ХАЛҚ ДЕПУТАТЛАРИ ТУМАН КЕНГАШИНИНГ 23-СЕССИЯСИ ТЎҒРИСИДА АХБОРОТ

29 декабрь куни Амударё тумани ҳокимлигининг мажлислар залида Халқ депутатлари туман Кенгашининг 23-сессияси бўлиб ўтди.

Сессия мажлисида Қорақалпоғистон Республикаси Маҳалла ва оилани қўллаб-қувватлаш вазирининг биринчи ўринбосари Марям Аҳмедова, туман ҳокими Султонбой Йўлдашев, ҳокимлик масъул ходимлари, ҳуқуқ-тартибот органлари, бўлимлар, жамоат ташкилотлари раҳбарлари ҳамда оммавий ахборот воситалари вакиллари иштирок этдилар. Сессия ишига туман ҳокими Султонбой Йўлдашев раислик қилди ҳамда олиб борди.

Сессияда кун тартибидаги дастлабки – туман маҳаллий бюджетининг 2021 йилги асосий кўрсаткичлари тўғрисидаги масала юзасидан туман Молия бўлими бошлиғи Улуғбек Бекниязовнинг ҳисоботи тингланди. Ҳисоботда 2021 йилда туман маҳаллий бюджетининг даромадлари ва харажатлари ҳақида батафсил маълумотлар берилди.

Кун тартибидаги навбатдаги масала – “Темир дафтар”даги рўйхат бўйича ёрдамга муҳтож оилаларга манзилли ёрдам кўрсатиш ва аҳолининг, айниқса, хотин-қизлар ва ёшларнинг бандлигини таъминлаш бўйича амалга оширилаётган ишлар бўйича Маҳалла ва оилани қўллаб-қувватлаш бўлими бошлиғи Алишер Йўлдошевнинг ҳисоботи тингланди. Депутатларга “Темир дафтар”га киритилган эҳтиёжманд оилалар, уларни моддий қўллаб-қувватлаш бўйича кўрилган чоралар, 2020 йил давомида туманда яратилган янги иш ўринлари ҳамда хотин-қизлар ва ёшларни иш билан таъминлаш бўйича амалга оширилган ишлар ҳақида батафсил маълумотлар берилди.

Сессия кун тартибига қўйилган навбатдаги – ер ажратиш, эгалик қилиш, фойдаланишга ва ижарага бериш масалаларини кўриб чиқувчи доимий комиссия қарорига доир масала юзасидан туман ҳокими ўринбосари Файзулла Саъдуллаевнинг ҳисоботи тингланди. Ҳисоботда контрактация шартномаларини бажармаган ҳамда ўз хоҳишига кўра фаолиятини тўхтатаётган фермер хўжаликлари раҳбарларининг аризалари кўриб чиқилиб, уларнинг эгалигидаги ер майдонлари туман заҳира ер фонди ҳисобига қайтариб олингани таъкидлаб ўтилди.

Шунингдек, сессияда Халқ депутатлари туман Кенгаши депутатларини моддий ва маънавий рағбатлантириш тўғрисидаги масала ҳам кўриб чиқилди. Доимий комиссиялар томонидан тавсия қилинган номзодлар орасидан Илҳом Полвонов “Адолатли депутат”, Мақсуд Саъдуллаев “Меҳнаткаш депутат”, Ҳамро Ходжаев “Халқпарвар депутат” деп топилди. Халқ депутатлари туман Кенгашининг аввалги чақириғида фаолият юритган депутат Гуласал Матякубова “Фахрий депутат” деб топилди.

Сессияда шунингдек, Қорақалпоғистон Республикаси Жўқорғи Кенгесининг 28 майдаги қарорига асосан Ўзбекистон Республикаси Президенти томонидан коронавирус пандемиясига доир қабул қилинган Фармон ва Қарорларида белгиланган вазифаларнинг бажарилиши бўйича амалга оширилган чора-тадбирлар ижроси атрофлича муҳокама қилиниб, музокаралар ўтказилди.

Карантин тадбирларини юмшатиш доирасида фаолиятига рухсат берилган соҳалар, айниқса, ишлаб чиқариш, хизмат кўрсатиш ва савдо корхоналарида санитария қоидаларига қатъий амал қилиниши, ҳудудда коронавирус инфекцияси кириб келишининг олдини олиш, аҳоли орасида соғлом турмуш тарзини кенг турда тарғиб қилиш, санитария ва гигиена қоидаларига амал этилиши, аҳолини дори-дармонлар, тиббий буюмлар, тиббий техника ва энг зарур маҳсулотларга бўлган талабларни таъминлаш бўйича амалга оширилаётган ишларнинг самарадорлиги тўғрисидаги масала ҳам депутатлар томонидан кенг муҳокама қилинди.

Сессияда шунингдек, “2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Илм, маърифат ва рақамли иқтисодиётни ривожлантириш йили”да амалга оширишга оид туман дастурининг ижроси, туманда ҳуқуқбузарликларнинг олдини олиш ва уларнинг профилактикаси бўйича амалга оширилаётган ишлар ҳамда сессия ваколатига кирувчи бошқа масалалар ҳам муҳокама қилинди.

Сессия кун тартибида кўрилган барча кўрилган масалалар юзасидан тегишли қарорлар қабул қилинди.

Сессия якунида турли соҳаларда меҳнат қилиб, давлат равнақи ва жамият тараққиёти йўлидаги ислоҳотларни амалга оширишда фаол иштирок этиб келаётган бир гуруҳ фаолларга ҳам туман ҳокими томонидан қимматбаҳо совғалар топширилди.

Туман ҳокимлигининг ахборот хизмати.