Бюджетдан ташқари пенсия жамғармасининг Амударё туман бўлими томонидан овул ва маҳаллаларда ижтимоий ҳимояга доир янги тизим тартиб-қоидаларига бағишланган тарғибот тадбирлари ўтказилмоқда

Кекса авлод вакилларига бўлган эътибор, уларни ҳар томонлама ижтимоий ва иқтисодий қўллаб-қувватлаш доимо давлатимиз диққат марказида. Бу борада Молия Вазирлиги ҳузуридаги бюджетдан ташқари Пенсия жамғармаси Амударё туман бўлимида  самарали ишлар амалга оширилмоқда.

Бугунги кунда ёшга доир пенсия олувчилар 17132 нафар, ногиронлик бўйича пенсия олувчилар 2506 нафар, боқувчисини йўқотганлик пенсияси олувчилар 994 нафар, пенсия тайинлаш учун зарур иш стажига эга бўлмаган қарияларга  ва боқувчисини йўқотганлик учун ижтимоий нафақалар олувчилар 2463 нафарни ташкил этди.

Мамлакатимизда аҳолига кўрсатилаётган ижтимоий хизматлар ва ёрдамнинг манзиллилигини янада ошириш бўйича изчил чора-тадбирлар амалга оширилмоқда, аҳолини ижтимоий ҳимоя қилиш тартиб-таомиллари босқичма-босқич рақамлаштирилмоқда.

Хусусан, жаҳонда бўлиб ўтаётган коронавирус пандемияси даврида аҳолининг эҳтиёжманд қисмини қисқа муддатларда аниқлаш ва уларни давлат томонидан манзилли қўллаб-қувватлашнинг шаффоф ва самарали тизими жорий этилмоқда.

Аҳолини ижтимоий ҳимоя қилиш тизимига замонавий ахборот-коммуникация технологияларини кенг жорий этиш, аҳолининг ижтимоий жиҳатдан заиф қатламларига давлат ижтимоий хизматлари ва ёрдамини тақдим этишнинг ягона тизимини яратиш мақсадида мамлакатимизда 2020 йилнинг 1 сентябридан бошлаб бола икки ёшга тўлгунга қадар бола парвариши бўйича нафақа, 14 ёшгача болалари бўлган оилаларга нафақалар ва кам таъминланган оилаларга моддий ёрдам тайинлашни кўриб чиқиш ва белгилаш тартиб-таомиллари «Ижтимоий ҳимоя ягона реестри» ахборот тизими орқали босқичма-босқич амалга оширилмоқда.

Бунда «Ижтиомий ҳимоя ягона рестри» ахборот тизими эгаси ва фойдаланувчиси Ўзбекистон Республикаси Молия вазирлиги ҳузуридаги Бюджетдан ташқари пенсия жамғармаси ҳисобланади.

Аҳолини ижтиомий ҳимоя қилиш борасида ўрнатилган тизим тартиб-таомиллари ва қоидаларини фуқаролар йиғинлари масъул ходимларига кенг тарғиб қилиш мақсадида Бюджетдан ташқари пенсия жамғармаси туман бўлими ходимлари овул, маҳалла фуқаролар йиғинларига чиқмоқдалар.

Шу йилнинг 10 декабрида бўлим бошлиғи ўринбосари Зокиржон Халилаев, бўлим мутахассиси Сарвар Комилжоновлар Манғит шаҳридаги Дурунки маҳалла фуқаролар йиғини масъул ходимларига янги тизим бўйича тарғибот-тушунтириш ишлари олиб бордилар. Таъкидланганидек, Ягона ресстр учун ҳимояга муҳтож оила аъзоларининг паспорти, туғилганлик тўғрисида гувоҳнома, никоҳни қайд этиш гувоҳномаси маҳалла фуқаролар йиғинларига тақдим этилади, ушбу орган ушбу ҳужжатларни қабул қилмаслиги мумкин эмас. Ариза тақдим этилгач, бу ҳужжатлардаги маълумотлар Ягона ресстрга киритилади. Оиланинг ижтимоий ҳимояга муҳтож ёки йўқлигини аниқлаш учун зарур бўладиган бошқа маълумотлар Ягона реестр орқали тегишли идоралардан автоматик тарзда электрон равишда олинади. Идоралардан олинган маълумотлар асосида қонунчиликдан келиб чиқиб, ягона реестр ҳеч бир инсон омили иштирокисиз аризачи мурожаати бўйича қарор чиқаради ва бу ҳақда аризачи ёки унинг оила аъзоларига смс хабар жўнатилади.

Тарғибот тадбирларида масъуллар янги тизим афзалликларини тўла тушунтириб бердилар ва маҳалла фуқаролари йиғинига ижтимоий ёрдам сўраб мурожаат қилганларга бу ҳақда батафсил тушунтиришлари лозимлигини таъкидладилар.

Бюджетдан ташқари Пенсия жамғармаси туман бўлими ходимлари туманимизнинг барча овул ва маҳаллаларида ҳам ана шундай тарғибот-тушунтириш ишларини олиб боришмоқда. 

О.РАЖАБОВА.