qoidalari, ularning huquq va majburiyatlari, huquqni qoʻllash amaliyoti, shuningdek, deputat soʻrovi, senatorlar va deputatlarning “mahalla yettiligi” vakillari bilan hamkorligi, xalq murojaatlarini inobatga olish, aholi muammolariga yechim topish kabi koʻplab masalalar yuzasidan tushunchalar berildi.

Shuningdek, deputatlar oʻzlarining ish rejalarini, media rejalarini tuzishi, ommaviy axborot vositalari bilan hamkorlikda faoliyat olib borishi, qabul qilinayotgan Davlat dasturlarining oʻz okrugidagi ijrosini nazorat qilishi hamda 2026-yilgi Respublika va mahalliy byudjetlarga takliflar kiritishi boʻyicha bir qator topshiriqlar berildi. Deputatlar seminar davomida masʼullarga oʻzlarini qiziqtirgan masalalar boʻyicha savollar bilan murojaat qilib, tegishlicha javoblar oldilar.

Albatta, oʻtkazilayotgan bu kabi oʻquv seminarlari deputatlarning oʻz faoliyatlarida qoʻl kelib, ularning bilimi va salohiyatini yanada oshirishi bilan ahamiyatlidir.

Aziza Madrahimova