Халқ депутатлари Амударё туман Кенгашининг 72-сессияси тўғрисида ахборот
2024 йил 25 апрель куни Амударё тумани ҳокимлиги биносида Халқ депутатлари туман Кенгашининг навбатдаги – 72-сессияси бўлиб ўтди. Сессияда туман ҳокими ўринбосарлари, ҳокимлик масъул ходимлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди.
Сессияни Халқ депутатлари туман Кенгаши раисининг ўринбосари Ғуломжон Ешниёзов очди ва олиб борди. Сессия котиблигига 2-Чордара сайлов округидан депутат Муяссар Раҳматуллаева сайланди.
Сессия кун тартибидаги дастлабки масала юзасидан туман ҳокимининг қурилиш, коммуникациялар, коммунал хўжалиги, экология ва ободонлаштириш масалалари бўйича ўринбосари Баҳодир Ерназаров ҳисобот берди. Ҳисоботда “Ташаббусли бюджет”нинг жорий йилги 1-мавсумида овоз бериш якунларига кўра энг кўп овоз тўплаган 12 та ташаббус ғолиб деб топилиб, ушбу ташаббусларни молиялаштириш учун бюджетдан жами 15 млрд 820 млн сўм ажратилгани қайд этилди.
Сессия кун тартибидаги навбатдаги масала юзасидан туман ҳокимининг ўринбосари – инвестициялар ва ташқи савдо бўлими бошлиғи Фахриддин Юсупов ҳисобот берди. Ҳоким ўринбосари депутатларга ҳудудий инвестиция дастурининг бажарилиши, тадбиркорликни янада ривожлантириш учун қабул қилинган Президент фармонларининг ижроси ҳамда хорижий инвестицияларни жалб қилиш бўйича амалга оширилаётган ишлар ҳақида батафсил маълумотлар берди.
Кун тартибидаги навбатдаги масала муҳокамасида Ўзбекистон Республикаси Президентининг Амударё туманидаги Халқ қабулхонаси мудири Анвар Оразбаев ҳисобот берди. Ҳисоботда Халқ қабулхонаси томонидан секторлар, давлат органлари ва бошқа ташкилотларнинг уйма-уй юриш, мурожаатлар билан ишлаш, ижтимоий ва бошқа объектларда аниқланган муаммоларни ҳал қилиш борасидаги фаолиятини тизимли ўрганиш бўйича 2024 йилнинг биринчи чораги давомида амалга оширилган ишлар таҳлил қилинди.
Сессияда туман Ички ишлар бўлими бошлиғи Жамаладдин Юсупов Амударё туманида 2024 йилнинг ўтган 3 ойи давомида жиноятчилик ва ҳуқуқбузарликларнинг олдини олиш ҳамда уларнинг профилактикасини ташкил этиш бўйича амалга оширилган ишлар юзасидан ҳисобот берди. Ҳисоботда ҳудудлар кесимида жиноятчилик даражаси таҳлил қилиниб, келгусида ҳуқуқбузарликлар ва жиноятчиликнинг олдини олиш бўйича таклифлар билдирилди.
Депутатлар “2024 йилда туман аҳолисини, ижтимоий соҳа объектлари ва иқтисодиёт тармоқларини энергия ресурслари билан барқарор таъминлаш тўғрисида”ги масалани ҳам кўриб чиқди. Ушбу масала юзасидан “Амударётумангаз” газ таъминоти бўлими бош муҳандиси Ойбек Мадаминов, Амударё тумани электр таъминоти корхонаси бошлиғи Жасурбек Салаевлар ҳисобот берди.
Ҳисоботларда масъуллар истеъмолчиларнинг табиий газ ва электр энергиясига бўлган талабини узлуксиз таъминлаш, технологик йўқотишлар ҳажмини камайтириш, тармоқларни таъмирлаш, тежамкор технологияларни жорий қилиш, янги истеъмолчиларни тармоққа улаш бўйича 2024 йилга режалаштирилган чора-тадбирлар ҳақида батафсил маълумотлар берди.
Сессия сўнгида Ўзбекистон Республикаси Президентининг 2024 йил 5 апрелдаги “Ёшларга ер ажратиш орқали уларнинг даромадини ошириш ва бандлигини таъминлаш, шунингдек, янги ер майдонларини ўзлаштириш чора-тадбирлари тўғрисида”ги Президент қарори ижросини таъминлаш мақсадида ҳокимлик захира ер фонди ҳисобидаги умумий майдони 401,6 гектар бўлган экин майдонларини “e-auksion” электрон платформасига қўйиш масаласи муҳокама қилинди. Ушбу масала бўйича туман Фермер, деҳқон хўжаликлари ва томорқа ер эгалари кенгаши раиси Илҳом Полвонов ахборот берди.
Кун тартибидаги барча масалалар депутатлар томонидан муҳокама қилиниб, халқ депутатлари Амударё туман Кенгашининг тегишли қарорлари қабул қилинди.
Шунинг билан сессия ўз ишини якунлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
