34-sonli maktabda deputatlikka nomzodlarning saylovchilar bilan uchrashuvi boʻlib oʻtdi

Saylovlar demokratik davlatlarning asosiy tamoyillaridan biri hisoblanadi va fuqarolik jamiyatining rivojlanishida muhim rol oʻynaydi. Ular orqali fuqarolar oʻzlarining siyosiy irodasini ifoda etishadi va davlat hokimiyatining vakillik organlarini shakllantirishda ishtirok etadilar.

2024-yilning 27-oktyabr kuni Oʻzbekistonda muhim siyosiy jarayon – Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari mahalliy kengashlariga saylovlar oʻtkaziladi. Saylovlar Oʻzbekiston Respublikasi Konstitutsiyasining 128-moddasi va Saylov kodeksiga muvofiq ochiq va oshkora tarzda oʻtkaziladi.

Ayni kunlarda mamlakatimizdagi barcha siyosiy partiyalar va deputatlikka nomzodlar saylovoldi tashviqoti doirasida hududlarda aholi bilan uchrashuvlar oʻtkazmoqda. Amudaryo tumanidagi 34-sonli maktabda ham deputatlikka nomzodlarning saylovchilar bilan uchrashuvi boʻlib oʻtdi. Uchrashuvda Oʻzbekiston Respublikasi Oliy Majlisi Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari Amudaryo tuman Kengashi deputatligiga nomzodlar, ularning ishonchli vakillari va saylovda ishtirok etayotgan 5 ta siyosiy partiyalarning vakillari ishtirok etdi.

Dastlab deputatlikka nomzodlarning ishonchli vakillari soʻzga chiqib, nomzodlarning tarjimai holi va saylovoldi dasturlari bilan tanishtirdi. Deputatlikka nomzodlar oʻzlari mansub boʻlgan siyosiy partiyalarning maqsad va vazifalari, saylovoldi dasturi haqida maʼlumotlar berdi.

Aytish joizki, saylovlarda ishtirok etish har bir fuqaroning konstitutsiyaviy huquqi hisoblanadi va bu demokratik jarayonlarning ajralmas qismidir. Joriy yilgi Parlament va mahalliy kengashlar deputatligiga boʻlib oʻtadigan saylov mutlaqo yangicha Konstitutsiyaviy muhitda oʻtayotganligi bilan ahamiyatlidir. Oliy Majlis Qonunchilik palatasi deputatligiga saylovlarning aralash saylov tizimi asosida oʻtkazilishi jarayonlarning eng muhim bosqichlaridan hisoblanadi.

Bundan tashqari, joriy yilgi saylovlar yangi qabul qilingan Saylov kodeksi asosida oʻtkaziladi. Ushbu hujjatda saylovlarni umumeʼtirof etilgan xalqaro standartlar va printsiplar asosida demokratik, ochiq-oshkora oʻtkazishga xizmat qiladigan oʻttizdan ortiq yangi norma va qoidalar joy olgan. Ilgari amalda boʻlgan koʻplab cheklovlar chiqarib tashlangan. Saylovlardagi har bir ovoz eʼtiborga olinadi va har bir fuqaro davlat hokimiyati vakillik organlarini shakllantirishda bevosita ishtirok etadi. Saylovlarda ochiqlik, oshkoralik va shaffoflik amalda keng taʼminlanadi. Bu – uchastka saylov komissiyalaridan to Markaziy saylov komissiyasigacha – barcha darajadagi saylov komissiyalari oʻz ishini yuksak masʼuliyat va eng yuksak demokratik printsiplar asosida amalga oshirishida oʻz ifodasini topadi.

Tadbirda mahalla faollari soʻzga chiqib, saylovchilarni oʻzlari munosib deb bilgan partiyalar va nomzodlarga ovoz berishga hamda saylovda faol ishtirok etishga chaqirdilar. Qayd qilinganidek, saylovlarda ishtirok etish har bir fuqaroning siyosiy faolligini namoyon qilish va mamlakat kelajagiga taʼsir koʻrsatish imkoniyatini beradi. Shu bilan birga, saylovlar natijalari mamlakatning kelgusi yillardagi siyosiy yoʻnalishini belgilab beradi va deputatlarga xalq manfaatlarini ifoda etishlari uchun masʼuliyat yuklaydi.

Konstitutsiyamizning 36-moddasiga muvofiq, Oʻzbekiston Respublikasining fuqarolari jamiyat va davlat ishlarini boshqarishda bevosita hamda oʻz vakillari orqali ishtirok etish huquqiga ega. Shunday ekan, har bir saylovchini davlat organlarini demokratik tarzda shakllantirishdek muhim siyosiy jarayonda ishtirok etishga, saylovlarda oʻzlari munosib deb bilgan siyosiy partiya va nomzodlarga ovoz berishga chaqirib qolamiz.