Оила бахти

Бу дунёда бахтиёр, аҳил-иноқ, тўкис яшашни ким ҳам орзу қилмайди, дейсиз? Бироқ бу ҳақда орзу қилишнинг ўзи етарли бўлмайди. Ҳар қандай бахт, яхши турмушга киши ҳалол меҳнатлари, орзу-интилишлари туфайли эришади.

Ўзларининг фидойи меҳнатлари, яхши амаллари билан маҳалламизда обрў-эътиборга, ҳурматга эга Олимбой Аҳмедовнинг хонадонини ҳақиқий бахтиёр оилалардан бири десам, хато бўлмас.

Уларнинг хонадонига бош суққан киши остонадаёқ саранжом-саришталик, озодаликни кўриб баҳри-дили очилади. Шундай яшашга не етсин, дея ўйлайди.

Олимбой Аҳмедов айни кунда кўп тармоқли хусусий фирма фаолиятига раҳбарлик қилади. Турмуш ўртоғи Розия Қут-лимуродова эса узоқ йиллар 31-сонли умумтаълим мактабига раҳбарлик қилди, ўқувчиларга математика фанидан сабоқ берди.

Айни кунда кексалик нафақасида бўлишига қарамай, ўз маҳалласида кўптармоқли фирмага қарашли озиқ-овқат дўкони қуриб, элга хизмат қилаяпти. Дўкон пештахталаридаги сар-хил ва сифатли озиқ-овқат маҳсулотлари қўни-қўшни, маҳалладошларига ҳам манзур бўлаётгани туфайли опанинг ҳузуридан одам аримайди. Кимдир оиласининг бирон эҳтиёжи учун кирса, кимдир оиласидаги бирон муаммосига маслаҳат сўраб киради, баъзан шу атрофга йўли тушган шогирдлари опадан ҳол сўраб ўтади.

Розия опа учун буларнинг бари – яъни бировларга кераклиги, йўқлагани бахт. У ҳар куни мамлакатимиз пойтахти – Тошкентда яшаб, "Perfectum mobile” алоқа компаниясида директор ўринбосари бўлиб ишлайдиган ўғли Мансур, келини Маҳфуза, қизи - онколог шифокор Маъмура, туман ҳокимлигида мутахассис бўлиб ишлайдиган Тимур, келини Динора, кенжатой ўғли - мелиорация соҳаси мутахассиси Жасур билан тез-тез ҳол-аҳвол сўрашиб, йўл-йўриқ бериб, невараларининг аҳволидан бохабар бўлиб туришга ҳам вақт топади.

Фарзандлари камолидан кўнгли тўқ Олимбой Аҳмедов ва Розия Қутлимуродовалар бўш вақтларини невараларига бағишлашади.

- Невара фарзанддан ҳам ширин бўлади, деганлари рост экан, - дейди кулиб опа. Унинг қалбида ўзбекона бағрикенглик, меҳрибонлик ва ҳаётдан завқ олиб яшай олиш, борини эл билан баҳам кўришдан қувониш каби бебаҳо фазилатлар мужассам эканлигини англадим.

Ҳалол меҳнатлари эвазига "Қорақалпоғистон халқ таълими аълочиси” унвонини олишга муяссар бўлган опа билан хайрлашар эканман, оилангиздаги хотиржамлик, бахтиёрлик доим барқарор бўлсин, дея тиладим.

Азиза МАДРАҲИМОВА.