Сайёр қабуллар – мурожаатлар ечимига хизмат қилмоқда

Инсон манфаатларини таъминлаш учун аввало, одамлар билан, халқ билан мулоқот қилиш, уларнинг ҳаётий муаммо ва эҳтиёжларини ўрганиш алоҳида аҳамият касб этади.

Мамлакатимизда  мутасадди раҳбарларнинг аҳолини қийнаб келаётган муаммолар билан ишлашда мурожаатлардаги масалаларни жойларга чиқиб ўрганиши ҳамда уларни ижобий ҳал этиши борасидаги  амалий ишлари янги босқичга кўтарилди.

Бутун мамалакатимиз бўйлаб жойларда турли даражадаги раҳбарларнинг аҳоли билан очиқ мулоқотлари, сайёр қабуллари ташкил этилиб, фуқароларнинг муаммолари ўрганилмоқда ҳамда уларни бартараф қилиш чоралари кўрилмоқда.

Халқ давлат идораларига эмас, давлат  идоралари халқимизга хизмат қилиши керак. Бугун бу фикр шунчаки баландпарвоз гап эмас, давлат органлари олдига қўйилган энг асосий талаблардан бири десак, адашмаган бўламиз.

2023 йил 29 декабрь куни Қорақалпоғистон Республикаси Вазирлар Кенгаши Раиси Фарҳод Эрманов, Қорақалпоғистон Республикаси Вазирлар Кенгаши раиси ўринбосари Марям Аҳмедоваларнинг туманимизнинг Ойбек маҳалласидаги 55-сонли мактабда сайёр қабули ўтказилди.

Мазкур сайёр қабулда секторлар раҳбарлари, туман ҳокими ўринбосарлари, тегишли корхона, ташкилот раҳбарлари ҳамда ўз муаммолари билан туманнинг турли ҳудудларидан келган аҳоли иштирок этишди.

Қабулда 30га яқин фуқаролар ўзларини қийнаб келаётган муаммо ва таклифлари билан мурожаат қилдилар.

Мурожаатлар асосан, кредит олиш, соғлигини тиклаш учун маблағ сўраш, йўлларни таъмирлаш, ичимлик суви тармоғини тортиш, бандлик масалаларида амалий ёрдам берилиши  ва бошқа масалаларда бўлди.

Сайёр қабулда юртимизда амалга оширилаётган кенг кўламдаги бунёдкорлик ишлари, янгидан ишга туширилаётган тадбиркорлик субъектлари, ишлаб чиқариш ва хизмат кўрсатиш корхонлари фақатгина халқ манфаатини таъминлаш, уларнинг яшаш шароитни яхшилаш мақсадида амалга оширилаётганлиги таъкидланди.

Сайёр қабулда мурожаатларнинг ҳеч бири эътибордан четда қолмаслиги ва ҳар бир мурожаат имкон қадар ижобий ечим топиши таъкидланди.

Сайёр қабул давомида Ойбек маҳалласида истиқомат қилувчи фуқаро Нурбек Тажимуратов бандлик масаласи бўйича мурожаат қилди.

Шунингдек, Оқ олтин овулидан Ўринбой Шомуратов уй-жойини таъмирлаш ҳамда моддий ёрдам масаласи бўйича мурожаат қилди.

Сайёр қабулда электр энергияси, ичимлик сув таъминоти, болалар нафақаси, кредит олиш ва бошқа қатор масалалар билан боғлиқ мурожаатларнинг аксарияти жойида ҳал этилди.  Маълум вақт ҳамда атрофлича ўрганишни талаб этадиган мурожаатларни ҳал этиш бўйича мутасадди раҳбарларга тегишли топшириқлар, мурожаат қилувчиларга зарур тушунча ва тавсиялар берилди, ижроси назоратга олинди.

Бу каби тадбирларнинг ўтказилиб, халқ билан фаол ва очиқ мулоқотлар олиб борилишида, аввало инсон ҳуқуқ ҳамда манфаатларини таъминлаш орқали халқимизнинг фаровон, бахтли ҳаёт кечириши учун муносиб шарт-шароит яратиш мақсад қилинган.

Ҳа, инсон шаъни, қадри улуғ тутилаётган мамлакатимизда амалга оширилаётган барча ислоҳотлардан кўзланган мақсад ҳам  аҳолининг ўз ҳаётларидан рози бўлиб яшашига эришишдир.

Туман ҳокимлиги Ахборот хизмати