Hokimlar va ularning oʻrinbosarlari faoliyati maxsus mezonlar asosida baholanadi

18-sentyabr kuni Amudaryo tuman hokimligida shahar va tumanlar hokimlari hamda ularning oʻrinbosarlari faoliyatining eng muhim samaradorlik koʻrsatkichlarini baholash mezonlari, ushbu tizimni amaliyotga joriy etish tartibiga bagʻishlangan yigʻilish boʻlib oʻtdi.

Yigʻilishda Oʻzbekiston Respublikasi Prezidenti huzuridagi Davlat xizmatlarini rivojlantirish agentligi direktorining birinchi oʻrinbosari Otabek Hasanov, agentlik boshqarma boshligʻi Otabek Mahkamov, agentlik departament mudiri Bahodir Mirusmanov hamda Davlat xizmatlarini rivojlantirish agentligining Qoraqalpogʻiston Respublikasi boshqarmasi boshligʻi Rashid Matqurbonov, shuningdek, tuman hokimi oʻrinbosarlari ishtirok etdilar.

Uchrashuvda Oʻzbekiston Respublikasi Prezidenti huzuridagi Davlat xizmatlarini rivojlantirish agentligi mutasaddilari hokimlar va ularning oʻrinbosarlari faoliyatining eng muhim samaradorlik koʻrsatkichlarini baholash mezonlari boʻyicha toʻliq tushunchalar berdilar.

Mutasaddilar yurtimizda mahalliy hokimliklar faoliyatini zamon talabiga mos ravishda yoʻlga qoʻyish, ularni bilimli va eng munosib kadrlar bilan taʼminlash, ish samaradorligini oshirish borasida Oʻzbekiston Respublikasi Prezidenti Administratsiyasi va Oʻzbekiston Respublikasi Prezidenti huzuridagi Davlat xizmatlarini rivojlantirish agentligi tomonidan yangi mexanizm, ish uslublari eksperiment tariqasida amaliyotga joriy etilayotgani xususida toʻxtaldi. Bu borada agentlikning Davlat xizmatchilari faoliyatini monitoring qilish va baholash departamenti xodimlari tomonidan barcha tuman, shahar hokimliklaridagi vaziyatlar oʻrganib chiqilib, mavjud shart-sharoitlar inobatga olingan holda har bir hokim oʻrinbosarlariga yoʻnalishidan kelib chiqib, ularning faoliyatini xolisona baholashga xizmat qiluvchi koʻrsatkich indikatorlari ishlab chiqilayotgani maʼlum qilindi.

Aytish kerakki, mamlakatimizda eng muhim samaradorlik koʻrsatkichlari asosida baholash tizimini joriy etish, albatta, davlat organlari va tashkilotlari uchun yangi mexanizm boʻlganligi bois, dastlab oʻziga xos qiyinchiliklarni keltirib chiqarishi tabiiy  holat. Ammo mexanizm ishlay boshlagandan soʻng, ish sifati va samaradorligi ortadi, maʼlum loyihalarni va vazifalarni bajarish tezlashadi, davlat xizmatchilarining kompetentsiyalari rivojlanib boradi. Chunki tizim har bir xodimni oʻz ustida muntazam ishlashga undaydi.

Yigʻilishda tuman hokimi oʻrinbosarlari mutasaddilarga oʻz yoʻnalishlaridan kelib chiqib, qator takliflar berdilar. Xususan, tuman hokimining oʻrinbosari – Mahalla va oilani qoʻllab-quvvatlash boʻlimi boshligʻi Alisher Yoʻldoshev bugungi kunda joylarda tuman hokimligi zahirasidagi eskirgan, foydalanilmayotgan bino va inshootlarni buzish hisobidan chiqayotgan qurilish materiallaridan 3 xonali uylar qurilib berilayotganligi, ushbu amalga oshirilayotgan ishlarni mahalliy ijroiya hokimiyati organlari rahbarlari faoliyatini baholash tizimi hamda eng muhim samaradorlik koʻrsatkichlari toʻgʻrisidagi nizomga qoʻshimcha qilib kiritish taklifi bildirildi.

Shuningdek, tuman hokimi oʻrinbosari – investitsiyalar va tashqi savdo boʻlimi boshligʻi Rashid Salayev hamda tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Mahmud Shermetovlar hokim va uning oʻrinbosarlarining eng muhim samaradorlik koʻrsatkichlarini baholash yuzasidan qator takliflar kiritdi.

Yigʻilishda bildirilgan takliflar mutasaddilar tomonidan alohida eʼtiborga olindi.

Charos Arslonova, tuman hokimligining Axborot xizmati rahbari.