Чойкўл овулида туман ҳокимининг сайёр қабули бўлиб ўтди

Сўнгги йилларда мамлакатимизда “Халқ давлат идораларига эмас, давлат идоралари халқимизга хизмат қилиши керак” тамойили асосида кенг кўламли ишлар амалга оширилмоқда. Ушбу ҳаётбахш тамойил асосида олиб борилаётган ишлар натижасида жойларда сайёр қабуллар ўтказилиб, одамларни қийнаб келаётган кўплаб муаммоларга ечим топилмоқда. Бу эса аҳолига қулай яшаш шароитлари яратиш, маҳаллалар инфратузилмасини янада яхшилаш имконини бермоқда. Шу билан бирга аҳолининг давлат идораларига бўлган ишончи ортиб бормоқда.

Жорий йилнинг 1 февраль санасида Амударё тумани Чойкўл ОФЙда жойлашган 22-сонли мактаб биносида ҳам туман ҳокими Собир Хўжаметовнинг сайёр қабули ўтказилди.

Сайёр қабулда 3-сектор раҳбари – туман Ички ишлар бўлими бошлиғи Жамоладдин Юсупов, туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодир Камолов, корхона-ташкилотлар раҳбарлари, банклар масъуллари, овул фуқаролар йиғини раиси, хотин-қизлар фаоли, ёшлар етакчиси ҳамда фуқаролар иштирок этдилар.

Шу ўринда қайд этиш жоизки, ҳудудларни ободонлаштириш, аҳоли турмуш шароитини яхшилаш, уларнинг муаммоларини ҳал этиш юзасидан ташкил этилаётган сайёр қабулларда аҳоли томонидан билдирилган мурожаатлар ўрганилиб, муаммо ва камчиликларни бартараф этиш орқали инсонларнинг яшаш шароитлари тобора яхшиланмоқда.

Мазкур сайёр қабул давомида ҳам фуқаролардан бир қатор мурожаатлар келиб тушди. Жумладан, ўқувчиларнинг мактабга қатнашларидаги хавсизлиги учун йўл ва йўлак қурилиши, табиий газ етишмовчилиги, талаба ёшларнинг тўлов шартнома пулларини тўлашдаги қийинчиликлар, муддатли ҳарбий хизмат бадал пулини тўлашдаги муаммолар, бетоб фарзандини даволатишда ёрдам, Чойкўл ОФЙ Маданият уйини таъмирлаш ва бошқа масалаларда билдирилган мурожаатлар шулар жумласидандир.

Барча мурожаатлар тегишли масъулларга йўналтирилди ҳамда улар томонидан ўрганилиб, ҳал қилинадиган бўлди. Шунингдек, сайёр қабул мобайнида фуқароларнинг турли масалалар юзасидан берган саволларига ҳам тегишлича жавоблар ҳамда тушунтиришлар берилди.

Таъкидлаш керакки, мамлакатимизда барча соҳаларда амалга оширилаётган ислоҳотлар, хусусан, турли даражадаги давлат ҳокимияти ва бошқарув органлари раҳбарларнинг аҳоли вакиллари билан мулоқотлари одамларнинг орзу-истаклари, талаб ва эҳтиёжларини ўрганиш, уларга имкон қадар кўмак бериш, мавжуд муаммолар ечимини топишга имкон бермоқда.

Айниқса, масъуллар томонидан одамларнинг муаммо ва ташвишларини ҳал этиш, оғирини енгил қилиш йўлида ташкил этилаётган сайёр қабуллар юртдошларимизнинг эртанги кунга бўлган ишончини мустаҳкамламоқда.

Шу жиҳатдан олиб қараганда, Чойкўл овулида ўтказилган сайёр қабул ҳам аҳолининг турли масалалар юзасидан мурожаатларини тинглаш ва мазкур мурожаатларда айтилган камчиликларни бартараф қилиб, овул аҳолисининг турмуш сифатини янада яхшилашда муҳим восита бўлди.

Туман ҳокимлигининг Ахборот хизмати.