Коррупцияга қарши курашишга қаратилган лойиҳалар тақдимоти ўтказилди
Ўзбекистон Республикаси Президентининг 2025 йил 5 март кунги Коррупцияга қарши курашиш миллий кенгашининг мажлисида сўзлаган нутқида белгиланган вазифалар, ғоялар ва ташаббуслар мамлакатимизда коррупцияга қарши курашиш вақтинчалик эмас, балки узлуксиз, изчил ва мақсадли ҳаракатга айланганини кўрсатмоқда.
Шу йўналишдаши ишларнинг давоми сифатида Ўзбекистон Республикаси Коррупцияга қарши курашиш миллий кенгаши йиғилишининг 2025 йил 14 ноябрдаги баённомасида фуқаролик жамияти институтлари томонидан коррупцияга қарши курашиш мавзусида амалга оширилаётган лойиҳалар тақдимотини ўтказиш режалаштирилган эди.
Мазкур топшириқ ижросини таъминлаш мақсадида ўтказилган йиғилишида Қорақалпоғистон Республикаси Жўқорғи Кенгесининг Суд-ҳуқуқ масалалари ва коррупцияга қарши курашиш қўмитаси раиси, Қорақалпоғистон Республикаси Коррупцияга қарши курашиш кенгаши котиби Алишер Атажанов, Қорақалпоғистон Республикаси Вазирлар Кенгашининг Коррупцияга қарши ички назорат бўлими бошлиғи, Қорақалпоғистон Республикаси Коррупцияга қарши курашиш кенгаши аъзоси Батир Матмуратов, “Юксалиш” ҳаракати Қорақалпоғистон Республикаси ҳудудий бўлинмаси бошлиғи Тажибай Романов, шунингдек, нодавлат нотижорат ташкилотлари ва оммавий ахборот воситалари вакиллари иштирок этди.
Тадбирда сўзга чиққанлар коррупциянинг зарари ҳақида тўхталиб, ушбу иллат нафақат давлат бюджетига ва иқтисодий ўсишга жиддий зарар етказишини, балки энг аввало, фуқароларнинг давлат органларига бўлган ишончини сўндиришини таъкидладилар. Коррупция ижтимоий тенгсизликни чуқурлаштиради, тадбиркорликка тўсқинлик қилади ва жамиятнинг маънавий илдизларига болта уради. Шу боис, унга қарши курашда фақат жазо чоралари эмас, балки жамоатчилик назорати ва ҳуқуқий тарғиботнинг ўрни беқиёс эканлиги алоҳида қайд этилди.
Тадбирнинг асосий қисмида Ўзбекистон Республикаси Олий Мажлис ҳузуридаги фуқаролик жамияти институтларини қўллаб-қувватлаш жамоат фонди ва мазкур фонднинг Қорақалпоғистон Республикаси бўлинмаси томонидан коррупцияга қарши курашиш йўналишидаги давлат гранти танловлари ғолибларининг лойиҳалари тақдимоти ўтказилди.
Хусусан, "Тараққиёт кўзгуси" газетаси таҳририятининг "Биз коррупцияга қаршимиз!" номли ҳамда "Амударё телевидениеси” таҳририятининг "Коррупция – давлат ва жамият тараққиётига таҳдид" номли лойиҳалари доирасида амалга оширилган ишлар юзасидан лойиҳа раҳбари, бош муҳаррир Ғуломжон Ешниёзовнинг тақдимоти тингланди.
Тақдимотда таъкидланганидек, "Биз коррупцияга қаршимиз!" лойиҳаси доирасида Амударё туманининг овул ва маҳаллаларида аҳоли билан юзма-юз мулоқотлар ташкил этилган. Ҳуқуқшунослар ва жамоат фаоллари иштирокидаги ушбу учрашувларда коррупцияга нисбатан ҳуқуқий иммунитетни шакллантиришга урғу берилган. Лойиҳа доирасида ўқувчилар ўртасида "Коррупциясиз жамият қурамиз!" мавзусида иншолар танлови ўтказилиб, ғолиблар тақдирланган. Шунингдек, газета саҳифаларида нуронийлар, ёшлар ва депутатларнинг чиқишлари ташкил қилиниб, аҳолига коррупцияга қарши миллий қонунчиликдан кўчирмалар тарқатилган.
“Коррупция – давлат ва жамият тараққиётига таҳдид" номли лойиҳа доирасида эса "Амударё ТВ" телеканали орқали тайёрланган махсус кўрсатувлар ва ижтимоий роликлар минглаб томошабинларга етиб борган. Лойиҳа доирасида таълим ва тиббиёт муассасалари ҳамда давлат идоралари ходимларининг хизмат хоналарига "Мен оиламни пора эвазига боқмайман!", "Сизга хизмат қилиш – менинг вазифам!" каби ёзувлар ва QR-кодли махсус лавҳалар ўрнатилган. Бу ташаббус келгусида давлат хизматчиларининг масъулиятини оширишга ва тамагирликнинг олдини олишга хизмат қилади. Бундан ташқари, телеканал орқали коррупцияга қарши курашиш бўйича ваколатли органларнинг "Ишонч телефонлари" ва "Call-марказлар" ҳақида мунтазам равишда маълумотлар бериб борилган.
Тадбир қатнашчилари мазкур лойиҳаларнинг самарадорлигини юқори баҳолаб, келгусида коррупцияга қарши курашишда ОАВ ва жамоат ташкилотлари ҳамкорлигини янада кучайтириш бўйича ўз фикр ва тавсияларини билдирдилар.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
