БОБУР ОВУЛЛИК ОНАХОНЛАР ТАЛҚИНИДАГИ “МИЛЛИЙ ҚАДРИЯТЛАРИМИЗ – ЁШЛАР НИГОҲИДА” ТЕАТРЛАШТИРИЛГАН ТАДБИР БАРЧАГА МАНЗУР БЎЛДИ

Ўсиб келаётган ёш авлодни миллий-маънавий қадриятларга ҳурмат руҳида тарбиялаш, тўйлар, оилавий маросимларни ортиқча сарф-харажатларсиз, тартибли ва мазмунли ўтказишда кўпни кўрган, катта ҳаётий тажрибаларга эга онахонлар билан бамаслаҳат иш тутиш ёшлар қалбида халқимизнинг бой миллий-маданий меросига ҳурмат ва эҳтиром туйғуларини уйғотиши табиий. Чунки халқимизга хос бўлган эзгу фазилатлардан бири – бу интеллектуал мулкни садоқат билан асраб-авайлаш, келгуси авлодларга бус-бутун, гўзал тарзда етказишдир.

Бу борада Амударё туманининг Бобур номли овул фуқаролар йиғини хотин-қизлар фаоли Сабоҳатхон Ражабова томонидан амалга оширилаётган ишлар эътиборга муносиб.

Жорий йилнинг 1 август санасида бўлиб ўтган “Миллий қадриятларимиз – ёшлар нигоҳида” деб номланган театрлаштирилган тадбирда нафақат овул ёшлари, балки тадбир меҳмонлари ҳам олам-олам завқ олдилар. Кўча бошчи аёллар, овулда истиқомат қилувчи нуроний онахонлар, оилавий қадриятларни мустаҳкамлаш бўйича комиссия аъзолари, ёшлар иштирок этган мазкур тадбирда овул онахонлари томонидан асрлар давомида оилалар мустаҳкамлиги, соғлом ва баркамол фарзандлар тарбиялаб, вояга етказиш борасида муҳим аҳамиятга эга бўлган бири-биридан гўзал урф-одат ва анъаналар, оилавий маросимлар, янги келиннинг зиммасидаги бурч ва мажбуриятлари саҳнавий кўринишлар асосида талқин этилгани барчага манзур бўлди.

Хусусан, янги келининг сарполарини тайёрлаш саҳнаси билан бошланган тадбирда онахонлар Гулора Давлатбоева, Гулсара Аллақулова, Иродахон Ортиқовалар бири-биридан бежирим кўрпа-ёстиқлар, кўрпача-ю қуроқ тўшаклар тикиш, қуроқ кўрпачаларда нақш этилган ота-оналар орзуларини маҳорат билан намойиш қилдилар.

Келин-қизнинг дугоналари, ота-онаси билан хайрлашиш маросими янада завқли бўлди. Бу саҳнада келин ролини Шаҳнозахон Эшимова ҳаётий тарзда, ниҳоятда ишонарли қилиб ижро этиб берди. Бу саҳна кўринишида келин янгалари Насибахон Тангриберганова, Марзия Холмуродова, келиннинг дугоналари Муҳайё Алламберганова ҳамда Шоҳистахон Отажоновалар келин қизни ясантириб, қошларига ўсма, кўзларига сурмалар қўйишди. Сунбул сочларини ўриб, даврага олиб чиққанларида табиий гўзалликдан барчанинг кўнгли тўлди, қалбларда ҳавас уйғонди. Ҳатто иштирокчилар томонидан “қизларимизни шундай кийинтириб, ясантириш керак”, деган фикрлар билдирилди.

Шундан сўнг, яна бир онахон Малика опа Шукуруллаева қироат билан ёр-ёрлар айтди. Ёр-ёрлар, эл-юртнинг оқ фотиҳаси билан узатилган келинни тўйхонада анъаналаримизга кўра, бурундиқ энаси тушириб олди. Бурундуқ эна ролини қойилмақом қилиб ижро этган Умидахон Машариповани қутлуғлаб Қизларгул Алламберганова “ҳаммани ҳам шундай тўйга етказсин”, деган маънода келиннинг бошидан сочқилар сочди.

Келинни янги қариндошлари билан таништириш саҳнаси янада қизиқарли таассуротларга бой бўлди. Доира чалиб, жўшқин келин саломлар орқали янги қариндошлар билан таништирув маросимини ўтказган Санамжон Қутлимуродовадан барча миннатдор бўлишди.

Тадбир давомида қайнона ролини маҳорат билан ижро этган Гулсара Қутлимуродова ҳазил-ҳузулларга бой ҳикматли панд-насиҳатлар билан келинини қучоқ очиб кутиб олди ва ўғли ва хонадон осойишта ва саришталигини унга ишониб топширди.

Шундан сўнг, янги келинга иш буюрар маросими ҳам ўтказилиб, момолар томонидан келиннинг қадами шу хонадонга ёғдай ёқсин, деган маънода қўллари ун ва ёғга ботирилиб, уй юмушлари топширилди. Янги келин томонидан тадбир меҳмонлари, Қорақалпоғистон Республикаси аёлларни реабилитация қилиш ва мослаштириш намунали туманлараро Амударё туман маркази директори Гавҳар Чимбойчиева ҳамда Фаровон маҳалласи бўйича ҳоким ёрдамчиси Муқаддас Бекназаровалар учун чой бериш маросими ўтказилди. Меҳмонлар келиннинг хуш муомамаласи ва таъзимидан мамнун бўлдилар.

Ушбу маросимдан сўнг Сафаргул она Дошанова ёшларга “тушовкесди” маросимини амалда кўрсатиб берди. “Тушовкесди” маросимида бир яшар қизалоқ Севинчой Исмоилованинг оёқларидаги ип кесилиб, жажжи қизалоқ юриб кетди. Бу – болажонларнинг равон, эркин қадам ташлашлари йўлидаги тўсиқни олиб ташлаш, баркамоллик сари интилишларини қўллаб-қувватлаш маъносини англатгани, ёшлар қалбида миллий-маданий урф-одат, анъана ва маънавий қадриятларга меҳр-муҳаббат туйғуларини янада мустаҳкамлагани билан муҳим аҳамият касб этди.

Тадбир давомида бешик қучган она саҳнаси ва кўнгилларга ажиб ҳаловат бахш этувчи аллалар янграб, барчага хушнудлик бағишлади.

Робия ЙЎЛДОШЕВА.