Давлат ҳокимияти ва бошқаруви органлари фаолиятининг очиқлигини таъминлаш — кучли фуқаролик жамияти барпо этиш омили

Бугун мустақил юртимиз ўзига хос, дадил одимлар билан тараққиёт йўлидан бормоқда. Она Ватанимизнинг қайси гўшасида бўлманг, оламшумул янгиланишларга гувоҳ бўласиз. Бунёдкор халқимиз томонидан юртимизнинг ҳар бир бурчагида катта ўзгаришлар амалга оширилмоқда ва улкан ютуқлар қўлга киритилмоқда.

Айтиш жоизки, эришилаётган бу ютуқлар, халқимизнинг тинч-осойишта ҳаёти ва эртанги кунга бўлган ишончининг ошиб бораётгани Конституциямизда белгилаб қўйилган ҳуқуқий асослар туфайлидир. Юртбошимиз таъкидлаганидек: "Аввало, барчамиз бир ҳақиқатни англаб, тушуниб бормоқдамиз - бугун жамиятимизда қандай ютуқ ва марраларга эришган бўлсак, буларнинг пойдеворида Конституциямиз - буюк ҳаёт Қомусимиз турибди”.

Бугун йигирма бир йиллигини катта шодиёна билан нишонлаётганимиз – Ўзбекистон Республикаси Конституцияси - миллий давлатчилигимизнинг чуқур тарихий илдизига, миллатимизнинг бой маънавий асосига ва дунё мамлакатларининг илғор тажрибасига асосланган муҳим ҳуқуқий ҳужжат, тараққиётимизнинг ҳуқуқий асоси, таянчи ва энг муҳим кафолати бўлиб хизмат қилмоқда.

Конституциямизда инсон ва фуқароларнинг асосий ҳуқуқлари, эркинликлари ва бурчлари энг устувор қоидалар сифатида берилганлиги, истиқлолимизнинг илк кунидан бошлаб амалга оширилаётган барча эзгу ишлар замирида "ислоҳот ислоҳот учун эмас, инсон учун, унинг фаровон ҳаёти учун хизмат қилиши керак”, деган ҳаётий тамойил тургани давлатимиз умуминсоний қадриятларга нақадар содиқ эканлигидан далолатдир.

Ўзбекистон Республикаси Конституциясининг 2-моддасида таъкидланганидек, "Давлат халқ иродасини ифода этиб, унинг манфаатларига хизмат қилади. Давлат органлари ва мансабдор шахслар жамият ва фуқаролар олдида масъулдирлар”. Ушбу масъулият айни кунларда Самарқанд ва Бухоро вилоятларида ҳуқуқий экспертизадан ўтказилаётган "Давлат ҳокимияти ва бошқаруви органлари фаолиятининг очиқлиги тўғрисида”ги Ўзбекистон Республикаси Қонуни билан янада мустаҳкамланмоқда.

Давлат ҳокимияти ва бошқарув органлари фаолиятининг очиқлигини, шаффофлигини таъминлаш ҳамда уларнинг фаолиятига оид ахборотни кенг жамоатчиликка етказиш бўйича туманимизда ҳам қатор амалий ишлар қилинмоқда.

Бугунги кунда туманимизда 3 та оммавий ахборот воситалари: "Тараққиёт кўзгуси” газетаси, "Амударё телевидениеси” ва amunews.uz веб-сайти фаолият кўрсатмоқда. Ушбу оммавий ахборот воситалари туманда давлат ҳокимияти ва бошқарув органлари фаолиятининг очиқлигини таъминлашда муҳим восита бўлиб хизмат қилмоқда.

Овул ва маҳаллаларимизда ўтказилаётган аҳоли билан учрашувларда ҳам туманимизда барча соҳаларда амалга оширилаётган ишлар хусусида туман ҳокими ва унинг ўринбосарлари тегишли муассаса, корхона ва ташкилотлар раҳбарлари билан биргаликда аҳолига ҳисобот бериб, уларнинг муаммоларини тинглаб, уларни ҳал қилиш чоралари кўрилмоқда.

Бутун мамлакатимизда бўлгани каби туманимизда ҳам иқтисодиётимизни янада юксалтириш, аҳоли турмуш фаровонлигини яхшилаш бўйича қатор амалий ишлар қилинмоқда.

Жумладан, саноат салоҳиятини 2013-2015 йилларда ривожлантириш инвестиция лойиҳалари ишлаб чиқилиб, бу дастурга жами қиймати 32,7 млн. АҚШ доллари эквивалентидаги 27 та лойиҳалар киритилиб, уларда 478 та янги иш ўринлари ташкил қилиш белгилаб олинди. Дастур ижросини таъминлаш мақсадида олиб борилган ишлар натижасида жорий йилнинг ўтган даврида жами 24 та лойиҳа амалга оширилиб, 300 дан ортиқ янги иш ўринлари яратилди.

Шунингдек, "Амударё текстил” хорижий корхонасида ип-калава ишлаб чиқариш лойиҳаси бўйича 28,6 млрд. сўм миқдорида инвестиция киритилиши белгиланган бўлса, амалда 43,8 млн. АҚШ доллари миқдорида инвестиция киритилиб, ҳозирги кунда қурилиш ишлари давом қилдирилмоқда. Бу лойиҳа якунига етказилиши натижасида 250 та янги иш ўринлари яратилади.

"2012-2016 йилларда хизмат кўрсатиш соҳаларини ривожлантириш” Дастурига асосан жорий йил учун белгиланган хизмат кўрсатиш ва сервисни ривожлантириш параметрларида жами 69 та хизмат кўрсатиш ва сервис объектлари ташкил қилиш, хизматлар ҳажмини 99,6 млрд. сўмга, ўсим суръатини 116,3 фоизга етказиш назарда тутилган бўлса, олиб борилган ишлар натижасида шу кунга қадар жами 64 та хизмат кўрсатиш ва сервис объектлари ташкил қилиниб, уларга жами 3 млрд. 810 млн. сўм маблағ жалб қилинди. Хизмат кўрсатиш объектларини ишга тушириш натижасида 100 та янги иш ўринлари яратилди.

Бандлик дастури ижросини таъминлаш мақсадида олиб борилган ишлар натижасида жорий йилнинг ўтган даври мобайнида режадаги 4871 та ўрнига 4969 та янги иш ўринлари яратилиб, белгиланган прогноз кўрсаткичлари 102,0 фоизга бажарилди.

Ижтимоий соҳада ҳам олиб борилган ишлар натижасида жорий йилнинг ўтган даврида 37,3 минг квадрат метр уй-жойлар, 5,3 км узунликдаги газ тармоқлари, 39 км. узунликдаги ичимлик суви тармоқлари тортилди.

Туманимиз фермерлари ва қишлоқ хўжалиги соҳаси ходимларининг фидойи меҳнатлари туфайли иқтисодиётнинг етакчи тармоғи бўлмиш қишлоқ хўжалиги соҳасида ҳам катта натижаларга эришилмоқда. Бу йил туманимиз пиллакорлари 243,5 тонна пилла, ғаллакорларимиз 10 минг тоннадан ортиқ буғдой етиштирди, шундан 4605 тонна ғалла шартнома асосида қабул масканларига топширилди. Пахтакорларимиз 43 минг тонналик хирмон бунёд этиб, мамлакатимизда биринчилардан бўлиб давлатга пахта сотиш бўйича шартномавий режаларини ортиғи билан бажардилар.

Жорий йилда туманимизда қурилиш соҳасида ҳам қатор ишлар амалга оширилмоқда. Қишлоқ жойларида 70 та намунавий лойиҳалар асосидаги уй-жойлар, шунингдек, 360 ўқувчи ўринга мўлжалланган транспорт касб-ҳунар коллежи, ҳар бири 50 қатновга мўлжалланган 2 та қишлоқ врачлик пунктлари, 150 ўқувчи ўринга мўлжалланган мусиқа мактаби биноси қуриб битказилди. Шунингдек, бир неча таълим муассасаларида капитал таъмирлаш ва реконструкция ишлари амалга оширилди.

Ижтимоий инфратузилмани яхшилаш мақсадида "Урганч шаҳри - Манғит шаҳри - Туркманистон Республикаси чегараси” давлат аҳамиятидаги автомобиль йўлининг 75,5 - 79 километроралиғида 4 млрд. 270 млн. сўмлик, Манғит шаҳри ва қишлоқларда аҳолини тоза ичимлик суви билан таъминлаш мақсадида жами 4 млрд. 443 млн. сўмлик қурилиш ва реконструкция ишлари амалга оширилмоқда.

Инсон манфаати, ҳуқуқ ва эркинликларини таъминлашдек энг муҳим устувор вазифа «Обод турмуш йили» Давлат дастурида ҳам ўз ифодасини топган. Шу дастур асосида қабул қилинган туман дастури бўйича ўтган 11 ой давомида салкам 96,5 миллиард сўм миқдоридаги маблағ эвазига кенг кўламли ишлар амалга оширилди.

Энг муҳими, айтишимиз керакки, халқимиз эртанги кунга ишонч билан боқиб, мустақиллик берган имкониятлардан фойдаланган ҳолда бунёдкорлик ва яратувчанлик иштиёқи билан яшаб, меҳнат қилмоқда. Бундай жонкуяр юртдошларимизнинг фидойи меҳнатлари натижасида мамлакатимиз янада ривожланиб, аҳолининг турмуш фаровонлиги тобора ортаверади.

Фурсатдан фойдаланиб, барча юртдошларимизни ва туманимиз аҳлини обод ва фаровон турмушимиз асоси бўлмиш Конституциямизнинг 21 йиллиги билан чин қалбимдан самимий табриклайман. Юртимиз тинч, осмонимиз мусаффо, мустақиллигимиз абадий бўлсин!

Ражаббой ЙЎЛДОШЕВ,

туман ҳокими, Қорақалпоғистон Республикаси Жўқорғи Кенгеси депутати.