Жорий йилнинг январидан июль ойигача бўлган давр оралиғида 1395 нафар аҳоли жамоат ишларига жалб қилинди

Мамлакатимизда халқимизнинг турмуш фаровонлигини оширишга, улар учун барча соҳаларда қулайликлар яратишга қаратилган изчил ислоҳотлар амалга оширилмоқда. Бунда аҳоли бандлигини таъминлаш орқали даромад топишларига эришиш, камбағалликни қисқартириш асосий вазифа қилиб қўйилган.

Шуниси эътиборлики, салкам олти ойдан бери юртимизда давом этаётган коронавирус пандемияси туфайли даромадидан айрилган, иқтисодий ночор аҳволга тушиб қолган ёшларнинг, аёл-қизларнинг бандлигини таъминлашга, ижтимоий ҳимоя қилишга алоҳида эътибор қаратилмоқда.

Туман Аҳоли бандлигига  кўмаклашиш маркази томонидан ишсиз, четга ишлашга кета олмаган ёки қайтиб келган фуқароларнинг бандлигини таъминлаш учун бўш иш ўринларидан хабардор қилиш мақсадида овул ва маҳалла фуқаролар йиғинларида хабарлар мунтазам бериб борилди ва янгиланиб борилмоқда. Шунингдек, маҳалла ва хонадонларга чиқиб ишлаш механизми жорий этилди. Жорий йилнинг январидан июль ойигача бўлган давр оралиғида 1395 нафар аҳоли жамоат ишларига жалб қилинди ва уларнинг иш ҳақи тўлови учун маблағлар тўлаб берилди. Ободонлаштириш, кўкаламзорлаштириш, дарахтларни оқлаш, уларга ишлов бериш, ариқлар ҳамда ички йўлларни тозалаш, Ободонлаштириш бошқармаси ва “Тоза ҳудуд” корхонаси буюртмалари бўйича марказий кўчалар ва хиёбонларни тозалаш, кўкаламзорлаштириш, гул кўчатларини экиш ва парваришлаш, маиший чиқиндиларни тўплаш ҳамда олиб чиқиш каби ишларга жалб этилди. Хусусан, янги ташкил этилган Хотира майдони ҳудудини ободонлаштириш ва кўкаламзорлаштиришга 50 нафар, Истироҳат боғига 70 нафар, пиёдалар йўлакчаларини тартибга келтириш ишларига 50 нафар, ногиронлиги бор, эҳтиёжманд оилалар ҳовли-жойини таъмирлашга 30 нафар фуқаро жалб қилинди.

Шунингдек, фермер хўжаликлари ва кластер корхоналарининг буюртмасига кўра, дала ишларига 272 нафар фуқаролар ишга йўналтирилди ва барчасига ойлик маошлари учун маблағ ўз вақтида ўтказиб берилди.

Карантин даврида ўрнатилган тартиб-қоидалар инобатга олинган ҳолда ноанъанавий ва ностандарт жамоат ишлари турлари ҳам жорий этилди. Давлат санитария-эпидемиология назорати маркази ходимларига қўшимча куч сифатида дезинфекциялаш ишларига кўмаклашиш учун 49 нафар вақтинча ишсиз фуқаролар, ички ишлар ва Миллий гвардия ходимларига амалий ёрдам кўрсатишга 20 нафар, блок-постларда хизмат кўрсатишга 10 нафар фуқаролар ишга олинди.

Мамлакатимизда инсон қадр-қиммати улуғ, унинг ўз ҳаётидан рози бўлиб яшаши учун кўпгина чора-тадбирлар амалга оширилмоқда.

Маълумки, коронавирус пандемияси туфайли ўрнатилган карантин қоидаларига мувофиқ заруратсиз уйдан чиқмаслик, яқинлар, қўни-қўшниларникига бормаслик, меҳмон чақирмаслик, санитария-гигиена талабларига қатъий амал қилиш тавсия этилди. Буларнинг ижроси якка-ёлғиз, ўзгалар парваришига муҳтож инсонларнинг қаровсиз қолиб кетишига олиб келиши мумкинлиги инобатга олиниб, ана шундай тоифадаги фуқароларни парваришлаш учун 40 нафар ўрта  тиббиёт ходимлари жалб қилинди.

Секторларда ўтказилган ўрганишлар давомида январь-июль ойларида “Темир дафтар”га киритилган 361 та кам таъминланган, эҳтиёжманд оилалар ишсиз аъзоларининг бандлигини таъминлаш, даромад топишига шароит яратиш мақсадида томорқасига енгил типдаги иссиқхоналар қуриш, экин экиш, уруғ, кўчат, суғориш воситалари харид қилишлари учун 776,9 млн. сўм субсидия маблағлари берилди.

Шунингдек, шу йилнинг биринчи чорагида 84 нафар ишсиз фуқаро касб-ҳунарга ўқитилиб, ишга жойлашишига кўмак берилди. Йил бошидан бери 200 нафар ишсиз фуқароларга ишсизлик нафақаси тайинланди ва тўлаб берилди. Шу ўринда айтиш жоизки, ишсиз фуқароларни тадбиркорликка жалб қилиш, уларнинг меҳнат фаоллигини оширишга ҳам алоҳида эътибор қаратилмоқда.

Ишсиз, ижтимоий ҳимояга муҳтож фуқаролар учун янги иш ўринлари яратиш, уларнинг оиласида даромад манбалари кўпайишига ва пировардида иқтисоди юксалишига эришиш асосий мақсадимиздир.

Алишер СОБИРОВ, туман Аҳоли бандлигига кўмаклашиш маркази директори.