ЮРТ РАВНАҚИ УЧУН КУРАШИШГА МАСЪУЛМИЗ

Давримиз шиддат билан ривожланмоқда. Ҳар кунимиз янгиланишлар, ўсиш-ўзгаришлар билан кечмоқда. Бугун халқимиз фаровон, энг муҳими, тинч ва осойишта яшамоқда. Аҳолининг турмуш даражаси йилдан-йилга ошмоқда.

Президентимиз И.А.Каримовнинг мамлакатимизни 2014 йилда ижтимоий-иқтисодий ривожлантириш якунлари ва 2015 йилга мўлжалланган иқтисодий дастурнинг энг муҳим устувор йўналишларига бағишланган Вазирлар Маҳкамасининг мажлисидаги маърузасини тинглар эканман, бир воқеа эсимга тушди.

Истиқлолнинг илк йиллари эди. Аҳоли учун зарур маҳсулотлар жон бошига ҳисоблаб, тарқатилар эди. Турмуш ўртоғи бевақт вафот этиб, болалари ёш қолган ҳамкасб опамиз навбатга ёзилади-ю, вақтида улгура олмай, унини ола олмайди. Дарсим тугагач, ўқитувчилар хонасига кирсам, у кўз ёшини тўхтата олмай йиғлар, ёнидаги муаллимлар унга тасалли беришарди. Шунда ёши улуғ ўқитувчилардан бири: "Шукр қилинглар, ҳали бу кунлар ҳам ўтиб кетади, ун дегани уйларимизда қоплари билан туради”, – деди. Ўшанда унинг гаплари худди эртага амалга ошадигандай енгил тортган, қийналиб қолган ҳамкасбимиз билан боримизни баҳам кўрган эдик.

Бугун дастурхонларимизнинг тўкин-сочинлиги, ҳамюртларимизнинг ҳаётидан мамнунлиги, эртаги кунимиз бундан ҳам яхши бўлиши учун елиб-югуриб меҳнат қилаётган юртдошларимизни кўриб, ризқимизнинг зиёдалигига минг бор шукроналар айтсак арзийди.

Буларнинг барчаси мамлакатимизда узоқни кўзлаб амалга оширилаётган иқтисодий-ижтимоий ислоҳотлар натижаси эканлигини ҳис қиламиз.

2015 йилда мамлакатимизнинг ижтимоий-иқтисодий кўрсаткичларини янада ошириш кўзда тутилмоқда. Юртбошимиз И.А.Каримов ўз маърузаларида бу борадаги устувор вазифаларни санай туриб: "...мақсад-муддаоларимизнинг рўёбга чиқиши, мамлакатимизда тинчлик-осойишталик ва тотувлик муҳитининг барқарор бўлиши барчамизга, ҳар биримизнинг ўз жойимизда бизга ишониб топширилган вазифани қай даражада масъулият билан адо этишимизга боғлиқ эканлигини унутмаслигимизни истардим”,– дедилар. Маърузани тинглаб, юқорида айтганим – 24 йил олдин бўлган воқеа эсимга тушди. Ўша кунларимиз билан бугунги ҳаётимизни солиштирсак, шу ўтган қисқа муддатда мамлакатимизда нечоғлик улкан юксалишларга эришилганини англаш осон бўлади. Бугун халқимиз ризқининг бутунлигини, тинч-осойишта яшаш учун имкониятлар мавжудлигини, юртимизда фаровон яшаш учун бунёдкорлик ишлари давом этаётганлигини ўйлар эканман, бу жараёнлар ҳар биримизга дахлдор эканлигини чуқур ҳис қиламан.

Санобар ХЎЖАМУРОДОВА,

40-сонли мактаб директори, халқ депутатлари туман Кенгаши депутати.

(Фото - http://www.uza.uz)