Qoraqalpogʻiston Respublikasi Vazirlar Kengashi Raisining navbatdagi sayyor qabuli Amudaryo tumanida boʻlib oʻtdi

Sayyor qabul – fuqarolar bilan muloqot qilish, ularning hayotiy ehtiyojlarini oʻrganish, muammolariga ijobiy yechim topishda muhim oʻrin tutadi. Mamlakatimizda rahbarlarning xalqni qiynab kelayotgan muammolarni joyiga borib oʻrganish, xalq bilan yaqin aloqa oʻrnatish maqsadida hududlarga chiqqan holda sayyor qabullar tashkil etish tizimi yoʻlga qoʻyilgan boʻlib, ana shunday qabul jarayoni Amudaryo tumanining Qilichboy ovulida ham tashkil etildi. Qoraqalpogʻiston Respublikasi Vazirlar Kengashi Raisi Farhod Ermanov ishtirokida boʻlib oʻtgan sayyor qabulda tuman hokimi Sobir Xoʻjametov, respublika hamda tumandagi barcha sohalar boʻyicha masʼullar hamda hududda yashovchi aholi vakillari ishtirok etdi.

Taʼkidlash joizki, hududlarda oʻtkazilayotgan sayyor qabullar va aholi vakillari bilan muloqotlar odamlarni qiynayotgan muammolarini hal etish, ogʻirini yengil qilishdamuhim vosita boʻlib, fuqarolarning davlatga, ertangi kunga boʻlgan ishonchini mustahkamlamoqda. Turli darajadagi davlat hokimiyati va boshqaruv organlari rahbarlarining aholi vakillari bilan muloqotlari odamlarning orzu-istaklari, talab va ehtiyojlarini oʻrganish, ularga imkon qadar koʻmak berish, mavjud muammolarga oʻz joyida yechim topish imkonini bermoqda.

Sayyor qabul jarayonida fuqarolardan turli masalalar yuzasidan koʻplab murojaatlar kelib tushdi. Xususan, fuqarolardan biri Ayoqchi mahallasida joylashgan katta yoʻlga 1,5 km piyodalar yoʻlakchasi qurib berishda hamda Posbon koʻchasidan Salomat koʻchasigacha oraliqda 180 metr uzunlikda piyodalar yoʻlakchasi qilishda yordam soʻragan boʻlsa, yana biri Qilichboy ovulidagi 4- Ibrayim Yusupov koʻchasini asfalt qilib berishda amaliy yordam soʻrab murojaat qiladi. Shuningdek, Qilichboy ovulida yashovchi Zamira Eshimmetovaning ovuldagi 5-Avesto koʻchasiga elektr energiyasi yetkazib berishni yaxshilash boʻyicha soʻrab qilgan murojaati jarayonning oʻzida ijobiy yechimi topdi.

Qolaversa, fuqarolar mahallasidagi bogʻchaga boradigan yoʻllarni taʼmirlash, mahallaga 250-oʻrinli bogʻcha qurib berish, eski koʻprikni taʼmirlab berish, tadbirkorlik qilish uchun yer maydoni ajratib berish, hovlisining ichidagi transformatorni boshqa joyga koʻchirib berish, 70-sonli maktab oldidagi yoʻl yoqasiga piyodalar yoʻlakchasi qurish kabi qator masalalar bilan murojaat qildilar.

Qabul jarayonidagi aksariyat murojaatlar joyida oʻzining ijobiy yechimini topdi. Yechimi maʼlum vaqt talab qiladigan murojaatlar Qoraqalpogʻiston Respublikasi Vazirlar Kengashi Raisining shaxsiy nazoratiga olinib, tez fursatda ularni ijobiy hal etish boʻyicha tegishli soha rahbarlariga topshiriqlar berildi.

Yurtimizda “Inson qadri uchun” tamoyili asosida oʻtkazilayotgan bunday sayyor qabullar fuqarolar hayotida uchrayotgan va ularni qiynayotgan muammolarga yechim topishda hamda xalqimizning bugungi kunidan rozi boʻlib yashashi yoʻlida yana bir amaliy qadam boʻladi. Zero, inson manfaatlarini taʼminlash uchun avvalo, odamlar bilan, xalq bilan muloqot qilish, ularning hayotiy muammo va ehtiyojlarini yaxshi bilish alohida ahamiyat kasb etadi.

Charos Arslonova, tuman hokimligining Axborot xizmati rahbari.