Сифатли ва кафолатли хизмат

Давлат ҳамда шахсий мулкларни талон-тарож этиш ҳолатларининг содир бўлиши иқтисодий жиҳатдан зарар келтириши табиий. Шу боис, ички ишлар бўлими қошидаги қўриқлаш бўлинмасида бундай ҳолатларга қарши тадбирлар йил давомида олиб борилади.

Туман ИИБ ҳузуридаги туманлараро қўриқлаш бўлимининг ходимлари ҳам туман ҳудудида талон-тарожлик ва майда ташмачиликларнинг олдини олиш борасида тегишли соҳалар билан ҳамкорликда ишлар олиб боришмоқда. Жорий йилда бўлимимиз томонидан жами 62 объект, 18 фуқаро хонадонлари техник қўриқлашга олинди.

Ушбу жойларда ишончли қўриқлашни, техникаларнинг узлуксиз ишлашини таъминлаш борасида аниқланган камчиликлар жойнинг ўзида бартараф этилди. Қўриқлашга олинган объектлардаги ишчи ходимлар, турар жойларда фуқаролар билан биргаликда майда ташмачилик ҳаракатларига қарши курашиш бўйича тарғибот ҳамда тушунтириш ишлари йил давомида олиб борилади.

 Булардан ташқари, туман ҳудудида ҳуқуқбузарликка қарши курашиш, жиноятчиликнинг олдини олиш бўйича ўтказилган тадбирларда ходимларимиз фаол иштирок этиб, 4 та жиноятнинг очилишига ҳамда 2 та қидирувдаги жиноятчининг ушланишига ҳисса қўшдилар. Ходимларнинг сиёсий, маданий ва маърифий билимларини ошириш бўйича маърифий ҳамда сиёсий ўқув дарслари белгиланган режа асосида ташкиллаштирилиб келинмоқда.

Албатта, ходимларимиз томонидан мулкларнинг дахлсизлигини таъминлаш ўз самарасини бермоқда. Натижада қўриқлашга олинган объектлар сони ва фуқароларимизнинг бўлимимиз ходимларига ишончи кун сайин ортиб бормоқда. Бу борада оммавий ахборот воситалари, матбуотнинг ўрни ҳам катта аҳамият касб этади. Шунинг учун ҳам қўриқлаш бўлими ходимлари томонидан республика ҳамда ҳудудий газета, телевидение радио тармоқлари орқали чиқишлар қилинмоқда.

Халқимизнинг оғирини енгил этиш, мулкларнинг ишончли кўриқланишини таъминлаш вазифасини бажарувчи ходимларимиз талон-тарожлик ҳамда майда ташмачиликларнинг олдини олишда бундан кейин ҳам диққат-эътиборни кучайтираверади.

Р.ҲАМРОЕВ,