Korruptsiyaga qarshi kurashishga qaratilgan loyihalar taqdimoti oʻtkazildi

Oʻzbekiston Respublikasi Prezidentining 2025-yil 5-mart kungi Korruptsiyaga qarshi kurashish milliy kengashining majlisida soʻzlagan nutqida belgilangan vazifalar, gʻoyalar va tashabbuslar mamlakatimizda korruptsiyaga qarshi kurashish vaqtinchalik emas, balki uzluksiz, izchil va maqsadli harakatga aylanganini koʻrsatmoqda.

Shu yoʻnalishdashi ishlarning davomi sifatida Oʻzbekiston Respublikasi Korruptsiyaga qarshi kurashish milliy kengashi yigʻilishining 2025-yil 14-noyabrdagi bayonnomasida fuqarolik jamiyati institutlari tomonidan korruptsiyaga qarshi kurashish mavzusida amalga oshirilayotgan loyihalar taqdimotini oʻtkazish rejalashtirilgan edi.

Mazkur topshiriq ijrosini taʼminlash maqsadida oʻtkazilgan yigʻilishida Qoraqalpogʻiston Respublikasi Joʻqorgʻi Kengesining Sud-huquq masalalari va korruptsiyaga qarshi kurashish qoʻmitasi raisi, Qoraqalpogʻiston Respublikasi Korruptsiyaga qarshi kurashish kengashi kotibi Alisher Atajanov, Qoraqalpogʻiston Respublikasi Vazirlar Kengashining Korruptsiyaga qarshi ichki nazorat boʻlimi boshligʻi, Qoraqalpogʻiston Respublikasi Korruptsiyaga qarshi kurashish kengashi aʼzosi Batir Matmuratov, “Yuksalish” harakati Qoraqalpogʻiston Respublikasi hududiy boʻlinmasi boshligʻi Tajibay Romanov, shuningdek, nodavlat notijorat tashkilotlari va ommaviy axborot vositalari vakillari ishtirok etdi.

Tadbirda soʻzga chiqqanlar korruptsiyaning zarari haqida toʻxtalib, ushbu illat nafaqat davlat byudjetiga va iqtisodiy oʻsishga jiddiy zarar yetkazishini, balki eng avvalo, fuqarolarning davlat organlariga boʻlgan ishonchini soʻndirishini taʼkidladilar. Korruptsiya ijtimoiy tengsizlikni chuqurlashtiradi, tadbirkorlikka toʻsqinlik qiladi va jamiyatning maʼnaviy ildizlariga bolta uradi. Shu bois, unga qarshi kurashda faqat jazo choralari emas, balki jamoatchilik nazorati va huquqiy targʻibotning oʻrni beqiyos ekanligi alohida qayd etildi.

Tadbirning asosiy qismida Oʻzbekiston Respublikasi Oliy Majlis huzuridagi fuqarolik jamiyati institutlarini qoʻllab-quvvatlash jamoat fondi va mazkur fondning Qoraqalpogʻiston Respublikasi boʻlinmasi tomonidan korruptsiyaga qarshi kurashish yoʻnalishidagi davlat granti tanlovlari gʻoliblarining loyihalari taqdimoti oʻtkazildi.

Xususan, "Taraqqiyot koʻzgusi" gazetasi tahririyatining "Biz korruptsiyaga qarshimiz!" nomli hamda "Amudaryo televideniyesi” tahririyatining "Korruptsiya – davlat va jamiyat taraqqiyotiga tahdid" nomli loyihalari doirasida amalga oshirilgan ishlar yuzasidan loyiha rahbari, bosh muharrir Gʻulomjon Yeshniyozovning taqdimoti tinglandi.

Taqdimotda taʼkidlanganidek, "Biz korruptsiyaga qarshimiz!" loyihasi doirasida Amudaryo tumanining ovul va mahallalarida aholi bilan yuzma-yuz muloqotlar tashkil etilgan. Huquqshunoslar va jamoat faollari ishtirokidagi ushbu uchrashuvlarda korruptsiyaga nisbatan huquqiy immunitetni shakllantirishga urgʻu berilgan. Loyiha doirasida oʻquvchilar oʻrtasida "Korruptsiyasiz jamiyat quramiz!" mavzusida insholar tanlovi oʻtkazilib, gʻoliblar taqdirlangan. Shuningdek, gazeta sahifalarida nuroniylar, yoshlar va deputatlarning chiqishlari tashkil qilinib, aholiga korruptsiyaga qarshi milliy qonunchilikdan koʻchirmalar tarqatilgan.

“Korruptsiya – davlat va jamiyat taraqqiyotiga tahdid" nomli loyiha doirasida esa "Amudaryo TV" telekanali orqali tayyorlangan maxsus koʻrsatuvlar va ijtimoiy roliklar minglab tomoshabinlarga yetib borgan. Loyiha doirasida taʼlim va tibbiyot muassasalari hamda davlat idoralari xodimlarining xizmat xonalariga "Men oilamni pora evaziga boqmayman!", "Sizga xizmat qilish – mening vazifam!" kabi yozuvlar va QR-kodli maxsus lavhalar oʻrnatilgan. Bu tashabbus kelgusida davlat xizmatchilarining masʼuliyatini oshirishga va tamagirlikning oldini olishga xizmat qiladi. Bundan tashqari, telekanal orqali korruptsiyaga qarshi kurashish boʻyicha vakolatli organlarning "Ishonch telefonlari" va "Call-markazlar" haqida muntazam ravishda maʼlumotlar berib borilgan.

Tadbir qatnashchilari mazkur loyihalarning samaradorligini yuqori baholab, kelgusida korruptsiyaga qarshi kurashishda OAV va jamoat tashkilotlari hamkorligini yanada kuchaytirish boʻyicha oʻz fikr va tavsiyalarini bildirdilar.