Xitoy ovulidagi oilaviy poliklinika binosi mukammal taʼmirlanib, foydalanishga topshirildi

Qishloq joylarda birlamchi tibbiyot muassasalari aholining salomatligini saqlashda muhim ahamiyat kasb etadi. Ular kasalliklarning oldini olish, profilaktika ishlari va patronaj xizmatlarini amalga oshirishda asosiy oʻrin tutadi. Shu sababli ham keyingi yillarda hududlardagi birlamchi tibbiy-sanitariya yordami muassasalari faoliyatini takomillashtirishga qaratilgan qator qarorlar qabul qilinib, islohotlar amalga oshirilmoqda. Natijada aholiga yuqori sifatli tibbiy xizmat koʻrsatish, shuningdek, kasalliklar profilaktikasi va sogʻlom turmush tarzini targʻib qilish ishlari yangi bosqichga koʻtarilmoqda.

Amudaryo tumanining olis Xitoy va Boʻz yop ovullari hamda ushbu ovullar tarkibidagi mahallalar aholisiga xizmat koʻrsatuvchi 6-sonli oilaviy poliklinikasi binosi ancha eskirgani bois, bu yerda aholiga birlamchi tibbiy xizmatni sifatli va aʼlo darajada koʻrsatish borasida qiyinchiliklar kuzatilayotgan edi. Tibbiy muassasalarni bosqichma-bosqich qurish va rekonstruktsiya qilish boʻyicha maxsus dastur asosida mazkur 6-sonli oilaviy poliklinika binosi ham mukammal taʼmirlanib, 23-sentyabr kuni foydalanishga topshirildi.

Muassasa binosining ochilish marosimida tuman hokimi Sobir Xoʻjametov, tuman faollari va ovul ahli ishtirok etishdi. “Mangʻit ideal qurilish” MChJ tomonidan 750 mln soʻm mablagʻ evaziga amalga oshirilgan mazkur rekonstruktsiya va mukammal taʼmirlash ishlari binoga yangicha qiyofa baxsh etib, nafaqat sifatli birlamchi tibbiy xizmat uchun sharoit yaratdi, balki ovulning koʻrkam inshootlari sonini yana bittaga koʻpaytirdi.

Binoning ochilish marosimida soʻz olganlar – tuman hokimi Sobir Xoʻjametov, mehnat faxriysi, mahalla faoli Tursunboy Abdullayev va boshqalar taʼkidlaganlaridek, mamlakatimizda aholi, ayniqsa olis qishloqlarda yashovchi fuqarolar salomatligini saqlash davlatimizning doimiy diqqat markazidagi masala boʻlib kelmoqda. Soʻnggi yillarda sogʻliqni saqlash tizimida amalga oshirilgan islohotlar natijasida aholining salomatligi va koʻrsatilayotgan tibbiy xizmatlar hajmi yil sayin ortib bormoqda. Bu esa oʻrtacha umr davomiyligining oshishiga ham zamin yaratmoqda.

Ochilish marosimidan keyin mehmonlar poliklinika binosiga kirib, bu yerda tabbiyot xodimlarining faoliyat yuritishlari uchun yaratilgan sharoitlar va tashrif buyuruvchilar uchun yaratilgan qulayliklar bilan yaqindan tanishdilar.

Aytish joizki, Amudaryo tuman tibbiyot birlashmasiga qarashli mazkur 6-sonli qishloq oilaviy poliklinikasi 4ta hudud – Xitoy va Boʻz-yop ovullari hamda Tor-yop va Namuna mahallalaridagi jami 3039ta xonadonda yashovchi 16 ming 791 nafar aholiga birlamchi tibbiy yordam koʻrsatadi. Aholining 8 ming 541 nafari erkaklar, 8 ming 250 nafari esa ayollardir. Ulardan 14 yoshgacha boʻlganlar soni 5 ming 39 nafarni, 15-17 yoshlilar soni 907 nafarni, 18 yoshdan kattalar soni esa 10 ming 845 nafarni tashkil qiladi. Poliklinikaning xizmat hududida yashovchi 1 yoshgacha boʻlgan chaqaloqlar 432 nafar, tugʻish yoshidagi ayollar esa 4 ming 279 nafarni tashkil qiladi.

Bu kabi katta hududda yashovchi koʻp sonli aholiga sifatli birlamchi tibbiy xizmat koʻrsatish uchun 6-sonli oilaviy poliklinikada 8ta tibbiy brigada tashkil etilgan boʻlib, ular tarkibida 8 nafar oila shifokorlari, 16 nafar patronaj hamshirasi, 8 nafar umumiy amaliyot hamshirasi, 4 nafar tibbiy brigada doyasi hamda 5 nafar tor doiradagi shifokorlar, yaʼni akusher-ginekolog, jarroh, stomatolog, ultratovush tahlili shifokori, vrach-laborantlar faoliyat olib boradi. Bundan tashqari, poliklinikada 4-oʻrinli kunduzgi statsionar ham tashkil etilgan.

Ishonamizki, yangi binoda faoliyatini davom ettirayotgan oilaviy poliklinikaning mehnat jamoasi oʻz kasblarini sidqidildan, fidoyilik bilan bajarib, aholi salomatligini saqlash yoʻlida yanada samarali ish olib boradilar.

amunews.uz