Ҳокимлар ва уларнинг ўринбосарлари фаолияти махсус мезонлар асосида баҳоланади

18 сентябрь куни Амударё туман ҳокимлигида шаҳар ва туманлар ҳокимлари ҳамда уларнинг ўринбосарлари фаолиятининг энг муҳим самарадорлик кўрсаткичларини баҳолаш мезонлари, ушбу тизимни амалиётга жорий этиш тартибига бағишланган йиғилиш бўлиб ўтди.

Йиғилишда Ўзбекистон Республикаси Президенти ҳузуридаги Давлат хизматларини ривожлантириш агентлиги директорининг биринчи ўринбосари Отабек Ҳасанов, агентлик бошқарма бошлиғи Отабек Маҳкамов, агентлик департамент мудири Баҳодир Мирусманов ҳамда Давлат хизматларини ривожлантириш агентлигининг Қорақалпоғистон Республикаси бошқармаси бошлиғи Рашид Матқурбонов, шунингдек, туман ҳокими ўринбосарлари иштирок этдилар.

Учрашувда Ўзбекистон Республикаси Президенти ҳузуридаги Давлат хизматларини ривожлантириш агентлиги мутасаддилари ҳокимлар ва уларнинг ўринбосарлари фаолиятининг энг муҳим самарадорлик кўрсаткичларини баҳолаш мезонлари бўйича тўлиқ тушунчалар бердилар.

Мутасаддилар юртимизда маҳаллий ҳокимликлар фаолиятини замон талабига мос равишда йўлга қўйиш, уларни билимли ва энг муносиб кадрлар билан таъминлаш, иш самарадорлигини ошириш борасида Ўзбекистон Республикаси Президенти Администрацияси ва Ўзбекистон Республикаси Президенти ҳузуридаги Давлат хизматларини ривожлантириш агентлиги томонидан янги механизм, иш услублари эксперимент тариқасида амалиётга жорий этилаётгани хусусида тўхталди. Бу борада агентликнинг Давлат хизматчилари фаолиятини мониторинг қилиш ва баҳолаш департаменти ходимлари томонидан барча туман, шаҳар ҳокимликларидаги вазиятлар ўрганиб чиқилиб, мавжуд шарт-шароитлар инобатга олинган ҳолда ҳар бир ҳоким ўринбосарларига йўналишидан келиб чиқиб, уларнинг фаолиятини холисона баҳолашга хизмат қилувчи кўрсаткич индикаторлари ишлаб чиқилаётгани маълум қилинди.

Айтиш керакки, мамлакатимизда энг муҳим самарадорлик кўрсаткичлари асосида баҳолаш тизимини жорий этиш, албатта, давлат органлари ва ташкилотлари учун янги механизм бўлганлиги боис, дастлаб ўзига хос қийинчиликларни келтириб чиқариши табиий  ҳолат. Аммо механизм ишлай бошлагандан сўнг, иш сифати ва самарадорлиги ортади, маълум лойиҳаларни ва вазифаларни бажариш тезлашади, давлат хизматчиларининг компетенциялари ривожланиб боради. Чунки тизим ҳар бир ходимни ўз устида мунтазам ишлашга ундайди.

Йиғилишда туман ҳокими ўринбосарлари мутасаддиларга ўз йўналишларидан келиб чиқиб, қатор таклифлар бердилар. Хусусан, туман ҳокимининг ўринбосари – Маҳалла ва оилани қўллаб-қувватлаш бўлими бошлиғи Алишер Йўлдошев бугунги кунда жойларда туман ҳокимлиги заҳирасидаги эскирган, фойдаланилмаётган бино ва иншоотларни бузиш ҳисобидан чиқаётган қурилиш материалларидан 3 хонали уйлар қурилиб берилаётганлиги, ушбу амалга оширилаётган ишларни маҳаллий ижроия ҳокимияти органлари раҳбарлари фаолиятини баҳолаш тизими ҳамда энг муҳим самарадорлик кўрсаткичлари тўғрисидаги низомга қўшимча қилиб киритиш таклифи билдирилди.

Шунингдек, туман ҳокими ўринбосари – инвестициялар ва ташқи савдо бўлими бошлиғи Рашид Салаев ҳамда туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Маҳмуд Шерметовлар ҳоким ва унинг ўринбосарларининг энг муҳим самарадорлик кўрсаткичларини баҳолаш юзасидан қатор таклифлар киритди.

Йиғилишда билдирилган таклифлар мутасаддилар томонидан алоҳида эътиборга олинди.

Чарос Арслонова, туман ҳокимлигининг Ахборот хизмати раҳбари.