36-СОНЛИ МАКТАБНИНГ БОШЛАНҒИЧ СИНФ ЎҚУВЧИЛАРИ ИШТИРОКИДА “МЕҲРИБОНИМ ОНАМ” НОМЛИ ТАДБИР ЎТКАЗИЛДИ
Баҳорнинг илк кунларида бўлиб ўтадиган Халқаро хотин-қизлар куни – гўзаллик ва нафислик, онажонлар байрами сифатида юртимизда кенг нишонланади. Ушбу байрамда оналарга, аёлларга ва қизларга самимий тилаклар айтилиб, гуллар, совғалар берилади, байрам хурсандчиликда ўтказилади.
Байрам муносабати билан 36-сонли мактабда ҳам 1-“А” синф ўқувчилари иштирокида “Меҳрибоним онам” деб номланган тадбир ўтказилди. Мактаб ўқитувчи ва ўқувчилари, ота-оналар ташриф буюрган ушбу тадбирни маънавият-маърифат масалалари бўйича директор ўринбосари Ваҳобжон Давлетов очиб берди ва барча аёл-қизларни ёшлик ва яшариш, гўзаллик тимсоли бўлган баҳорнинг биринчи кунларида нишонланаётган қутлуғ байрам билан табриклади. Ушбу гўзал айём бутун дунёда кенг нишонланишини айтиб, Шарқнинг бебаҳо анъаналарига мос равишда юртимизда меҳри дарё оналаримиз, севимли аҳли аёлларимиз, азиз опа-сингилларимизнинг бу байрами қадимий урф-одатларимиз, баҳор байрамлари билан уйғунлашиб, ўзгача тароват касб этишини таъкидлаб ўтди.
Шундан сўнг, байрам тадбирининг мусиқий қисмини 1-“А” синф ўқувчиси Исломжон Абдувосиев “Қироличам онам” қўшиғи билан бошлаб берди. Моҳинур Бахтиёрова ижросидаги “Онажоним” қўшиғи, Марҳабо Ҳайтбоеванинг лазги рақси ҳам кайфиятларни янада кўтарди. Шоира Шавкатованинг “Гуллола” қўшиғига, Моҳира Азимжонова, Ирода Нуржонова, Олтиной Чаршамбоева, Диёра Саъдуллаева, Мадина Ўринбоева, Севинч Баҳодировалар чиройли рақс тушиб, барчага хушнудлик улашишди.
Ундан ташқари, Улуғбек Абдукаримов ва Беҳруз Янгибоевлар “Андижон полкаси”га рақс тушиб, томошабинларни жуда хурсанд қилишди. Нигина Жабборберганова, Беҳруз Ғайратовлар ижросидаги “Ака-сингил” қўшиғи ҳам барчага ниҳоятда манзур бўлди.
Тадбир давомида синфдаги барча ўқувчилар қатнашиб, она, ўзбек аёли, фаришта бувижонлар ҳақида шеърлар айтиб, файз киритишди.
Мактабнинг бошланғич синф ўқувчилари иштирокида ташкил этилган “Меҳрибоним онам” тадбири жуда қизиқарли ўтди.
Барно Матсапаева, 36-сонли мактабнинг бошланғич синф ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
