Тошёп овулида сайёр қабул ўтказилди

Мамлакатимизда Президентимиз ташаббуси билан ҳудудларда мутасадди раҳбарларнинг аҳолини қийнаб келаётган муаммолари билан ишлаш, мурожаатлардаги масалаларни жойларга чиқиб ўрганиш ҳамда уларни ижобий ҳал этиш тизими янги босқичга кўтарилди.

Туманимиз бўйлаб секторлар раҳбарлари томонидан ўтказилиб келинаётган сайёр қабуллар оворагарчиликларнинг олдини олиш, муаммоларни имкон қадар тезкор ҳал этишда муҳим аҳамият касб этаётир.

2023 йил 14 ноябрь куни 4-сектор ҳудудидаги Тошёп овулида сектор раҳбари – Давлат солиқ инспекцияси бошлиғи Жаҳонгир Раҳимов, Ўзбекистон Республикаси Президентининг туман халқ қабулхонаси мудири Эркин Ражабов иштирокида сайёр қабул бўлиб ўтди.

Унда тегишли соҳа вакиллари ҳамда овул фуқаролар йиғини масъуллари, “Аёллар дафтари”га киритилган аёл-қизлар, “Ёшлар дафтари”га киритилган ёшлар ҳамда аҳоли вакиллари иштирок этди.

Сайёр қабул жараёнида аҳоли вакилларининг турли мазмундаги муаммоли масалалари юзасидан 9та мурожаатлар қабул қилинди. Мурожаатлардаги масалалар асосан ижтимоий ва моддий ёрдам олиш, тадбиркорлик фаолияти билан шуғулланиш учун кредит олишда амалий ёрдам сўраш, бандлигини таъминлаш, электр таъминотидаги муаммоларни ҳал этиш, ободонлаштириш ва ички йўлларни таъмирлаш масалаларида амалий ёрдам сўраш мазмунида бўлди. Қатор масалалар сайёр қабул жараёнининг ўзидаёқ ижобий ечимини топди.

Мурожаатларнинг 4таси жойида қаноатлантирилди ҳамда 3тасига асосли тушунчалар берилди. Қолган 2та мурожаат тегишлилиги бўйича идора ва ташкилотларга юборилиб, ижроси назоратга олинди.

Сектор раҳбари – Давлат солиқ инспекцияси бошлиғи Жаҳонгир Раҳимов муддат талаб қиладиган мурожаатлардаги масалаларни ижобий ҳал этиш юзасидан тегишли масъулларга топшириқлар бериб, аҳоли муаммолари билан ишлашда самарали тизим ҳисобланган “маҳаллабай” ишлаш, айниқса, “Темир дафтар”, “Аёллар дафтари” ва “Ёшлар дафтари”га киритилган оилалар, фуқаролар билан манзилли ва натижали ишлаш бўйича масъулларга тегишли топшириқлар ҳамда тавсиялар берди.

Мамлакатимизда инсон манфаатларини таъминлаш, турмуш сифати ва фаровонлигини ошириш учун аввало, уларнинг дард-у ташвишлари, орзу-ниятлари, ҳаётий муаммо ва эҳтиёжларини ўрганишга алоҳида эътибор қаратилмоқда. Шу мақсадда халқ билан очиқ мулоқотлар олиб борилиб, инсонлар ҳуқуқ ҳамда манфаатларини таъминлаш орқали халқимизнинг фаровон, бахтли ҳаёт кечириши учун муносиб шароитлар яратилаётир. Кейинги йилларда амалга оширилаётган халқ билан очиқ мулоқотлар, ўтказилаётган сайёр қабуллар ва халқ ҳаётини хонадонма-хонадон юриб ўрганишлар мамлакатимизни ҳар томонлама ривожлантириш йўлида муҳим восита бўлмоқда.

Сайёр қабул якунланганидан сўнг сектор раҳбари – Давлат солиқ инспекцияси бошлиғи Жаҳонгир Раҳимов Тошёп овулидаги аҳоли вакиллари билан очиқ мулоқот ўтказдилар ҳамда уларнинг муаммоларини ўргандилар.

Туманимиз бўйлаб ўтказилаётган сайёр қабуллар давлат органлари ва фуқаролар ўртасида мустаҳкам кўприк бўлибгина қолмасдан, аҳолининг ҳукумат раҳбарларига ва давлат идораларига бўлган ишончининг янада мустаҳкамланишига сабаб бўлмоқда.

Туман ҳокимлиги Ахборот хизмати