Ички ишлар органлари ходимлари куни кенг нишонланди

Кейинги йилларда барча соҳалар сингари ички ишлар тизимида ҳам кенг кўламли ва пухта ўйланган ислоҳотлар амалга оширилмоқда. Айниқса, жамиятда қонун устуворлигини таъминлаш, ички ишлар органларини эл-юрт манфаатига хизмат қиладиган чинакам халқчил тизимга айлантириш йўлида катта ишлар олиб борилмоқда.

Ҳар йили мамлакатимизда 25 октябрь Ички ишлар органлари ходимлари куни сифатида кенг нишонланиб келинади. Бу йил Ўзбекистон Республикаси Ички ишлар вазирлиги ташкил этилганига 32 йил тўлди.

Сана муносабати билан 26 октябрь куни Амударё туманидаги “Бек” тўйхонасида байрам тадбири бўлиб ўтди.

Тадбирда туман ҳокими Собир Хўжаметов, секторлар раҳбарлари, туман Ички ишлар бўлими шахсий таркиби, нафақадаги фахрийлар ҳамда жамоатчилик вакиллари иштирок этишди.

Тадбирда туман ҳокими Собир Хўжаметов сўнгги йилларда давлатимиз раҳбари томонидан ички ишлар органларига жуда катта эътибор қаратилиб, соҳани чинакам халқчил тузилмага айлантириш, аҳоли учун барча шаҳар ва қишлоқларда, ҳатто энг чекка жойларда ҳам хавфсиз яшаш ва меҳнат шароитини яратиш мақсадида кенг кўламли ислоҳотлар амалга оширилаётгани ҳақида тўхталиб ўтди ҳамда жамиятимизда қонун устуворлигини таъминлашдек шарафли ва масъулиятли ишга бор куч ва салоҳиятини бағишлаб келаётган соҳа ходимларини, тингловчи-курсантларни ҳамда фахрийларни байрам билан самимий муборакбод этди.

Тадбирда туман Ички ишлар бўлими бошлиғи Жамаладдин Юсупов барча ҳамкасбларини байрам билан самимий табриклаб, тизимда эришилган ютуқлар ва келгусидаги вазифалар ҳақида тўхталиб ўтди. Шунингдек, Амударё тумани Ички ишлар бўлимининг шахсий таркиби иккита энг устувор масалага – жамиятимизда тинчлик ва осойишталикни сақлаш ҳамда аҳоли соғлиғини муҳофаза қилишга доимий равишда алоҳида эътибор қаратиб келаётганлигини таъкидлади.

Тадбирда ўз хизмат вазифасини намунали бажариб, халқимизнинг тинчлиги ва осойишталигини сақлаш йўлида бор куч-ғайратини сафарбар этиб келаётган сафдор Санжар Собиров, Сардор Алламберганов, Анвар Шомуротовларга лейтенант унвони берилди.

Шунингдек, Қорақалпоғистон Республикаси Жўқори Кенгеси Президиумининг 2023 йил 24 октябрь кунги Қарорига мувофиқ, туман ИИБ жиноят қидирув бўлинмаси катта тезкор вакили капитан Улуғбек Пўлатов “Умит ушқини” кўкрак нишони билан, туман ИИБ хотин-қизлар масалалари бўйича катта инспектори лейтенант Инобат Уразматова Қорақалпоғистон Республикаси Оила ва хотин-қизлар қўмитасининг ташаккурномаси билан тақдирланди. Бундан ташқари, бир гуруҳ фаол ва ташаббускор соҳа ходимлари эсдалик совғалари билан тақдирланди.

Тадбир туман Маданият бўлими томонидан тайёрланган концерт дастури билан давом этди. Туманимизнинг таниқли санъаткорлари томонидан она Ватан, тинчлик, дўстлик ва муҳаббатни тараннум этувчи гўзал-куй қўшиқлар янгради.

Ички ишлар тизимида фаолият юритаётган ҳар бир ходим Ватанимизнинг асл ўғлонлари сифатида замонавий билимларни эгаллаган, маънавий ва маърифий дунёси бой, ҳар қандай хавф-хатарга қарши матонат билан курашишга тайёр халқимизнинг чин маънодаги ҳимоячиларидир. Фурсатдан фойдаланиб, тинчлигимиз посбонларини яна бир бора касб байрамлари билан табриклаб, келгуси ишларида зафарлар тилаймиз!

Туман ҳокимлиги Ахборот хизмати.